மாலைத்தீவுகள்

மாலைத்தீவுகள் குடியரசு ދިވެހިރާއްޖޭގެ ޖުމްހޫރިއްޔާ (Dhivehi) திவேஹி ராஜ்ஜேய்கே ஜும்ஹூரிய்யா
கொடி சின்னம்
குறிக்கோள்: الدولة المحلديبية  (அரபு) அத்-தவ்லத் அல்-மஹல்திபிய்யத்
நாட்டுப்பண்: ޤައުމީ ސަލާމް "மாலைத்தீவுகள் நாட்டுப்பண்" "தேசிய வணக்கம்"
தலைநகரம்	மாலே 4°10′31″N 73°30′32″E
பெரிய நகர்	தலைநகரம்
அலுவல் மொழி, தேசிய மொழி	திவெயி
பொது மொழி	ஆங்கிலம்
சமயம்	சன்னி (அலுவல்)
மக்கள்	மாலைத்தீவர்
அரசாங்கம்	ஒருமுக தலைவர் ஆளும் அரசு முறைமை
• அதிபர்	முகமது முயிசு
• துணை அதிபர்	உசைன் மொகம்மெது லத்தீப்
• சபாநாயகர்	அப்துல் ரகீம் அப்துல்லா
• தலைமை நீதிபதி	அப்துல் கனீ மொகம்மெது
சட்டமன்றம்	மக்களின் மச்லீசு
சுதந்திரம்  ஐக்கிய இராச்சியத்திடமிருந்து
• சுதந்திரம் அறிவிக்கப்பட்டது	26 சூலை 1965
• இரண்டாம் குடியரசு	11 நவம்பர் 1968
• தற்போதைய அரசியலமைப்பு	7 ஆகத்து 2008
பரப்பு
• மொத்தம்	298 km2 (115 sq mi) (187-ஆவது)
மக்கள் தொகை
• 2024 மதிப்பீடு	6,01,269
• 2022 கணக்கெடுப்பு	5,15,132 (167-ஆவது)
• அடர்த்தி	1,728.63/km2 (4,477.1/sq mi) (8-ஆவது)
மொ.உ.உ. (கொ.ஆ.ச.)	2024 மதிப்பீடு
• மொத்தம்	$13.867 பில்லியன் (157-ஆவது)
• தலைவிகிதம்	$34,322 (54-ஆவது)
மொ.உ.உ. (பெயரளவு)	2024 மதிப்பீடு
• மொத்தம்	$6.984 பில்லியன் (161-ஆவது)
• தலைவிகிதம்	$17,287 (58-ஆவது)
ஜினி (2024)	31.3 மத்திமம்
மமேசு (2023)	0.766 உயர் · 93-ஆவது
நாணயம்	மாலத்தீவின் ருஃபியா (எம்விஆர்)
நேர வலயம்	ஒ.அ.நே+5 (MVT)
திகதி அமைப்பு	dd/mm/yyyy
அழைப்புக்குறி	+960
ஐ.எசு.ஓ 3166 குறியீடு	MV
இணையக் குறி	.mv

மாலைத்தீவுகள் (Maldives), அலுவல்பூர்வமாக மாலைத்தீவுகள் குடியரசு (Republic of Maldives) என்பது இந்தியப் பெருங்கடலில் அமைந்துள்ள தெற்காசியத் தீவுக் கூட்ட நாடு ஆகும். அரபிக் கடலின் தென்கிழக்கு எல்லைக்கு அருகில் இது அமைந்துள்ளது. இந்தியா மற்றும் இலங்கையிலிருந்து தென்மேற்கே மாலைத்தீவுகள் அமைந்துள்ளது. ஆசியக் கண்டத்தின் முதன்மை நிலத்திலிருந்து சுமார் 750 கிலோமீட்டர்கள் தொலைவில் இந்நாடு அமைந்துள்ளது. வடக்கில் இகவந்திபோலு பவளத்தீவு முதல் தெற்கே அட்டு பவளத்தீவு வரை புவியின் நில நடுக் கோட்டின் நெடுகில் அமைந்திருக்கும் 26 பவளத்தீவுகளின் ஒரு தொடர்ச்சி மாலைத்தீவுகள் ஆகும்.

ஆசியாவின் மிகச் சிறிய நாடு மாலைத்தீவுகள் ஆகும். இதன் நிலப்பரப்பளவானது வெறும் 298 சதுர கிலோமீட்டர்கள் ஆகும். ஆனால், இந்நாடு தோராயமாக கடலின் 90,000 சதுர கிலோமீட்டர் பரப்பளவில் பரவியுள்ளது. இந்நாட்டின் நிலப் பரப்பளவு தமிழ்நாட்டின் நிலப் பரப்பளவில் வெறும் 0.23% ஆக உள்ளது. நிலப்பரப்பளவில் மிகவும் சிதறிக் கிடக்கும் உலகின் இறையாண்மையுள்ள நாடுகளில் ஒன்றாக இது இந்நாட்டை ஆக்குகிறது. 2022 மக்கள் தொகைக் கணக்கெடுப்பில் 5,15,132 பேர் என்ற மக்கள் தொகையுடன் இது ஆசியாவில் இரண்டாவது மிகக் குறைந்த மக்கள் தொகையுடைய நாடாகவும், நிலப்பரப்பளவில் ஒன்பதாவது மிகச் சிறிய நாடாகவும், ஆனால் மிக அடர்த்தியான மக்கள் தொகையுடைய நாடுகளில் ஒன்றாகவும் உள்ளது. மாலைத்தீவுகள் கடல் மட்டத்திற்கு மேலே சராசரியாக சுமார் 1.5 மீட்டர் தரைநிலை உயரத்தைக் கொண்டுள்ளது. இந்நாட்டின் மிக உயர்ந்த புள்ளியானது வெறும் 2.4 மீட்டர்கள் உயரத்தில் அமைந்துள்ளது. உலகின் மிகத் தாழ்வான நிலப்பரப்பில் அமைந்துள்ள நாடுகளில் ஒன்றாக இது இந்நாட்டை ஆக்குகிறது. சில ஆதாரங்களானவை இந்நாட்டின் மிக உயர்ந்த சிகரமாக 5.1 மீட்டர்கள் உயரத்தில் அமைந்துள்ள வில்லிங்கிலி மலையைக் குறிப்பிடுகின்றன.

மாலே இந்நாட்டின் தலைநகரமாகவும், அதிக மக்கள் தொகையுடைய நகரமாகவும் திகழ்கிறது. பாரம்பரியமாக இது "மன்னரின் தீவு" என்றழைக்கப்படுகிறது. இங்கு தான் பண்டைக் கால அரசமரபுகள் தமது மைய அமைவிடத்திலிருந்து ஆட்சி செய்தன. மாலைத்தீவுகளில் 2,500 ஆண்டுகளுக்கும் மேலாக மக்கள் வாழ்ந்து வருகின்றனர். பொ. ஊ. சுமார் 947-ஆம் ஆண்டு வாக்கில் அரேபியப் பயணிகள் இத்தீவுகளுக்கு வருகை புரியத் தொடங்கிய போது வெளிப்புற உலகத்துடனான இந்நாட்டின் ஆவணப்படுத்தப்பட்ட தொடர்பானது தொடங்கியது. 12-ஆம் நூற்றாண்டில் இந்தியப் பெருங்கடலில் வணிகர்களாக அரேபியர் மற்றும் பாரசீகரின் முக்கியத்துவமானது ஒரு பங்குக் காரணமாக இருந்ததால் மாலைத்தீவுக் கூட்டத்தை இசுலாம் அடைந்தது. மாலைத் தீவுகளானவை சீக்கிரமே ஒரு சுல்தானகமாக நிலை நிறுத்தப்பட்டன. ஆசியா மற்றும் ஆப்பிரிக்காவுடன் வலிமையான வணிக மற்றும் பண்பாட்டுத் தொடர்புகளை வளர்த்தன. 16-ஆம் நூற்றாண்டின் நடுப்பகுதி முதல் ஐரோப்பியக் குடியேற்ற சக்திகளின் அதிகரித்து வந்த தாக்கத்தின் கீழ் இப்பகுதி வந்தது. 1887-இல் ஒரு பிரித்தானியப் பாதுகாப்புப் பகுதியாக மாலைத்தீவுகள் உருவானது. 1965-இல் ஐக்கிய இராச்சியத்திடமிருந்து சுதந்திரத்தை இந்நாடு பெற்றது. தேர்ந்தெடுக்கப்பட்ட உறுப்பினர்களைக் கொண்ட மக்களின் மச்லீசு என்ற நாடாளுமன்றத்துடன் 1968-இல் ஓர் அதிபராட்சிக் குடியரசானது இந்நாட்டில் நிறுவப்பட்டது. தொடர்ந்து வந்த தசாப்தங்களானவை அரசியல் நிலையற்ற தன்மை, சனநாயகச் சீர்திருத்தத்திற்கான முயற்சிகள், காலநிலை மாற்றம் மற்றும் கடல் நீர் மட்டம் உயருவதால் ஏற்படும் சுற்றுச்சூழல் சவால்கள் ஆகியவற்றைக் கண்டன. தெற்காசிய நாடுகளின் பிராந்தியக் கூட்டமைப்பை (தெ. நா. பி. கூ.) நிறுவிய ஓர் உறுப்பினராக மாலத்தீவுகள் உருவானது.

மீன்பிடிப்பானது வரலாற்று ரீதியாக ஆதிக்கம் மிகுந்த பொருளாதாரச் செயல்பாடாக இந்நாட்டில் உள்ளது. இன்னும் இந்நாட்டில் இரண்டாவது மிகப் பெரிய துறையாக இது உள்ளது. இந்நாட்டில் துரிதமாக வளர்ந்து வரும் சுற்றுலாத் துறைக்கு அடுத்த இடத்தில் இது உள்ளது. மனித மேம்பாட்டுச் சுட்டெண்ணில் மாலைத் தீவுகள் "உயர்ந்த" நிலையில் தரப்படுத்தப்பட்டுள்ளது. தெ. நா. பி. கூ. நாடுகளை விடப் பெருமளவுக்கு அதிகமான தனி நபர் வருமானத்தை இந்நாடு கொண்டுள்ளது. உலக வங்கியானது மாலைத்தீவுகளை ஓர் உயர்-நடு வருமானப் பொருளாதாரம் என்று வகைப்படுத்தியுள்ளது.

ஐக்கிய நாடுகள் அவை, நாடுகளின் பொதுநலவாயம், இசுலாமிய ஒத்துழைப்பு அமைப்பு, கூட்டுசேரா இயக்கம் ஆகிய அமைப்புகளில் ஓர் உறுப்பினராகவும், சாங்காய் ஒத்துழைப்பு அமைப்பில் ஒரு பேச்சுவார்த்தைக் கூட்டாளியாகவும் மாலைத்தீவுகள் திகழ்கிறது. இந்நாட்டின் மனித உரிமை மீறல்கள் மற்றும் சனநாயகப் பின்னிறக்கம் ஆகியவற்றுக்காகப் பொதுநலவாய அமைப்பிலிருந்து வெளியேற்றப்படலாம் என அச்சுறுத்தப்பட்டதற்குப் பிறகு அக்டோபர் 2016-இல் இந்நாடு தற்காலிகமாகப் பொதுநலவாயத்திலிருந்து விலகியது. சீர்திருத்தத்திற்கான ஆதாரங்கள் மற்றும் சனநாயகச் செயல்பாடுகள் ஆகியவற்றைச் செய்ததற்குப் பிறகு 1 பெப்பிரவரி 2020 அன்று பொதுநலவாயத்தில் இந்நாடு மீண்டும் சேர்த்துக் கொள்ளப்பட்டது.

பெயர்க் காரணம்

தொன்மங்களின் படி, மாலைத்தீவுகளின் முதல் குடியிருப்பாளர்கள் தெய்வீக்கள் என்றழைக்கப்பட்ட மக்கள் ஆவர். மாலைத்தீவுகளின் முதல் இராச்சியமானது தீவா மாரி இராச்சியம் என்று அறியப்பட்டது. பொ. ஊ. மு. மூன்றாம் நூற்றாண்டின் போது தூதுக்குழுவினர் வருகை புரிந்த போது மாலைத்தீவுகளானது தீவ மகால் என்று அறியப்பட்டதாகக் குறிக்கப்பட்டுள்ளது.

அண். 1100-1166 ஆகிய ஆண்டுகளுக்கு இடையில் மாலைத்தீவுகளானது தீவ குதா என்றும் குறிப்பிடப்பட்டுள்ளது. மாலைத்தீவுகளின் ஒரு பகுதியாக இருந்த இலட்சத் தீவுக் கூட்டமானது அந்நேரத்தில் அறிஞரும், பல்துறை நிபுணருமான அல்-பிருனியால் தீவ கன்பார் என்று குறிப்பிடப்பட்டுள்ளது.

மாலைத்தீவுகள் என்ற பெயரானது சமசுகிருதத்தில் माला மாலா (பூ மாலை) மற்றும் द्वीप த்வீபா (தீவு), அல்லது சிங்களத்தில் මාල දිවයින மாலா திவைனா ("கழுத்து மாலைத் தீவுகள்") என்ற பெயர்களிலிருந்தும் கூட தருவிக்கப்பட்டிருக்கலாம் என்று கருதப்படுகிறது. மாலைத்தீவு மக்கள் திவேஹின் என்றழைக்கப்பட்டனர். தீப் (தொல் வழக்கான திவேகி, சமசுகிருத द्वीप, த்வீபா உடன் தொடர்புடையது) என்ற சொல்லின் பொருள் "தீவு" மற்றும் திவேஸ் (திவேஹின்) என்ற சொல்லின் பொருள் "தீவுக்காரர்கள்" (அதாவது மாலைத்தீவர்) என்பதாகும். தமிழில் "தீவுகளின் பூ மாலை" என்பது மாலைத்தீவு என்று மொழிபெயர்க்கப்படலாம்.

இலங்கைக் கால வரிசை நூலான மகாவம்சமானது பாளி மொழியில் மஹிளதீவா ("பெண்களின் தீவு", महिलादिभ) என்றழைக்கப்படும் ஒரு தீவைப் பற்றிக் குறிப்பிடுகிறது. இச்சொல் அநேகமாகப் "பூ மாலையைக்" குறிக்கும் சமசுகிருதச் சொல்லின் தவறான மொழி பெயர்ப்பிலிருந்து உருவாகியிருக்கலாம் என்று கருதப்படுகிறது.

அமெரிக்காவின் கோல்பி கல்லூரியில் பொருளாதாரப் பேராசிரியரான சான் கோகெந்தோர்ன் "தீவுகளின் பூ மாலை" என்ற பொருளுடைய மாலத்வீபா (मालाद्वीप) என்ற சமசுகிருதச் சொல்லிலிருந்து மாலைத்தீவுகள் என்ற பெயரானது தருவிக்கப்பட்டிருக்கலாம் என்ற கோட்பாட்டை முன் வைக்கிறார். மலையாளத்தில் "தீவுகளின் பூ மாலையானது" மாலத்வீபூ (മാലദ്വീപ്) என்று மொழி பெயர்க்கப்படலாம். கன்னடத்தில் "தீவுகளின் பூ மாலை" என்பது மாலேத்வீபா (ಮಾಲೆದ್ವೀಪ) என்று மொழி பெயர்க்கப்படலாம். இத்தகைய எந்தப் பெயர்களும் எந்தவொரு இலக்கியத்திலும் குறிப்பிடப்படவில்லை. எனினும், வேத காலத்திற்குக் காலமிடப்படும் செவ்வியல் சமசுகிருத நூல்களானவை "இலட்சத்தீவுகளை" (லக்சத்வீபா) என்று குறிப்பிடுகின்றன. ஆனால், மாலைத்தீவுகளை மட்டும் உள்ளடக்கி இல்லாமல் இலட்சத்தீவுகள், அமினிதிவித் தீவுகள், மினிக்காய் தீவு, சாகோசு தீவுக் குழுக்கள் ஆகியவற்றையும் உள்ளடக்கியிருந்த ஒரு பொதுவான பெயர் இலட்சத்தீவுகள் ஆகும்.

இப்னு பதூதா போன்ற நடுக்கால முசுலிம் பயணிகள் இத்தீவுகளை மஹால் தீபியத் (محل ديبية) என்றழைத்தனர். மஹால் என்ற அரேபியச் சொல்லின் பொருள் "அரண்மனை" என்பதாகும். மாலை என்ற பெயரை இந்த பர்பர் பயணி எவ்வாறு புரிந்து கொண்டார் என்பதன் வடிவம் இதுவாக இருக்க வேண்டும். இவர் முசுலிம் வட இந்தியா வழியாகப் பயணித்திருந்தார். அப்பகுதியில் பாரசீக/அரேபியச் சொற்களானவை உள்நாட்டுச் சொற்தொகுதிக்குள் அறிமுகப்படுத்தப்பட்டிருந்தன. மாலைத்தீவுகளின் அரசின் சின்னத்தில் சுருள் ஆவணம் மீது தற்போது பொறிக்கப்பட்டுள்ள பெயர் இதுவாகும். மாலைத்தீவுகளுக்கான செவ்வியல் பாரசீக/அரேபியப் பெயரானது தீபஜத் ஆகும். டச்சுக்காரர்கள் இத்தீவுகளை மால்தீவிஸ்ச்சே ஐலேண்டன் என்று குறிப்பிட்டனர். அதே நேரத்தில், பிரித்தானியர் இத்தீவுகளுக்கான உள்நாட்டுப் பெயரை முதலில் "மால்டீவ் ஐலேண்ட்ஸ்" எனவும், பிறகு "மால்டீவ்ஸ்" என்றும் ஆங்கிலமயமாக்கினர்.

1563-இல் பதிப்பிக்கப்பட்ட ஓர் உரையாடல் நூலில் கார்சியா டி ஒர்ட்டா என்ற எழுத்தாளர் "பிறர் கூறியதன் மூலம் கேட்டறிந்ததை உங்களிடம் நான் கண்டிப்பாகக் கூற வேண்டும். பூர்வகுடிகள் இந்நாட்டை மால்தீவா என்று அழைக்கவில்லை. நாலேதீவா என்றழைக்கின்றனர். மலபார் மொழியில், நாலே என்பதன் பொருள் நான்கு, தீவா என்பதன் பொருள் தீவு என்பதாகும். எனவே, இந்த மொழியில் இச்சொல்லானது நான்கு தீவுகளைக் குறிக்கிறது. அதே வேளையில் இப்பெயரை மாற்றி நாம் மால்தீவா என்றழைக்கிறோம்" என்று குறிப்பிட்டார்.

மாலைத்தீவு மக்கள் திவேகி மொழியில் இந்நாட்டுக்குக் கொடுத்துள்ள உள்நாட்டுப் பெயர் திவேஹி ராஜ்ஜே (ދިވެހިރާއްޖެ) என்பதாகும்.

வரலாறு

முதன்மைக் கட்டுரை: மாலத்தீவின் வரலாறு

பண்டைய வரலாறும், குடியிருப்பும்

பொ. ஊ. மு. 6-ஆம் - 5-ஆம் நூற்றாண்டுகளில் நவீன கால மாலைத்தீவுகளில் இராச்சியங்களானவை ஏற்கனவே அமைந்திருந்தன என்றும், வரலாற்றுச் சான்றுகள் மற்றும் தொன்மங்களின் படி இந்நாடு 2,500 ஆண்டுகளுக்கும் மேற்பட்ட நிறுவப்பட்ட வரலாற்றைக் கொண்டுள்ளது என்றும் குறிப்பிடப்படுகிறது.

இலங்கையிலிருந்து மாலைத்தீவுகளுக்குக் குடியேறிய மக்களின் பதிவுகளை மகாவம்சமானது (பொ. ஊ. மு. 300) கொண்டுள்ளது. சோகி ஓடுகளானவை மாலைத்தீவுகளிலிருந்து கிடைக்கப் பெற்றன என்று எடுத்துக் கொண்டால் சிந்துவெளி நாகரிகத்தின் காலத்தின் போது (3,300-1,300 பொ. ஊ. மு.) மாலைத்தீவுகளில் மக்கள் வாழ்ந்திருக்க வேண்டும் என்று வரலாற்றாளர்கள் நம்புகின்றனர். இசுலாமிய காலத்திற்கு முன்னர் இந்நாட்டில் இந்து சமயம் இருந்ததைப் பல தொல்பொருட்கள் காட்டுகின்றன.

அட்டு பவளத்தீவின் மீதூவில் அல்லமா அகமது சிகாபுதீனேவால் (அல்லமா சிகாப் அல்-தீன்) அரேபிய மொழியில் 17-ஆம் நூற்றாண்டில் எழுதப்பட்ட கிதாப் பி அதர் மிது அல்-கதீமா (كتاب في آثار ميذو القديمة) (மீதூவின் பண்டைக்கால சிதிலங்கள் மீது) என்ற நூலின் படி, மாலைத் தீவுகளின் முதல் குடியிருப்பாளர்கள் தெய்வீக்கள் என்று அறியப்பட்ட மக்கள் ஆவர். இந்தியாவின் காளிபங்கானிலிருந்து இவர்கள் வந்திருந்தனர் என்று குறிப்பிடப்பட்டது. இவர்களின் வருகை எக்காலம் என்று தெரியவில்லை. ஆனால், 269-232 பொ. ஊ. மு. பேரரசர் அசோகரின் இராச்சியம் அமைந்திருந்ததற்கு முன்னர் இவர்கள் வருகை புரிந்திருந்தனர் என்று குறிப்பிடப்படுகிறது. சிகாபுதீனின் கதையானது தெற்காசியாவின் பதிவு செய்யப்பட்ட வரலாற்றுடனும், லோமாபனு என்று அறியப்பட்ட மாலைத்தீவுகளின் செப்பேடுகளுடனும் வியப்பூட்டும் முறையில் ஒத்துப் போகிறது.

மாலைத்தீவுகளின் பண்டைக்கால வரலாறானது செப்பேடுகள், பவளப்பாறை தொல்பொருட்கள் மீது செதுக்கப்பட்ட பண்டைக்கால எழுத்துமுறைகள், பாரம்பரியங்கள், மொழி, மாலைத்தீவுகளின் வெவ்வேறு இனக்குழுக்களால் கூறப்பட்டுள்ளது. சூரிய வம்சத்தைச் சேர்ந்த மாலைத்தீவுகளின் முதல் மன்னர்களின் வரலாறு பதிவு செய்யப்பட்ட மாபனன்சா செப்பேடுகளானவை முற்காலத்திலேயே தொலைந்து விட்டன.

திவி நாட்டிலிருந்து அனுப்பப்பட்ட நபர்கள் மூலம் உரோமைப் பேரரசர் சூலியனுக்கு அனுப்பப்பட்ட பரிசுப் பொருட்களை அம்மியனசு மார்சலினசால் (பொ. ஊ. 362) நான்காம் நூற்றாண்டில் எழுதப்பட்ட ஒரு பொது அறிவிப்பானது குறிப்பிடுகிறது. திவி என்ற இப்பெயரானது தெய்வீ என்ற பெயருடன் மிகவும் ஒத்ததாக உள்ளது. தெய்வீக்களே மாலைத்தீவுகளின் முதல் குடியிருப்பாளர்கள் ஆவர்.

முதல் மாலைத்தீவர்கள் எந்தவொரு தொல் பொருட்களையும் விட்டுச் செல்லவில்லை. இவர்களது கட்டடங்களானவை அநேகமாக மரம், தென்னை ஓலைகள், பிற மட்கக்கூடிய பொருட்களைக் கொண்டு உருவாக்கப்பட்டிருக்கலாம் என்று கருதப்படுகிறது. வெப்பமண்டலக் காலநிலையின் உப்பு மற்றும் காற்றில் இவை சீக்கிரமே மட்கிப் போயிருக்க வேண்டும் என்று கருதப்படுகிறது. மேலும், தலைவர்கள் நுட்பமான கற்களால் கட்டப்பட்ட அரன்மணைகளில் வாழவில்லை. இவர்களது சமயமும் பெரிய கோயில்கள் அல்லது வளாகங்களைக் கட்டமைக்க வேண்டிய தேவையைக் கொண்டிருக்கவில்லை.

அண்டைப் பகுதியான இந்தியத் துணைக்கண்டத்தின் தெற்குக் கடற்கரைகளிலிருந்து வந்த மக்களே இந்நாட்டின் முதல் குடியிருப்புவாசிகள் என்று மாலைத்தீவுகளின் வாய்வழி, மொழி, பண்பாட்டுப் பாரம்பரியங்கள் குறித்த ஒப்பீட்டு ஆய்வுகளானவை உறுதி செய்கின்றன. இதில் கிரவரு மக்களும் அடங்குவர். தலைநகரத்தை நிறுவியது, மாலேயில் மன்னராட்சி ஆகியவை குறித்த பண்டைக் காலத் தொன்மங்கள், உள்நாட்டு கிராமப்புறக் கதைகளில் இவை குறிப்பிடப்பட்டுள்ளன.

மாலைத்தீவு சமூகத்தில் திராவிட மற்றும் வட இந்தியப் பண்பாடுகளின் ஒரு வலிமையான கீழ்புறப் படுகையானது எஞ்சியுள்ளது. இந்நாட்டின் மொழியில் ஒரு தெளிவான எலு மொழி இடைப்படுகையுடன் இது காணப்படுகிறது. இது இடங்களின் பெயர்கள், உறவினர் குறித்த சொற்கள், கவிதை, நடனம், சமய நம்பிக்கைகளில் தோன்றுகிறது. வட இந்திய அமைப்பானது இலங்கையைச் சேர்ந்த தொடக்க காலச் சிங்களவரால் கொண்டு வரப்பட்டது. மலபார் மற்றும் பாண்டிய கடல் பயணம் செல்வோரின் பண்பாடானது தமிழர் மற்றும் மலபார் கடல் பயணம் செல்வோர் இத்தீவுகளில் குடியமருவதற்குக் காரணமாகியுள்ளது.

பௌத்த காலம்

இன்று வரை மாலைத் தீவுகளில் கண்டுபிடிக்கப்பட்டுள்ள மிகப் பழமையான செப்பேட்டு நூல் இசுதூ லோமபனு ஆகும். சிறீ பென்னாத்தீத்தா மகா இரதுனின் (தினேயி கலமிஞ்சா) ஆட்சிக் காலத்தின் போது திவேகி அகுரு எழுத்து முறையின் எவேலா வடிவில் பொ. ஊ. 1194-இல் எழுதப்பட்ட நூல் இதுவாகும்.

பெரும்பாலான வரலாற்று நூல்களில் வெறுமனே குறுகிய அளவில் குறிப்பிடப்பட்டிருந்தாலும் மாலைத்தீவுகளின் வரலாற்றில் 1,400 ஆண்டு கால பௌத்த காலமானது இந்நாட்டின் அடித்தளத்தை நிறுவிய முக்கியத்துவத்தைக் கொண்டுள்ளது. இக்காலத்தின் போது தான் மாலைத்தீவுகளின் பண்பாடானது வளர்ச்சியடைந்து செழித்தது. இப்பண்பாடு தான் இன்றும் எஞ்சியுள்ளது. மாலைத்தீவுகளானவை பௌத்த இராச்சியமாக இருந்த அந்த நேரத்தில் தான் மாலைத்தீவரின் மொழி, தொடக்க கால மாலைத்தீவு எழுத்துமுறைகள், கட்டடக்கலை, ஆளும் அமைப்புகள், பழக்கவழக்கங்கள், நடத்தைகள் தோன்றின.

பௌத்தமானது அநேகமாக மாலைத்தீவுகளுக்குப் பேரரசர் அசோகரின் விரிவாக்க காலத்தில் பொ. ஊ. மு. மூன்றாம் நூற்றாண்டில் பரவியது என்று கருதப்படுகிறது. 12-ஆம் நூற்றாண்டு வரை மாலைத்தீவு மக்களின் முதன்மையான சமயமாக இது இருந்தது. காசிதூவில் பண்டைக்கால பௌத்த மடாலயத்தைச் சார்ந்த தொல்லியல் சான்றானது பொ. ஊ. 205 மற்றும் 560 ஆகிய ஆண்டுகளுக்கு இடையில் காலமிடப்படுகிறது. மடாலயத்தின் தூபியின் அடித்தளங்கள் மற்றும் பிற கட்டமைப்புகளிலிருந்து அகழ்வு செய்யப்பட்ட சிப்பிப் படிமங்களைக் கதிரியக்கக் கரிமக் கணக்கெடுப்பை அடிப்படையாகக் கொண்டு இந்த ஆண்டுகள் மதிப்பிடப்பட்டுள்ளன. பண்டைக்கால மாலைத்தீவின் மன்னர்கள் பௌத்தத்தை ஊக்குவித்தனர். அதிக வளர்ச்சி அடைந்த சிற்பக்கலை மற்றும் கட்டடக்கலையின் வடிவத்தில் முதல் மாலைத்தீவு எழுத்துக்களும், கலை சார்ந்த சாதனைகளும் இக்காலத்தில் தான் நிகழ்த்தப்பட்டன. மாலைத்தீவுகளில் எஞ்சியுள்ள கிட்டத்தட்ட அனைத்து தொல்லியல் எச்சங்களும் பௌத்தத் தூபிகள் மற்றும் மடாலயங்களில் உள்ளன. இந்நாட்டில் இதுவரை கிடைக்கப் பெற்றுள்ள அனைத்து தொல்பொருட்களும் பௌத்த அம்சத்தைக் கொண்ட உருவங்களைக் காட்டுகின்றன.

இசுலாமியக் காலம்

1153-இல் (அல்லது 1193) இசுலாமுக்கு மாலைத்தீவுகளின் கடைசி பௌத்த மன்னரான தோவேமி ஏன் மதம் மாறினார் என்பதை 12-ஆம் நூற்றாண்டு வாக்கில் இந்தியப் பெருங்கடலில் வணிகர்களாக அரேபியர்களின் முக்கியத்துவமானது பகுதியளவுக்கு விளக்கலாம் என்று கருதப்படுகிறது. சுல்தான் முகம்மது அல்-அதில் என்ற முசுலிம் பட்டத்தைப் பின்பற்றத் தொடங்கிய இவர் 1932-ஆம் ஆண்டில் தேர்ந்தெடுக்கப்பட்ட சுல்தானகமாக இந்நாடு மாறும் வரை நீடித்திருந்த ஆறு இசுலாமிய அரசமரபுகளின் ஒரு தொடர்ச்சியைத் தொடங்கி வைத்தார். 1965-ஆம் ஆண்டு வரை சுல்தானின் அலுவல்பூர்வப் பட்டமானது மாண்புமிகு என்ற பாணியுடன் சேர்த்து நிலம் மற்றும் கடலின் சுல்தான், 12,000 தீவுகளின் பிரபு, மாலைத்தீவுகளின் சுல்தான் என்று இருந்தது.

ஒரு மொராக்கோ பயணியான அபு அல்-பரக்கத் யூசுப் அல்-பர்பரி என்ற பெயருடைய பயணி இந்த மதமாற்றத்தைப் பாரம்பரியமாகக் குறிப்பிட்டுள்ளார். இப்னு பதூதாவால் கூறப்பட்ட கதையின் படி ஒரு பள்ளிவாசலானது பின் வரும் பொறிப்புடன் கட்டமைக்கப்பட்டது: 'அபு அல்-பரக்கத் யூசுப் அல்-பர்பரியிடமிருந்து சுல்தான் அகமது சனுரசா இசுலாமை ஏற்றுக் கொண்டார்.' அல்-பர்பரியால் இசுலாம் பரப்பப்பட்டது குறித்த கிராமப்புறக் கதையானது இரன்னமாரி என்று பெயரிடப்பட்ட பெருங்கடல் தெய்வம் குறித்த ஒரு உள்நாட்டு நம்பிக்கை நம்பிக்கையுடன் தொடர்புடையதாக உள்ளது. இத்தொன்மத்தின் படி உள்நாட்டு மக்களிடமிருந்து ஒவ்வொரு மாதமும் ஒரு கன்னிப் பெண்ணைப் பலியிட வேண்டும் என்று இரன்னமாரி கேட்டதாகக் குறிப்பிடப்படுகிறது. இந்தப் பாரம்பரியமானது ஒரு நீண்ட காலத்திற்குப் பின்பற்றப்பட்டு வந்தது. அல்-பர்பரி மாலைத்தீவுகளுக்கு வருகை புரிந்து, உள்நாட்டு ஆட்சியாளரை மதம் மாற்ற முடிந்தது, மற்றும் இரன்னமாரி வழிபாட்டைக் கைவிட மன்னரையும், இவரது குடிமக்களையும் இணங்க வைத்தது வரை இப்பழக்கவழக்கம் இருந்ததாகக் குறிப்பிடப்படுகிறது. நார்வே தொல்லியலாளர் நோர்சுக், அந்நேரத்தில் தீவுவாசிகளால் பின்பற்றப்பட்ட பௌத்த தந்திரியச் சடங்குகள் மற்றும் நம்பிக்கைகளால் இரன்னமாரி தொன்மமானது அநேகமாக கடுமையான தாக்கத்திற்கு உள்ளாகியிருக்கலாம் என்று குறிப்பிடுகிறார்.

இப்னு பதூதா மாலைத்தீவு நூல்களை தவறாகப் படித்திருக்க வாய்ப்பிருந்துள்ளதையும் சில அறிஞர்கள் பரிந்துரைக்கின்றனர். அந்நேரத்தில், நன்றாக அறியப்பட்டிருந்த உண்மையான பாரசீகக் குறிப்புகளுக்குப் பதிலாக இந்த சேக்கின் மக்ரேபிய விளக்கத்தை வட ஆப்பிரிக்காவுக்கு என ஒரு தலைபட்சமான நிலையைக் கொண்டிருந்ததால் இவ்வாறு படித்திருக்க வாய்ப்பிருந்திருக்கலாம் என்று குறிப்பிடப்படுகிறது. பிறர் இவர் பாரசீகப் பட்டணமான தப்ரீசுவிலிருந்து வந்திருக்கலாம் என்று குறிப்பிடுகின்றனர். இராதாவல்கி மற்றும் தாரிக் போன்ற மிக நம்பத்தகுந்த உள்நாட்டு வரலாற்றுக் கால வரிசை நூல்களில் குறிப்பிடப்பட்டுள்ள விளக்கம் யாதெனில் அபு அல்-பரக்கத் யூசுப் அல்-பர்பரி என்பவர் அப்துல் பரக்கத் யூசுப் சம்சு உத்-தீன் அத்-தப்ரீசி ஆவர் என்பதாகும். இவர் உள்நாட்டளவில் தப்ரீசுகெபானு என்று அறியப்பட்டார். அரேபிய எழுத்துமுறையில் அல்-பர்பரி மற்றும் அல்-தப்ரீசி ஆகிய இரு சொற்களுமே கிட்டத்தட்ட ஒரே போல் இருக்கும். அந்நேரத்தில் இருந்து அரபு மொழியானது ஒரே மாதிரியாக உள்ள, ஒட்டு மொத்த சூழ்நிலையைக் கருத்ஹ்டில் கொள்ளும் போது மட்டுமே வேறுபடுத்தி அறியப்படக்கூடிய பல மெய்யெழுத்துக்களைக் கொண்டிருந்தது (உச்சரிப்பை விளக்குவதற்காக எழுத்துக்களுக்கு மேலோ அல்லது கீழோ புள்ளிகளை மேற்கொண்டு இடுவதன் மூலம் அக்காலத்திற்குப் பிறகு இந்நிலை மாற்றமடைந்துள்ளது. எடுத்துக்காட்டாக, நவீன அரபு மொழியில் "ப்" என்ற எழுத்தானது கீழே ஒரு புள்ளியையும், "ட்" என்ற எழுத்தானது இதே போல இருக்கும், ஆனால் மேற்கொண்டு இதற்கு மேல் இரு புள்ளிகள் இருக்கும் என்பது). "ٮوسڡ الٮٮرٮرى" என்பது "யூசுப் அத்-தப்ரீசி" அல்லது "யூசுப் அல்-பர்பரி" என்று வாசிக்கப்படலாம்.

இந்த அறிஞரின் மரியாதை செலுத்தப்படும் சமாதியானது மாலேயில் வெள்ளிக்கிழமை பள்ளிவாசலைத் தாண்டியுள்ள வீதியில் மெது சியாரய் அல்லது குக்குரு மிசுகி மைதானத்தில் தற்போது அமைந்துள்ளது. 1153-இல் முதன் முதலில் கட்டப்பட்டு, 1658-இல் மீண்டும் இது கட்டமைக்கப்பட்டது. மாலைத்தீவுகளில் மிகப் பழமையான எஞ்சியுள்ள பள்ளிவாசல்களில் இதுவும் ஒன்றாகும். இசுலாமுக்கு முன்னர் சகிலியா (அறியாமை) காலம் இருந்தது என்ற இசுலாமியக் கருத்துருவைத் தொடர்ந்து மாலைத்தீவர்களால் பயன்படுத்தப்படும் இந்நாட்டின் வரலாற்று நூல்களில் 12-ஆம் நூற்றாண்டின் முடிவில் இசுலாம் அறிமுகப்படுத்தப்பட்டதானது இந்நாட்டின் வரலாற்றின் மூலக்கல்லாகக் கருதப்படுகிறது. இருந்த போதிலும், பௌத்தத்தின் பண்பாட்டுத் தாக்கமானது இன்னும் இந்நாட்டில் தொடர்ந்து உள்ளது. 1341 மற்றும் 1345 ஆகிய ஆண்டுகளுக்கு இடைப்பட்ட ஒரு நேரத்தில் தான் ஒன்பது மாதங்கள் இங்குத் தங்கியிருந்த போது இப்னும் பதூதாவால் இந்த உண்மையானது நேரடியாக உணரப்பட்டது. இவர் இங்கு தலைமை நீதிபதியாக இருந்தார். முதலாம் ஒமரின் அரச குடும்பத்தில் திருமணமும் செய்து கொண்டார். உள்நாட்டு அரசியலில் இவர் மூழ்கத் தொடங்கினார். அரசின் கட்டுப்பாடின்றி வளர அனுமதியளித்த இந்தத் தீவு இராச்சியத்தில் இவருடைய கண்டிப்பான தீர்ப்புகளானவை இந்நாட்டின் ஆட்சியாளர்களுடன் உரசலை ஏற்படுத்தத் தொடங்கிய போது இவர் அங்கிருந்து வெளியேறினார். குறிப்பாக, இடுப்புக்கு மேலே எந்த ஓர் உடையையும் இன்றி உள்நாட்டுப் பெண்கள் இருந்ததைக் கண்டு இவர் கோபமடைந்தார். மத்திய கிழக்கு இசுலாமிய விதிகளை மீறியதாக அந்நேரத்தில் இப்பகுதியிலிருந்த இந்தப் பண்பாட்டு நடத்தையை இவர் கருதினார். இவர் புகாரளித்த போதும் உள்நாட்டு மக்கள் எந்தவிதக் கருத்தையும் எடுத்துக் கொள்ளவில்லை. இவர் வெளியேறியதற்கு இதுவும் ஒரு காரணம் என்று குறிப்பிடப்படுகிறது.

தெற்காசியாவின் பிற பகுதிகளுடன் ஒப்பிடும் போது இசுலாமுக்கு மாலைத்தீவுகள் மதம் மாறியதானது ஒப்பீட்டளவில் தாமதமாகவே நடைபெற்றது. மற்றொரு 500 ஆண்டுகளுக்கு ஒரு பௌத்த இராச்சியமாக மாலைத்தீவுகள் தொடர்ந்தது. அரபு மொழியானது (பாரசீகம் மற்றும் உருதுவுக்குப் பதிலாக) நிர்வாகத்தின் முதன்மையான மொழியாக உருவானது. சட்டங்களின் மாலிக்கி பள்ளியானது அறிமுகப்படுத்தப்பட்டது. அரபு உலகத்தின் மையத்துடன் ஒரு நேரடித் தொடர்பை இந்த இரு நிகழ்வுகளுமே மறைமுகமாக உணர்த்துகின்றன.

மத்திய கிழக்கு மாலுமிகள் 10-ஆவது நூற்றாண்டில் தான் இந்தியப் பெருங்கடல் வணிக வழிகளைக் கையிலெடுக்கத் தொடங்கியிருந்தனர். பசுராவிலிருந்து தெற்காசியாவிற்குப் பயணம் மேற்கொண்ட வணிகர்களுக்கு முதல் நிறுத்தமாக இத்தகைய வழிகளில் ஒரு முக்கியமான தொடர்பாக மாலைத்தீவுகளைக் கண்டறிந்தனர். ஆசியா முழுவதிலும், கிழக்கு ஆப்பிரிக்கக் கடற்கரையின் சில பகுதிகளிலும் பணத்தின் ஒரு வடிவமாகப் பரவலாகப் பயன்படுத்தப்பட்ட சோகி ஓடுகள் மற்றும் தேங்காய் நார் ஆகியவற்றை முதன்மையாக உள்ளடக்கியதாக இவ்வணிகம் திகழ்ந்தது. சோகி ஓடுகள் பணமாகப் பயன்படுத்தப்பட்ட வங்காள சுல்தானகமானது மாலைத்தீவுகளின் முதன்மையான வணிகக் கூட்டாளிகளில் ஒன்றாகத் திகழ்ந்தது. வங்காளம்-மாலைத்தீவுகளின் சோகி ஓட்டு வணிகமானது வரலாற்றின் மிகப் பெரிய உலகளாவிய சோகிப் பண வணிகத் தொடர்பாகத் திகழ்ந்தது.

மாலைத்தீவுகளின் மற்றுமொரு இன்றியமையாத உற்பத்திப் பொருளானது உப்புநீரைத் தாங்கும் ஆற்றலுடைய தும்பு ஆகும். உலர்த்தப்பட்ட தேங்காய் உமியின் நார் இதுவாகும். இவை ஒன்றாகத் தைக்கப்பட்டு இந்தியப் பெருங்கடலில் வழக்கமான பயணத்தை மேற்கொள்ளும் தோவ் எனும் ஒருவகைப் பாய்மரக் கப்பல்களில் கட்டப்பட்டன. மாலைத்தீவுகளின் தேங்காய் நார்களானவை சிந்து, சீனா, யெமன், பாரசீக வளைகுடா ஆகிய பகுதிகளுக்கு ஏற்றுமதி செய்யப்பட்டன.

பாதுகாப்புப் பகுதி காலம்

போர்த்துகேய இந்தியாவின் அரசப் பிரதிநிதியான டொம் கொன்சுடன்டீனோ டி பிரகன்சாவின் ஆணையின் படி, 1558-இல் மாலைத்தீவுகளில் போர்த்துகேய இருப்பானது நிறுவப்பட்டது.

1558-இல் மாலைத்தீவுகளில் ஒரு வியதோர் (வியசோவரு) அல்லது தொழிற்சாலையின் (வணிக நிலையம்) ஒரு மேற்பார்வையாளருடன் ஒரு சிறிய கோட்டைக் காவல் படையினரை போர்த்துகேயர் நிறுவினர். கோவாவிலிருந்த தங்களது முதன்மையான குடியேற்றத்திலிருந்து இவர்கள் இதை நிர்வகித்தனர். மரண அச்சுறுத்தலைக் குறிப்பிட்டு கிறித்தவத்தைக் கட்டாயப்படுத்தி ஏற்றுக் கொள்ள வைப்பதற்கான இவர்களின் முயற்சிகளானவை முகம்மது தகுருபானு அல்-ஔசம், இவரது இரு சகோதரர்கள், துவாபரு தன்டகேலே ஆகியோரால் தலைமை தாங்கப்பட்ட உள்நாட்டுக் கிளர்ச்சியைத் தூண்டியது. தன்டகேலே 15 ஆண்டுகள் கழித்துப் போர்த்துகேயரை மாலைத்தீவுகளிலிருந்து வெளியேற்றினார். இந்த நிகழ்வானது தற்போது குவாமீ துவாசு (மொ. 'தேசிய நாள்') என்று நினைவுபடுத்தப்படுகிறது. இசுலாமிய நாட்காட்டியின் மூன்றாவது மாதமான ரபி உல் அவ்வலின் முதலாம் நாளில் இவ்விழா கொண்டாடப்படுகிறது.

மாலைத்தீவுகளின் பணியாட்களைச் சித்தரிக்கும் 16-ஆம் நூற்றாண்டு போர்த்துகேய விளக்கப்படம். இது கோடிசே கசனாதேன்சு என்ற விளக்கப்படங்களின் நூலிலிருந்து எடுக்கப்பட்டுள்ளது.

நெதர்லாந்தைச் சேர்ந்த பியர்ரே மோர்ட்டியரின் 18-ஆம் நூற்றாண்டு வரைபடமானது மாலைத்தீவுகளை விளக்கமாகக் காட்டுகிறது.

இலங்கையில் ஆதிக்கம் மிக்க சக்தியாகப் போர்த்துகேயரை இடமாற்றம் செய்த டச்சுக்காரர்கள், 17-ஆம் நூற்றாண்டின் நடுப்பகுதியில் உள்நாட்டு விவகாரங்களில் நேரடியாகத் தாங்களே தலையிடாமல் மாலைத்தீவுகளின் விவகாரங்கள் மீது ஆதிக்கத்தை, நூற்றாண்டுகள் பழமையான இசுலாமியப் பழக்கவழக்கங்களின் படி நிர்வகிக்கப்பட்டு வந்த இந்நாட்டில் நிறுவினர்.

1796-இல் இலங்கையிலிருந்து டச்சுக்காரர்களை பிரித்தானியர் வெளியேற்றினர். மாலைத்தீவுகளை ஒரு பிரித்தானிய பாதுகாப்புப் பகுதியாக இணைத்தனர். ஒரு பிரித்தானிய பாதுகாப்புப் பகுதியாக அலுவல்பூர்வமாக மாலைத்தீவுகளின் நிலையானது 1887-ஆம் ஆண்டின் ஒப்பந்தத்தில் பதிவிடப்பட்டுள்ளது. இந்த ஒப்பந்தத்தில் சுல்தான் இரண்டாம் முகம்மது முயீனுதீன் மாலைத்தீவுகளின் வெளிநாட்டு உறவுமுறைகள் மற்றும் பாதுகாப்பு மீதான பிரித்தானியச் செல்வாக்கை ஏற்றுக் கொண்டார். அதே நேரத்தில், உள்நாட்டில் ஆட்சியைத் தக்க வைத்துக் கொண்டார். ஆண்டு தோறும் திறை செலுத்தியதன் மூலம் முசுலிம் பாரம்பரிய அமைப்புகளின் படி இந்நாட்டில் ஆட்சியானது ஒழுங்குபடுத்தப்பட்டதானது தொடர்ந்தது. சான்சிபார் மற்றும் துருசியல் அரசுகள் உள்ளிட்ட இந்தியப் பெருங்கடல் பகுதியில் இருந்த பிற பிரித்தானிய பாதுகாப்புப் பகுதிகளை ஒத்ததாக மாலைத்தீவுகளின் நிலை இருந்தது.

மாலைத்தீவுக் கோட்டை மற்றும் தீவுக்கூட்டங்கள் குறித்த 17-ஆம் நூற்றாண்டு போர்த்துகேய வரைபடம். அந்தோனியோ போக்கர்ரோவின் கோட்டை நூலிலிருந்து இப்படம் எடுக்கப்பட்டுள்ளது (1632).

பிரித்தானியர் காலத்தில் சுல்தானின் அதிகாரங்களை முதலமைச்சர் எடுத்துக் கொண்டார். செயலாற்றல் அற்ற சுல்தானுடன் தொடர்ந்து பணியாற்றிய பிரித்தானிய பொது ஆளுநரின் ஏமாற்றமடைந்த நிலையின் போது இவ்வாறு எடுத்துக் கொண்டார். இதைத் தொடர்ந்து ஓர் அரசியல் சட்ட முடியாட்சியை உருவாக்குவதற்குப் பிரித்தானியா ஊக்கமளித்தது. முதல் அரசியலமைப்பானது 1932-இல் இந்நாட்டில் அறிவிக்கப்பட்டது. எனினும், இந்தப் புதிய ஏற்பாடுகளானவை சுல்தானுக்கோ அல்லது முதலமைச்சருக்கோ ஆதரவாக இல்லை. மாறாக, பிரித்தானியக் கல்வி பெற்ற சீர்திருத்தவாதிகளின் ஓர் இளம் குழுவுக்கு ஆதரவாக இருந்தது. இதன் விளைவாக அரசியலமைப்புக்கு எதிராகக் கோபம் கொண்ட மக்கள் கூட்டம் தூண்டப்பட்டது. அரசியலமைப்பு நூலானது பொது இடத்தில் கிழித்தெறியப்பட்டது.

1953 வரை பிரித்தானிய அரச குடும்பத்தின் பாதுகாப்புப் பகுதியாக மாலைத்தீவுகள் தொடர்ந்தது. அந்த ஆண்டு சுல்தானகமானது தற்காலிகமாக நிறுத்தி வைக்கப்பட்டது. மொகம்மெது அமீன் தீதியின் குறுகிய காலம் நீடித்திருந்த அதிபராட்சியின் கீழ் முதல் குடியரசானது அறிவிக்கப்பட்டது. 1940-களின் போது பிரதமராகப் பணியாற்றிய நேரத்தில், தீதி மீன் ஏற்றுமதித் தொழிற்துறையைத் தேசியமயமாக்கினர். ஓர் அதிபராகக் கல்வியமைப்பைச் சீர்திருத்தியவராகவும், பெண்கள் உரிமைக்காகப் போராடியவராகவும் இவர் நினைவுபடுத்தப்படுகிறார். மாலேவிலிருந்த பழமைவாதிகள் இவரது அரசாங்கத்தை ஆட்சியிலிருந்து வெளியேற்றினர். உணவுப் பற்றாக்குறை குறித்து ஏற்பட்ட ஒரு கலவரத்தின் போது தீதி ஒரு கூட்டத்தால் தாக்கப்பட்டார். அருகிலிருந்த தீவில் இறந்தார்.

இரண்டாம் உலகப் போரின் போது அட்டு பவளத்தீவிலுள்ள ஒரு கடற்கழியின் மேட்டில் பிரித்தானியாவின் வேத்தியல் விமானப்படையின் சார்ட்டு சண்டர்லேண்டு விமானம்

1950-களில் தொடங்கி மாலைத்தீவுகளின் அரசியல் வரலாறானது இத்தீவுகளில் பிரித்தானிய இராணுவ இருப்பால் பெருமளவுக்குத் தாக்கம் பெற்றது. 1954-இல் சுல்தானகம் மீண்டும் நிறுவப்பட்டதானது முந்தைய ஆட்சியை நீடிக்கச் செய்தது. இரண்டு ஆண்டுகள் கழித்து தெற்குக்கோடி அட்டு பவளத்தீவில் வேத்தியல் விமானப்படையின் தனது போர்க்கால கேன் விமான தளத்தை மீண்டும் நிறுவும் அனுமதியை ஐக்கிய இராச்சியம் பெற்றது. நூற்றுக் கணக்கான உள்ளூர்ப் பணியாளர்களைப் பணிக்கு அமர்த்தியது. எனினும், 1957-இல் புதிய பிரதமரான இப்ராகீம் நசீர் இந்த ஒப்பந்தத்தை மறுசீராய்வு செய்வதற்கு அழைப்பு விடுத்தார். கானில் பிரித்தானிய இருப்பால் பொருளாதார ரீதியாக அனுகூலமடைந்த மூன்று தெற்குக் கோடி பவளத்தீவுகளில் உருவாகிய ஓர் உள்நாட்டுப் பிரிவினைவாத இயக்கம் 1959-இல் நசீருக்குச் சவால் விடுத்தது. இந்தக் குழுவானது மாலைத்தீவு அரசாங்கத்துடன் உறவுமுறைகளைத் துண்டித்தது. இதாதூவைத் தனது தலைநகரமாகவும், அப்துல்லா அபீபை அதிபராகவும் கொண்ட ஐக்கிய சுவாதீவுக் குடியரசு எனும் ஒரு சுதந்திரமான அரசை உருவாக்கியது. அரசின் காவல் துறையுடன் மாலேயிலிருந்து துப்பாக்கிப் படகுகளை நசீர் அனுப்பியதற்குப் பிறகு சுவாதீவுக் குடியரசானது ஓர் ஆண்டு கழித்து ஒழிக்கப்பட்டது. இடைப்பட்ட வேளையில் 1960-இல் மாலைத்தீவுகள் 30 ஆண்டுகளுக்கு கான் மற்றும் இதாதூ வசதிகள் ஆகிய இரண்டையுமே தொடர்ந்து பயன்படுத்த ஐக்கிய இராச்சியத்திற்கு அனுமதியளித்தது. மாலைத்தீவுகளின் பொருளாதார வளர்ச்சிக்கு 1960 - 1965 வரை £7.50 இலட்சமானது இதற்குப் பதிலாக நிதியாகக் கொடுக்கப்பட்டது. சூயசு கால்வாய்க்குக் கிழக்கே நிரந்தரமாக நிலைநிறுத்தப்பட்டிருந்த படைகளைத் திரும்பப் பெறும் பெரிய பிரித்தானிய திரும்பப் பெறுதலின் ஒரு பகுதியாக இந்தத் தளமானது 1976-இல் மூடப்பட்டது.

சுதந்திரமும், குடியரசும்

பிரித்தானியர் அதிகரித்து வந்த நிலையாக ஆசியாவில் தங்களது குடியேற்றப் பிடிப்பைத் தொடர்ந்து தக்க வைத்துக் கொள்ள இயலாதவராக, சுதந்திரத்தை விரும்பிய பூர்வகுடி மக்களிடம் தங்களது குடியேற்றங்களை இழந்த போது 26 சூலை 1965 அன்று சுல்தானுக்காக பிரதமர் இப்ராகீம் நசீர் இரன்னபந்தேய்ரி கிலேகேபன் மற்றும் பிரித்தானிய அரசாங்கத்துக்காக மாலைத்தீவுகளுக்கான பிரித்தானியத் தூதராக அறிவிக்கப்பட்டிருந்த சர் மைக்கேல் வால்க்கர் ஓர் ஒப்பந்தத்தில் கையொப்பமிட்டனர். மாலத்தீவுகளின் பாதுகாப்பு மற்றும் வெளியுறவு விவகாரங்களில் பிரித்தானிய அதிகாரத்தை இது அலுவல்பூர்வமாக முடிவுக்குக் கொண்டு வந்தது. இவ்வாறாக, இத்தீவுகளானவை சுதந்திரத்தை அடைந்தன. கொழும்புவிலிருந்த பிரித்தானிய உயர் ஆணையரின் வீட்டில் இதற்கான விழா ஒன்று நடைபெற்றது. இதற்குப் பிறகு சுல்தானகமானது மற்றொரு மூன்று ஆண்டுகளுக்கு சர் முகம்மது பரீத் தீதியின் கீழ் தொடர்ந்தது. சுதந்திரன் அடைந்த போது இவர் தன்னைத் தன்னை மன்னனாக அறிவித்துக் கொண்டார்.

மாலைத்தீவுகளின் சுல்தானின் கொடி

26 சூலை 1965 அன்று பிரித்தானியருடன் சுதந்திர ஒப்பந்தத்தில் கையொப்பமிடும் பிரதமர் இப்ராகீம் நசீர்.

15 நவம்பர் 1967 அன்று மாலைத்தீவுகள் ஓர் அரசியலமைப்பு முடியாட்சியாகத் தொடர வேண்டுமா அல்லது ஒரு குடியரசாக மாற வேண்டுமா என்பதைத் தீர்மானிப்பதற்காக நாடாளுமன்றத்தில் ஒரு வாக்கெடுப்பானது நடத்தப்பட்டது. நாடாளுமன்றத்தின் 44 உறுப்பினர்களில் குடியரசுக்கு ஆதரவாக 40 பேர் வாக்களித்தனர். 15 மார்ச்சு 1968 அன்று இக்கேள்வி குறித்து ஒரு தேசிய அளவிலான பொது வாக்கெடுப்பு நடத்தப்பட்டது. இதில் வாக்களித்த 93.34% பேர் குடியரசை நிறுவுதற்கு விருப்பம் தெரிவித்து வாக்களித்தனர். 11 நவம்பர் 1968 அன்று குடியரசானது அறிவிக்கப்பட்டது. இவ்வாறாக 853 ஆண்டுகள் பழமையான முடியாட்சியானது முடிவுக்குக் கொண்டு வரப்பட்டது. அதிபராக இப்ராகீம் நசீருக்குக் கீழான ஒரு குடியரசால் இந்த முடியாட்சியானது இடம் மாற்றப்பட்டது.

1970-இன் தொடக்கம் வாக்கில் இந்தத் தீவுக் கூட்டத்தில் சுற்றுலாத் துறையானது வளர்ச்சியடையத் தொடங்கியது. மாலைத்தீவுகளின் முதல் விடுமுறைப் போக்கிடமான குறும்பா மாலைத்தீவுகள் எனும் இடமாகும். 3 அக்டோபர் 1972 அன்று தனது முதல் விருந்தினர்களை இது வரவேற்றது. முதல் துல்லியமான மக்கள் தொகைக் கணக்கெடுப்பானது திசம்பர் 1977-இல் நடத்தப்பட்டது. மாலைத்தீவுகளில் 1,42,832 பேர் வாழ்கின்றனர் என்பதை இது காட்டியது.

1970-களின் போது நசீரின் பிரிவினர் மற்றும் பிற அரசியல் தலைவர்களுக்கு இடையிலான அரசியல் உட்சண்டையானது பிரதமராகத் தேர்ந்தெடுக்கப்பட்ட அகமது சகி 1975-இல் கைது செய்யப்படுவதற்கும், ஒரு தொலைதூரப் பவளத் தீவிற்கு வெளியேற்றப்படுவதற்கும் காரணமானது. கானிலிருந்த பிரித்தானிய விமானத் தளத்தை மூடியது மற்றும் இந்நாட்டின் முதன்மையான ஏற்றுமதியான கருவாடுகளுக்கான சந்தை வீழ்ச்சியடைந்தது ஆகியவற்றைத் தொடர்ந்து பொருளாதார வீழ்ச்சியானது ஏற்பட்டது. தனது நிர்வாகத்திற்கான ஆதரவானது வீழ்ச்சியடைந்து கொண்டிருந்த போது 1978-இல் கருவூலத்திலிருந்த தசம இலட்சக் கணக்கான டாலர்களுடன் சிங்கப்பூருக்கு நசீர் தப்பியோடினார்.

1978-இல் மாமூன் அப்துல் கயூம் அதிபராகத் தனது 30 ஆண்டு கால பதவியைத் தொடங்கினார். எதிர்ப்பின்றி ஆறு முறை தொடர்ச்சியாகத் தேர்தல்களில் வென்றார். ஏழ்மையான தீவுகளை வளர்ச்சியடைய வைக்க மாமூன் கொடுத்த முக்கியத்துவம் காரணமாக அரசியல் நிலைத்தன்மை மற்றும் பொருளாதார வளர்ச்சிக்கான ஒரு காலத்தை இவர் தேர்தலில் வெற்றி பெற்றதானது தொடங்கியதாகப் பார்க்கப்படுகிறது. சுற்றுலாவானது செழித்து வளர்ந்தது. அதிகரித்த அயல்நாட்டுத் தொடர்புகளானவை வளர்ச்சிக்குத் தூண்டுதலாக அமைந்தன. எனினும், மாமூனின் ஆட்சியானது சர்ச்சைக்குரியதாக இருந்தது. சுதந்திரத்தை மட்டுப்படுத்தியது மற்றும் தான் விரும்பிய நபர்களை அரசியல் ரீதியாகத் தேர்ந்தெடுக்கும் முறையைப் பின்பற்றியது ஆகியவற்றின் மூலம் எதிர்ப்பை ஒடுக்கிய ஒரு சர்வாதிகரியாக மாமூன் திகழ்ந்ததாக சில விமர்சகர்கள் குறிப்பிடுகின்றனர்.

நசீரின் ஆதரவாளர்கள் மற்றும் வணிக விருப்பங்களால் ஒரு தொடர்ச்சியாக நடத்தப்பட்ட ஆட்சிக் கவிழ்ப்பு முயற்சிகளானவை (1980, 1983, 1988-இல்) அரசாங்கத்தைக் கவிழ்ப்பதை வெற்றியின்றி முயற்சித்தன. முதல் இரு முயற்சிகளானவை சிறிதளவே வெற்றியைப் பெற்ற அதே நேரத்தில், 1988-ஆம் ஆண்டின் ஆட்சிக் கவிழ்ப்பு முயற்சியில் தமிழீழ மக்கள் விடுதலைக் கழகத்தின் தோராயமாக 80 பேரைக் கொண்ட படையானது ஈடுபட்டது. இப்படை விமான நிலையத்தைக் கைப்பற்றியது. 1,600 இந்தியத் துருப்புக்கள் தலையிட்டு விமானங்கள் மூலம் மாலேவுக்குள் தரையிறக்கப்பட்டு மாலேயின் ஒழுங்கை மீண்டும் நிலைநாட்டும் வரை, ஒரு வீட்டிலிருந்து மற்றொரு வீட்டிற்குத் தப்பியோடும் நிலைக்கு மாமூன் தள்ளப்பட்டார்.

நவம்பர் 1988 ஆட்சிக் கவிழ்ப்பு முயற்சிக்கு வணிகரான இப்ராகீம் லுத்பீ மற்றும் மாலைத்தீவுகளின் முன்னாள் முதல் பெண்மணியான பசுனா அகமதின் தந்தையான சிக்கா அகமது இசுமாயில் மாணிக் ஆகியோர் தலைமை தாங்கினர். அன்றைய தேசிய பாதுகாப்புப் படைகளால் தாக்குதல் நடத்தியவர்கள் தோற்கடிக்கப்பட்டனர். 3 நவம்பர் 1988 அன்று இரவில் ஆக்ராவிலிருந்து வான்குடை மிதவைப் படையணிக் குழுவை இந்திய வான்படையானது விமானங்களில் ஏற்றியது. 2,000 கிலோமீட்டர்களுக்கும் அதிகமான தூரத்திற்குப் பறந்து மாலைத்தீவுகளில் அவர்களை இறக்கியது. இந்திய ஆயுதப்படைகள் மாலைத்தீவுகளை அடைந்த அந்நேரம் வாக்கில் எம்வி புரக்ரசு லைட் என்ற கடத்தப்பட்ட கப்பலில் கழகப் படையினர் ஏற்கனவே மாலேயிலிருந்து புறப்பட்டிருந்தனர். இந்திய வான்குடைப் பதாதி குல்குலேவில் இறங்கியது. விமானத் தளத்தைப் பாதுகாக்கப்பட்ட நிலைக்குக் கொண்டு வந்தது. சில மணி நேரங்களுக்குள்ளாகவே மாலேயில் அரசாங்க ஆட்சியை மீண்டும் நிறுவியது. சப்பாத்திக்கள்ளி நடவடிக்கை என்று பெயரிடப்பட்ட இந்த குறுகிய கால நடவடிக்கையானது இந்தியக் கடற்படையையும் உள்ளடக்கியதாக இருந்தது. சரக்குக் கப்பலான எம்வி புரக்ரசு லைட்டைக் கைப்பற்றுவதிலும், பிணையக் கைதிகளையும், குழுவையும் மீட்பதிலும் இந்திய கடற்படை உதவி புரிந்தது.

21-ஆம் நூற்றாண்டு

இந்தியப் பெருங்கடல் நிலநடுக்கத்தைத் தொடர்ந்து 26 திசம்பர் 2004 அன்று ஏற்பட்ட சுனாமியால் மாலைத் தீவுகள் அழிவுக்கு உட்படுத்தப்பட்டன. வெறும் ஒன்பது தீவுகள் மட்டுமே எந்தவித வெள்ளத்திலிருந்தும் தப்பித்தன என்று குறிப்பிடப்பட்டது. அதே நேரத்தில், 57 தீவுகளின் இன்றியமையாத உட்கட்டமைப்புக்குக் கடுமையான சேதம் ஏற்பட்டது. 14 தீவுகளிலிருந்து மக்கள் முழுவதுமாக வெளியேற்றப்பட்டனர். ஆறு தீவுகளானவை அழிந்தன. சுனாமி சேதம் காரணமாக மேற்கொண்ட 21 விடுமுறைப் போக்கிடத் தீவுகளானவை மூடப்படும் நிலைக்குத் தள்ளப்பட்டன. ஒட்டு மொத்த சேதமானது ஐஅ$400 மில்லியன் (₹2,860.6 கோடி)-க்கும் அதிகமான அமெரிக்க டாலர்கள் அல்லது மொத்த உள்நாட்டு உற்பத்தியில் சுமார் 62% என்று மதிப்பிடப்பட்டது. 102 மாலைத்தீவரும், ஆறு வெளிநாட்டவரும் சுனாமியில் இறந்தனர் என்று குறிப்பிடப்பட்டது. தாழ் நிலையில் உள்ள தீவுகள் மீதான அழிவை ஏற்படுத்திய அலைகளின் தாக்கமானது, அலைகள் உயரத்தை அடைய எந்தவொரு கண்டப்பகுதி நிலமோ அல்லது பெரிய நிலப்பரப்போ இல்லை என்ற உண்மையால் சேதம் குறைவாகவே ஏற்பட்டது. இந்நாட்டில் ஏற்பட்ட மிக உயரமான அலைகள் 4.3 மீட்டர் உயரத்துக்கு இருந்தன என்று குறிப்பிடப்பட்டது.

மாலைத்தீவுகளின் அட்டு நகரத்தில் 17-ஆவது தெ. நா. பி. கூ. உச்சி மாநாடு

மாமூனின் பிந்தைய பாதி ஆட்சியின் போது மாலைத்தீவுகளில் சுதந்திரமான அரசியல் இயக்கங்கள் தோன்றின. இவை அப்போது ஆளுங்கட்சியாக இருந்த திவேகி இராயித்துங்கே கட்சிக்குச் (மாலைத்தீவு மக்கள் கட்சி), சனநாயகச் சீர்திருத்தங்களுக்குக் கோரிக்கை வைத்தன. எதிர்ப்புப் பத்திரிகையாளரும், செயல்பாட்டாளருமான முகம்மது நசீது 2003-இல் மாலைத்தீவு சனநாயகக் கட்சியைத் தொடங்கினார். படிப்படியான அரசியல் சீர்திருத்தங்களுக்கு அனுமதியளிக்குமாறு மாமூனுக்கு அழுத்தம் கொடுத்தார். 2008-இல் ஒரு புதிய அரசியலமைப்புக்கு இசைவு தெரிவிக்கப்பட்டது. முதல் நேரடி அதிபர் தேர்தல்கள் நடத்தப்பட்டன. இதில் இரண்டாவது சுற்றில் நசீத்தால் இத்தேர்தல்களில் வெல்ல முடிந்தது. முந்தைய அரசாங்கத்தால் விட்டுச் செல்லப்பட்ட பெரும் கடன், 2004 சுனாமியைத் தொடர்ந்து ஏற்பட்ட பொருளாதார வீழ்ச்சி, உள்நாட்டுப் பணத்தை (மாலைத்தீவின் ருஃபியா) அதிகமாக அச்சடித்ததைப் பயன்படுத்தி நடந்த அதிகப்படியான செலவீனங்கள், வேலைவாய்ப்பின்மை, இலஞ்ச ஊழல், அதிகரித்து வந்த போதைப் பொருள் பயன்பாடு உள்ளிட்ட பல சவால்களை இவரது நிர்வாகம் எதிர் கொண்டது. நாட்டில் முதல் முறையாக பொருட்கள் மீது வரி விதிக்கப்பட்டது. பல பொருட்கள் மற்றும் சேவைகள் மீதான இறக்குமதி வரிகளானவை குறைக்கப்பட்டன. 65 ஆண்டுகள் அல்லது அதற்கு அதிக வயதுடையோர், ஒற்றைப் பெற்றோர்கள், சிறப்புத் தேவை உடையவர்கள் ஆகியோருக்கு அனைவருக்குமான சுகாதார காப்பீடு (ஆசந்தா) மற்றும் சமூகநலத் திட்டங்களானவை செயல்படுத்தப்பட்டன.

இசுலாமைப் பாதுகாக்கிறோம் என்ற பெயரில் எதிர்க் கட்சிகளின் செயல்பாடுகளைத் தொடர்ந்து 2011-ஆம் ஆண்டின் பிந்தைய பகுதியில் சமூக மற்றும் அரசியல் அமைதியின்மையானது அதிகரித்தது. பெப்பிரவரி 2012-இல் பெரும் எண்ணிக்கையிலான காவல்துறையினரும், இராணுவத்தினரும் கிளர்ச்சி செய்ததைத் தொடர்ந்து நசீத் சர்ச்சைக்குரிய வகையில் இராசினாமா செய்தார். நசீத்தின் துணை அதிபரான மொகம்மெது வகீத் அசன் மாணிக் அதிபராகப் பதவியேற்றுக் கொண்டார். பிறகு நசீத் கைது செய்யப்பட்டார். தீவிரவாதக் குற்றச்சாட்டுக்காக 13 ஆண்டுகள் சிறை தண்டனை பெற்றார். இந்த விசாரணையானது பரவலாக தவறுகளுடையதாகவும், அரசியல் காரணமுடையதாகவும் பார்க்கப்பட்டது. விசாரணையின்றி சிறையில் வைப்பது குறித்த ஐநா செயல்பாட்டுக் குழுவானது நசீதை உடனடியாக விடுவிக்க வேண்டும் என்று அழைப்பு விடுத்தது.

2013 மாலைத்தீவு அதிபர் தேர்தல் முடிவுகளில் கடுமையான போட்டி ஏற்பட்டது. முதலாம் சுற்றில் பெரும்பாலான வாக்குகளை முன்னாள் அதிபர் நசீத் பெற்றார். பன்னாட்டுத் தேர்தல் பார்வையாளர்கள் இத்தேர்தல் குறித்த நேர்மறையான மதிப்பீட்டைக் கொடுத்த போதும் இந்நாட்டின் உச்ச நீதிமன்றமானது இதை செல்லாததாக்கியது. மறு வாக்கு எண்ணிக்கையில் முந்தைய அதிபர் மாமூனின் ஒன்றுவிட்ட சகோதரரான அப்துல்லா யாமீன் அதிபராக வெற்றி பெற்றார். 2015-ஆம் ஆண்டின் பெப்பிரவரியில் ஒரு அரசியல் கொலை முயற்சியிலிருந்து யாமீன் தப்பித்தார். மக்களின் மச்லீசு எனும் நாடாளுமன்றத்தில் ஒரு நம்பிக்கையில்லாத் தீர்மானத்திற்குப் பிறகு துணை அதிபர் மொகம்மெது சமீல் அகமது அலுவலகத்திலிருந்து நீக்கப்பட்டார். எதிர்க் கட்சிகளுடன் சேர்ந்து சதி செய்ததாகவும், கலவரங்களுக்குத் திட்டமிட்டதாகவும் இவர் மீது ஆதாரம் இல்லாவிட்டாலும் குற்றம் சுமத்தப்பட்டிருந்தது. துணை அதிபர் அகமது அதீப்பின் கையாட்களுக்கு எதிராக அரசாங்கம் தொடங்கிய ஒரு பரவலான ஒடுக்குமுறைகளுக்குப் பிறகு அதீப் தன்னுடைய 17 ஆதரவாளர்களுடன் "பொது ஒழுங்கிற்குக் குந்தகம் விளைவித்ததாகக்" கூறப்பட்டு கைது செய்யப்பட்டார். திட்டமிடப்பட்ட அரசாங்க எதிர்ப்புப் பேரணிக்கு முன்னதாக பிறகு ஓர் அவசர நிலையானது அறிவிக்கப்பட்டது. நாடாளுமன்றமானது அதீப்பை நீக்கும் பணியை முடுக்கி விட்டது.

2018 தேர்தலில் இப்ராகிம் முகமது சாலி பெரும்பாலான வாக்குகளைப் பெற்று வென்றார். நவம்பர் 2018-இல் மாலைத்தீவுகளின் புதிய அதிபராகப் பதவியேற்றார். தீவிரவாதம் மற்றும் ஊழல் குற்றச்சாட்டுகள் காரணமாக இவர் மீது குற்றம் சுமத்தப்பட்டதற்குப் பிறகு சூலை 2019-இல் மாலேயில் அதீப் நீதிமன்றங்களால் விடுவிக்கப்பட்டார். அரசு வழக்கறிஞர் ஓர் இலஞ்ச ஊழல் மற்றும் கருப்புப் பணத்தை வெள்ளையாக்கிய வழக்கில் கொடுக்கப்பட்ட ஆணைக்கு எதிராக மேல்முறையீடு செய்ததற்குப் பிறகு இவர் வெளிநாடுகளுக்குச் செல்வதற்குத் தடை விதிக்கப்பட்டது. ஓர் இழுவை நீராவிப்படகில் ஏறித் தப்பித்ததன் மூலம் இந்தியாவிற்கு வந்து இவர் அடைக்கலம் வேண்டினார். முன்னாள் அதிபர் அப்துல்லா யாமீன் கருப்புப் பணத்தை வெள்ளையாக்கிய குற்றச்சாட்டுக்காக நவம்பர் 2019-இல் ஐந்து ஆண்டுகள் சிறை தண்டனை பெற்றார். சனவரி 2021-இல் உயர் நீதிமன்றமானது இந்த சிறைத் தண்டனையை உறுதி செய்தது. எனினும், உச்ச நீதிமன்றமானது நவம்பர் 2021-இல் யாமீனின் மீதான குற்றச்சாட்டை செல்லாததாக்கியது.

2023 மாலைத்தீவு அதிபர் தேர்தலில் மக்கள் தேசியக் காங்கிரசு கட்சியின் வேட்பாளரான முகமது முயிசு இரண்டாவது சுற்று வாக்கெடுப்பில் வென்றார். அப்போதைய அதிபரான இப்ராகிம் சாலியை 54% வாக்குகளைப் பெற்றுத் தோற்கடித்தார். 17 அக்டோபர் 2023 அன்று மாலைத்தீவுகள் குடியரசின் எட்டாவது அதிபராக முகமது முயிசு பதவியேற்றார். முகமது முயிசு பரவலாக சீன ஆதரவாளராகப் பார்க்கப்படுகிறார். இந்தியாவுடனான உறவு முறைகள் இவர் ஆட்சியில் நன்முறையில் இல்லை. 2024-இல் தன்னுடைய 11 ஆண்டு காலக் குற்றச்சாட்டிலிருந்து முன்னாள் அதிபர் அப்துல்லா யாமீன் அப்துல் கயூம் விடுவிக்கப்பட்டார். உயர் நீதிமன்றமானது ஒரு புதிய விசாரணைக்கு ஆணையிட்டது.

புவியியல்

26 பவளத்தீவுகள் ஓர் இரட்டைச் சங்கிலி போல் குழுப்படுத்தப்பட்ட 1,192 பவழப்பாறைத் தீவுகளை மாலைத்தீவுகள் உள்ளடக்கியுள்ளது. வடக்கிலிருந்து தெற்காக 871 கிலோமீட்டர்கள் நீளத்திலும், கிழக்கிலிருந்து மேற்காக 130 கிலோமீட்டர்கள் அகலத்திலும் இவை விரிவடைந்துள்ளன. தோராயமாக 90,000 சதுர கிலோமீட்டர்கள் பரப்பளவில் இவை விரிவடைந்துள்ளன. இதில் வெறும் 298 சதுர கிலோமீட்டர்கள் மட்டுமே நிலமாகும். உலகின் மிகச் சிதறுண்ட நாடுகளில் ஒன்றாக இது இந்நாட்டை ஆக்குகிறது. அட்சரேகைகள் 1°தெற்கு மற்றும் 8°வடக்கு, தீர்க்கரேகைகள் 72°கிழக்கு மற்றும் 74°கிழக்கு ஆகியவற்றுக்கு இடையில் இந்நாடு அமைந்துள்ளது. பவளத்தீவுகளானவை உயிருடைய பவளப்பாறைகள் மற்றும் மணல் திட்டுகளால் உருவாகியுள்ளன. இந்தியப் பெருங்கடலின் ஆழங்களிலிருந்து திடீரென உயர்ந்து வடக்கிலிருந்து தெற்காக அமைந்துள்ள 960 கிலோமீட்டர்கள் நீளமுடைய, நீரில் மூழ்கிய ஒரு கடலடி மலைத் தொடரின் மேல் இந்நாடு அமைந்துள்ளது.

விண்வெளியிலிருந்து பார்க்கப்படும் மாலோசமதுலு பவளத்தீவு. வடக்கு மாலோசமதுலு பவளத்தீவையும், தெற்கு மாலோசமதுலு பவளத்தீவையும் இந்தப் புகைப்படத்தில் காணலாம்.

கார் மேகங்கள் கடுமையான மழைப் பொழிவைக் கொண்டு வருகின்றன. பருவமழைக் காலத்தில் இது ஒரு பொதுவான காட்சியாக உள்ளது.

மாலைத்தீவுகளின் பரப்பளவிலுள்ள நீர் வழியாக இந்தியப் பெருங்கடலின் ஒரு புறத்திலிருந்து மற்றொரு புறத்திற்குச் செல்ல இரு திறந்த வழிகளானவை, இந்த இயற்கைப் பவளப்பாறைத் தடுப்புகளின் தெற்கு முடிவுக்கு அருகில் மட்டுமே பாதுகாப்பான கப்பல் பயணத்திற்கு அனுமதியளிக்கின்றன. நிர்வாகத் தேவைகளுக்காக மாலைத்தீவு அரசாங்கமானது இந்த பவளத்தீவுகளை 21 நிர்வாகப் பிரிவுகளாகப் பிரித்துள்ளது. மாலைத்தீவுகளின் மிகப்பெரிய தீவு கான் ஆகும். இது லாமு பவளத்தீவு அல்லது கக்தும்மதி மாலைத்தீவைச் சேர்ந்ததாகும். அட்டு பவளத்தீவில் மேற்குக் கோடித் தீவுகளானவை பாறை மீது இடப்பட்ட சாலைகள் மூலம் இணைக்கப்படுகின்றன. இச்சாலைகள் ஒட்டு மொத்தமாக இணைப்புச் சாலை என்றழைக்கப்படுகின்றன. இந்தச் சாலையின் ஒட்டு மொத்த நீளம் 14 கிலோமீட்டர்கள் ஆகும்.

உலகிலேயே கடல் மட்டத்திலிருந்து தாழ்ந்த உயரத்தில் அமைந்துள்ள நாடு மாலைத்தீவுகளாகும். கடல் மட்டத்திலிருந்து அதிகபட்ச மற்றும் சராசரி இயற்கை நில மட்டங்களாக முறையே வெறும் 2.4 மீட்டர்கள் மற்றும் 1.5 மீட்டர்களை இந்நாடு கொண்டுள்ளது. எனினும், எங்கெல்லாம் கட்டமைப்புகள் இருக்கின்றனவோ அப்பகுதியிலெல்லாம் இந்த உயரமானது பல மீட்டர்களாக அதிகரிக்கப்பட்டுள்ளது. இந்நாட்டின் நிலப்பரப்பில் 80%-க்கும் அதிகமான நிலப்பரப்பானது பவளப்பாறைத் தீவுகளால் உருவாகியுள்ளது. இவை கடல் மட்டத்திற்கு மேலே ஒரு மீட்டருக்கும் குறைவான உயரத்தில் தான் உள்ளன. இதன் விளைவாக, அதிகரிக்கும் கடல் நீர் மட்டங்கள் காரணமாக நீரில் மூழ்கும் அபாயத்தில் மாலைத்தீவுகள் உள்ளது. தற்போதைய விகிதத்தில் கடல் நீர் மட்ட உயர்வானது அதிகரித்தால் பொ. ஊ. 2,100-ஆம் ஆண்டு வாக்கில் மாலைத்தீவுகளை குடியிருக்க இயலாததாக ஆக்கப் போதிய அளவுக்கு இருக்கும் என பருவநிலை மாற்றத்துக்கான பன்னாட்டு அரசுக் குழு எச்சரிக்கை விடுத்துள்ளது.

காலநிலை

பாதலா தீவின் ஒரு கடற்கரை

கோப்பென் காலநிலை வகைப்பாட்டின் கீழ் மாலைத்தீவுகள் வெப்பமண்டல பருவமழைக் காலநிலையைக் கொண்டதாக வகைப்படுத்தப்பட்டுள்ளது. இந்நாட்டின் வடக்கிலுள்ள தெற்காசியாவின் பெரிய நிலப்பரப்பால் இது தாக்கம் பெற்றுள்ளது. உலகில் எந்த ஒரு நாட்டையும் விட கடல் மட்டத்திலிருந்து உள்ள மிகக் குறைவான உயரத்தை மாலைத்தீவுகள் கொண்டுள்ளதன் காரணமாக இந்நாட்டின் வெப்பநிலையானது தொடர்ந்து வெப்பமானதாகவும், பொதுவாக ஈரப்பதமுடையதாகவும் உள்ளது. இந்த நிலப்பரப்பின் இருப்பானது நிலமும், நீரும் வேறுபட்ட வகையில் வெப்பமடைவதற்குக் காரணமாகியுள்ளது. இந்தியப் பெருங்கடலிலிருந்து ஈரப்பதம் அதிகமாக உள்ள காற்றை இக்காரணிகள் தெற்காசியாவுக்கு வேகமாக அனுப்புகின்றன. இதன் விளைவாகத் தென்மேற்குப் பருவக்காற்று உருவாகிறது. குளிர் கால வடகிழக்குப் பருவமழையுடன் தொடர்புடைய வறண்ட பருவம், கடுமையான புயல்களைக் கொண்டு வரும் தென்மேற்குப் பருவ மழையுடன் தொடர்புடைய மழைக் காலம் என மாலைத்தீவுகளின் காலநிலை மீது இரு பருவங்கள் ஆதிக்கம் செலுத்துகின்றன.

வறண்ட வடகிழக்குப் பருவ மழையிலிருந்து ஈரப்பதமுடைய தென்மேற்குப் பருவமழைக்கான மாற்றமானது ஏப்பிரல் மற்றும் மே மாதங்களுக்கு இடையில் இந்நாட்டில் நடைபெறுகிறது. இக்காலத்தின் போது தென்மேற்குக் காற்றுகளானவை தென்மேற்குப் பருவமழை உருவாவதற்குப் பங்களிக்கின்றன. சூன் மாதத்தின் தொடக்கத்தில் மாலைத்தீவுகளை தென்மேற்குப் பருவமழை அடைகிறது. நவம்பர் முடிவு வரை நீடிக்கிறது. எனினும், மாலைத்தீவுகளின் காலநிலைப் பாங்குகளானவை தெற்காசியாவின் பருவமழை காலநிலைப் பாங்குகளை அனைத்து நேரத்திலும் பின்பற்றி நடப்பதில்லை. இந்நாட்டின் வடக்கில் வருடாந்திர மழைப்பொழிவு சராசரியாக 254 செ. மீ.களாகவும், தெற்கில் 381 செ. மீ.களாகவும் உள்ளது.

மாலைத்தீவின் தெற்குப் பகுதியை விட வடக்குப் பகுதியில் பருவமழையின் தாக்கமானது அதிகமாக உள்ளது. இவையும் நிலநடுக் கோட்டு கடல் நீரோட்டங்களால் அதிகமாக தாக்கத்திற்கு உள்ளாகின்றன.

சராசரி உயர் வெப்பநிலையானது 31.5° செல்சியசாகவும், சராசரி தாழ்ந்த வெப்பநிலையானது 26.4° செல்சியசாகவும் உள்ளது.

தட்பவெப்ப நிலைத் தகவல், மாலே (1981–2010 வழக்கமான அளவு)
மாதம்	சன	பிப்	மார்	ஏப்	மே	சூன்	சூலை	ஆக	செப்	அக்	நவ	திச	ஆண்டு
உயர் சராசரி °C (°F)	30.3 (86.5)	30.7 (87.3)	31.4 (88.5)	31.6 (88.9)	31.2 (88.2)	30.6 (87.1)	30.5 (86.9)	30.4 (86.7)	30.2 (86.4)	30.2 (86.4)	30.1 (86.2)	30.1 (86.2)	30.61 (87.1)
தினசரி சராசரி °C (°F)	28.0 (82.4)	28.3 (82.9)	28.9 (84)	29.2 (84.6)	28.8 (83.8)	28.3 (82.9)	28.2 (82.8)	28.0 (82.4)	27.8 (82)	27.8 (82)	27.7 (81.9)	27.8 (82)	28.2 (82.8)
தாழ் சராசரி °C (°F)	25.7 (78.3)	25.9 (78.6)	26.4 (79.5)	26.8 (80.2)	26.3 (79.3)	26.0 (78.8)	25.8 (78.4)	25.5 (77.9)	25.3 (77.5)	25.4 (77.7)	25.2 (77.4)	25.4 (77.7)	25.8 (78.4)
மழைப்பொழிவுmm (inches)	114.2 (4.496)	38.1 (1.5)	73.9 (2.909)	122.5 (4.823)	218.9 (8.618)	167.3 (6.587)	149.9 (5.902)	175.5 (6.909)	199.0 (7.835)	194.2 (7.646)	231.1 (9.098)	216.8 (8.535)	1,901.4 (74.858)
% ஈரப்பதம்	78.0	77.0	76.9	78.1	80.8	80.7	79.1	80.5	81.0	81.7	82.2	80.9	79.7
சராசரி பொழிவு நாட்கள் (≥ 1.0 mm)	6	3	5	9	15	13	12	13	15	15	13	12	131
சூரியஒளி நேரம்	248.4	257.8	279.6	246.8	223.2	202.3	226.6	211.5	200.4	234.8	226.1	220.7	2,778.2
Source #1: உலக வானிலையியல் அமைப்பு
Source #2: தேசியப் பெருங்கடல், வளிமண்டல நிர்வாகம் (ஒப்பீட்டளவிலான ஈரப்பதமும், வெயிலும் 1961–1990)

கடல் நீர்மட்டம் உயர்தல்

மாலைத்தீவுகளின் 1,190 பவளப்பாறைத் தீவுகளில் 80%-க்கும் அதிகமானவை கடல் மட்டத்திற்கு மேலே ஒரு மீட்டருக்கும் குறைவான உயரத்தில் தான் அமைந்துள்ளன. உலகிலேயே மிகத் தாழ்ந்த உயரத்தில் உள்ள நாடாக இது இந்நாட்டை ஆக்குகிறது. கடல் நீர்மட்டம் உயருதலால் ஏற்படும் இடர்வாய்ப்புகளுக்குக் குறிப்பாக இந்நாடு உள்ளாகக் கூடியதாக உள்ளது. நாசா புவிக் கண்காணிப்பகமானது உலகளாவிய கடல் நீர் மட்டமானது ஆண்டுக்கு 3 - 4 மி. மீ.கள் என்று உயர்வதாக மதிப்பிட்டுள்ளது. அமெரிக்காவின் தேசியப் பெருங்கடல், வளிமாண்டல நிர்வாகமானது 20-ஆம் நூற்றாண்டிலிருந்து வருடாந்திர கடல் நீர்மட்ட உயர்வு வீதமானது இரு மடங்காகியுள்ளதாக மதிப்பிட்டுள்ளது. 2006 முதல் 2015 வரையிலான ஆண்டுகளில் ஒவ்வொரு ஆண்டிற்கும் 0.06 இஞ்ச் முதல் 0.14 இஞ்ச் என்று அதிகரித்துள்ளதாகக் குறிப்பிட்டுள்ளது. 2022-இல் மாலைத்தீவுகளில் அசாதாரணமான கடல் நீர்மட்ட உயரும் நிகழ்வை ஆய்வு செய்த சர்னல் கோசுடல் பியூச்சர்சு எனும் இதழில் பதிப்பிக்கப்பட்ட ஓர் ஆய்வானது வழக்கமாக ஒவ்வொரு 25 ஆண்டுகளுக்கும் நடைபெறும் மட்டுமீறிய வெள்ளங்களானவை கடல் நீர்மட்ட அதிகரிப்பு காரணமாக அடிக்கடி நிகழக்கூடியவையாக மாறவும், அழிவு ஏற்படுத்தக்கூடியவையாகவும் இருக்கும் என்று கண்டுபிடித்தது. சௌத்தாம்டன் பல்கலைக்கழகத்தைச் சேர்ந்த ஆராய்ச்சியாளர்கள் மக்கள் தொகையின் சதவிகிதமாக, காலநிலை மாற்றத்தால் ஏற்படும் வெள்ளம் காரணமாக மூன்றாவது மிக அருகிய தீவு நாடாக மாலத்தீவுகள் உள்ளது என்று குறிப்பிடுகின்றனர்.

2020-இல் மாலைத்தீவுகள் மற்றும் மார்சல் தீவுகளைக் கண்காணித்த பிளைமௌத் பல்கலைக்கழகத்தின் ஒரு மூன்றாண்டு ஆய்வானது, நிலப்பரப்பின் உயரத்தை உருவாக்குவதற்காக படுகை மணலை அலைகள் நகர்த்துகின்றன மற்றும் இந்தப் பதில் வினையானது அதிகரிக்கும் கடல் நீர் மட்டத்திற்கு ஏற்றவாறு தாழ்ந்த நிலையில் உள்ள தீவுகளுக்கு உதவும் எனவும், தீவுகளை வாழத்தக்கவையாகத் தக்க வைக்கும் எனவும் பரிந்துரைத்தது. அதிகரிக்கும் கடல் நீர் மட்டத்திற்கு ஏற்ப மாறிக் கொள்ளும் தீவுகளின் ஆற்றலைக் கடல் சுவர்களானவை ஆபத்தான நிலைக்கு உள்ளாக்குவதாகவும், கடல் சுவர்கள் போன்ற கடற்கரை அமைப்புகளுடைய தீவுகளுக்கான ஒரு தவிர்க்க முடியாத விளைவாக தீவு மூழ்குவது அமையும் என்றும் இந்த ஆய்வு குறிப்பிட்டது. ஆசிய-பசிபிக் பகுதியில் ஐக்கிய நாடுகளின் உணவு மற்றும் வேளாண்மை அமைப்பில் பணியாற்றும் இயற்கை வள அதிகாரியான இதேகி கனமரு என்பவர் அதிகரிக்கும் கடல் நீர்மட்டச் சவால்களை எவ்வாறு தீவு நாடுகள் சரி செய்யலாம் என்பதற்கான ஒரு "புதிய கண்ணோட்டத்தை" இந்த ஆய்வு கொடுத்ததாகக் குறிப்பிட்டார். தங்களது சொந்த உயரத்தை அதிகரிப்பதன் மூலம் அதிகரிக்கும் கடல் நீர்மட்டங்களுக்கு இயற்கையாக இத்தீவுகள் தகவமைத்துக் கொண்டாலும், இன்னும் மனிதர்கள் புவி வெப்பமாதலைச் சரி செய்யவும், தீவு மக்கள் தொகைகளைப் பாதுகாப்பதற்காகவும் இரு மடங்கு செயல்பாடுகளைச் செய்ய வேண்டும் எனவும் குறிப்பிட்டார்.

2008-இல் அப்போதைய அதிபர் நசீத் இந்தியா, இலங்கை, ஆத்திரேலியாவில் உயர் மட்டத்தில் உள்ள பகுதிகளில் நிலம் வாங்குவது குறித்த திட்டங்களை கடல் மட்ட உயர்வுக்கு எதிரான ஒரு காப்பீட்டுக் கொள்கையாக அறிவித்தார். அதிபர் தன்னுடைய நோக்கங்களை "நாங்கள் மாலைத்தீவுகளை விட்டு வெளியேற விரும்பவில்லை. ஆனால், தசாப்தங்களுக்கு முகாம்களில் காலநிலை அகதிகளாக வாழ்வதையும் விரும்பவில்லை" என்று விளக்கினார். எனினும், இந்தத் திட்டங்களானவை என்றுமே செயல்பாட்டுக்கு வரவில்லை. பின் வந்த தலைவர்கள் இத்திட்டத்திற்கு மாற்றாக நாட்டின் தற்போதைய தீவுகளுக்குக் கடல் சுவர்கள் அமைப்பது மற்றும் உயர்ந்த தரையில் புதிய தீவுகளைக் கட்டமைப்பது ஆகியவற்றை வலுவூட்டுவதற்கான வழியைத் தேர்ந்தெடுத்தனர்.

2009 பன்னாட்டு காலநிலைப் பேச்சுவார்த்தைகளில் நசீத் குறிப்பிட்டதாவது:

புதைபடிவ எரிபொருட்களிலிருந்து மாற்று வழியைத் தேர்ந்தெடுப்போம் என்பது எங்களுக்கான சரியான செயல் மட்டுமல்ல... இது எங்களின் பொருளாதார சுயசார்புக்கான வழியாகவும் உள்ளது; முன்னோடி நாடுகள் அயல்நாட்டு கச்சா எண்ணெய்யின் ஊகிக்க இயலாத விலை மாற்றங்களிலிருந்து தங்களை விடுவித்துக் கொள்ளும். எதிர் காலத்தின் புதிய பசுமைப் பொருளாதாரத்தைப் பயன்படுத்தி இவை நிதி உருவாக்கும். இவர்களின் அறநெறி நிலையை மேம்படுத்துவதானது உலக அரங்கில் அதிகப்படியான அரசியல் செல்வாக்கை இந்நாடுகளுக்குக் கொடுக்கும்.

2012-ஆம் அண்டில் முன்னாள் அதிபர் நசீத் "தற்போதைய வேகத்தில் கரியமில வாயு வெளியீடுகளானவை அதிகரித்தால், என் நாடு இன்னும் ஏழு ஆண்டுகளில் நீருக்குள் மூழ்கும்" என்று குறிப்பிட்டார். அமெரிக்கத் தொலைக்காட்சி நிகழ்ச்சிகளான த டெய்லி சோ, லேட் சோ வித் தாவீது லெட்டர்மன், ஆகியவற்றில் கலந்து கொண்ட போது காலநிலை மாற்ற விளைவுகளைக் குறைக்கும் செயல்பாடுகளை அதிகரிப்பதற்கு அழைப்பு விடுத்தார். காலநிலை மாற்றங்களால் ஏற்படும் அச்சுறுத்தல்கள் குறித்த விழிப்புணர்வை ஏற்படுத்துவதற்காக 2009-இல் இவர் "கடலுக்கடியில் உலகின் முதல் அமைச்சரவைக் கூட்டத்தை" நடத்தினார். நசீதுக்கு முந்தைய அதிபரான மாமூன் அப்துல் கயூமாலும் கடல் நீர்மட்ட உயர்வு குறித்த கவலைகள் வெளிப்படுத்தப்பட்டன.

சுற்றுச்சூழல்

கடல் நீர்மட்டம் உயர்தல் தவிர்த்து மோசமான குப்பை அப்புறப்படுத்தல் மற்றும் மணற்கொள்ளை உள்ளிட்டவை பிற சுற்றுச்சூழல் பிரச்சனைகளாக உள்ளன. மாலைத்தீவுகளானவை ஒப்பீட்டளவில் தூய்மையாகவும், தீவுகளில் சிறிதளவு குப்பையே காணப்பட்டாலும் இந்நாட்டிலுள்ள பெரும்பாலான கழிவு மேலாண்மை தளங்களானவை தரம் குறைவானவையாக உள்ளன. மாலைத்தீவுகளில் உள்ள மாலே மற்றும் அருகிலுள்ள விடுமுறைப் போக்கிடங்களிலிருந்து வரும் குப்பைகளில் பெரும்பாலானவை திலாபுசியில் அப்புறப்படுத்தப்படுகின்றன. ஒரு கடற்கழியின் உச்சியில் அமைந்துள்ள ஒரு தொழிற்துறைத் தீவு இதுவாகும். தலைநகரம் மற்றும் அதைச் சுற்றியிருந்த தீவுகளைப் பாதித்த குப்பை வேணும் பிரச்சனைகளைத் தீர்ப்பதற்காக 90-களின் தொடக்கத்தில் மீட்டெடுக்கப்பட்ட நிலம் இதுவாகும்.

மாலைத்தீவுகளின் காலநிலை மாற்றம், சுற்றுச்சூழல் மற்றும் எரிசக்தி அமைச்சகம், மற்றும் சுற்றுச்சூழல் பாதுகாப்பு முகமை ஆகியவற்றால் 31 பாதுகாக்கப்பட்ட பகுதிகளானவை நிர்வகிக்கப்படுகின்றன.

கடல் சுற்றுச்சூழல் அமைப்பு

மாலைத்தீவுகளின் மென்மையான பவளப்பறை

வடக்கு மாலே பவளத்தீவின் மீரு தீவிலுள்ள கிழக்கு சுவீட்லிப்சு (பிளேக்தோரின்சுசு விட்டாடுசு) எனும் மீனினம்

பல்வேறு பவளங்கள், 2,000-க்கும் மேற்பட்ட மீன் இனங்கள், உயிரியல் மற்றும் வணிக முக்கியத்துவத்தைக் கொண்ட அரிதான உயிரினங்கள் உள்ளிட்ட பன்முகத் தன்மையுடையடல் உயிரினங்களை மாலைத் தீவுகளைச் சுற்றியுள்ள நீர்ப் பகுதிகளானவைக் கொண்டுள்ளன. இதில் சூரை மீன் பிடிக்கும் இடங்களானவை ஒரு நீண்ட காலம் நீடித்துள்ள பாரம்பரிய வளத்தைப் பிரதிநிதித்துவப்படுத்துகின்றன. பாலமீன் (சானோசு சானோசு) மற்றும் பல்வேறு சிறிய இனங்கள் போன்ற நன்னீர் மீனினங்களானவை குட்டைகள், சதுப்பு நிலங்கள், பிற வரம்புக்குட்பட்ட நன்னீர் வாழ்விடங்களில் பெருகுகின்றன. 1970-களில் ஐக்கிய நாடுகள் அவையின் ஒரு முகமையானது திலாப்பியாவை அறிமுகப்படுத்துவதற்கு உதவி புரிந்தது.

ஆழ்கடல், ஆழம் குறைவான கடற்கரை, பவளப்பாறை சுற்றுச்சூழல் அமைப்பு, ஓரமாக உள்ள அலையாத்தித் தாவரங்கள், சதுப்பு நிலங்கள், வறண்ட நிலம் உள்ளிட்ட பல்வேறு வாழ்விடங்களை மாலைத்தீவுகள் கொண்டுள்ளன. 187 பவள இனங்களானவை பவளப்பாறைகளை இந்நாட்டில் உருவாக்குகின்றன. இந்தியப் பெருங்கடலில், இப்பகுதியில் மட்டும், 1,100 மீன் இனங்கள், ஐந்து கடலாமை இனங்கள், 21 திமிங்கலம் மற்றும் ஓங்கில் இனங்கள், 400 மெல்லுடலி இனங்கள், 83 முட்தோலி இனங்கள் காணப்படுகின்றன. 120 துடுப்புக்கால் பூச்சி இனங்கள், 15 பன்முகக்காலிகள், மேலும் 145-க்கும் மேற்பட்ட நண்டு மற்றும் 48-க்கும் மேற்பட்ட சென்னாக்கூனி இனங்கள் உள்ளிட்ட பல்வேறு ஓட்டுடலி இனங்களையும் இப்பகுதி கொண்டுள்ளது.

கோளமீன், புசிலியர் மீன் (நடுமுள் துடுப்புள்ள மீன்), பாரை மீன், சேவல்கோழி மீன், கிழக்கு சுவீட்லிப்சு, பவளப்பாறை சுறாக்கள், களவாக்கள், விலாங்குகள், கொண்டல்கள், கீட்டோடொன்டைடீ, ஓக்கோசெபாலிடே, திமில் தலை பெருந்திரளை, வலுவாடிகள், தேள் மீன், கல் இறால்கள், வயிற்றுக்காலி மெல்லுடலிகள், கடல் தேவதை மீன், கீட்டோடொன்டைடீ, அணில் மீன், சோல்ச்சர் மீன், கண்ணாடி மீன், முள்வால் வகையி, ஒருகோட்டு மீன், கிளாத்தி, நெப்போலியன் பெருந்திரளை, சீலா உள்ளிட்டவை இப்பகுதியில் பிரதிநிதித்துவப்படுத்தப்பட்டுள்ள பல கடல் மீன் குடும்பங்களாக உள்ளன.

மிதவைவாழி உயிரினங்கள் மற்றும் திமிங்கலச் சுறாக்கள் போன்ற உயிரினங்களை உள்ளடக்கிய பல்வேறு கடல் சுற்றுச்சூழல் அமைப்புகளுக்குத் தாயகமாக இந்த பவளப் பாறைகளானவை உள்ளன. இங்குக் காணப்படும் பஞ்சுயிரிகளின் ஐந்து இனங்களானவை கட்டி-எதிர்ப்பு மற்றும் புற்றுநோய்-எதிர்ப்பு அம்சங்களை வெளிக் காட்டியுள்ளன.

1998-இல் ஓர் ஒற்றை எல் நினோ மெய்ம்மை நிகழ்வின் காரணமாக ஏற்பட்ட 5° செல்சியசு வரையிலான கடல் நீர் வெப்பநிலை உயர்வானது பவளப்பாறைகள் அழிக்கப்படுவதற்குக் காரணமானது. தேசத்தின் பவள நீரடித் திட்டுக்களில் மூன்றில் இரு பங்கைக் கொன்றது.

நீரடித் திட்டுக்கள் மீண்டும் வளர்ச்சியடைவதைத் தூண்டுவதற்காக விஞ்ஞானிகள் கடல் நீர் மட்டத்திற்குக் கீழே 20 - 60 அடிகளுக்கு இடைப்பட்ட ஆழத்தில் மின்னூட்டம் கொண்ட கூம்புகளை பல பகுதிகளில் அமைத்தனர். பவளப் புழுக்கள் ஒட்டிக் கொள்வதற்காக ஓர் இடைப் படுகையை இது அளித்தது. 2004-இல் விஞ்ஞானிகள் பவளங்கள் மீண்டும் வளர்வதைக் கண்டனர். கவனிக்கப்படாத பவளங்களைக் காட்டிலும் இந்த மின்னூட்டப்பட்ட பவளங்களின் வளர்ச்சியானது ஐந்து மடங்கு வேகமாக நடைபெற்றது. விஞ்ஞானி அசீசு அக்கீம் குறிப்பிட்டதாவது:

1998-க்கு முன்னர் இந்த நீரடித் திட்டுக்களானவை இறக்கும் என்று நாங்கள் என்றுமே நினைக்கவில்லை. இந்த விலங்குகள் அங்கு இருக்கும், இந்த நீரடித் திட்டானது என்றும் நிலைத்திருக்கும் என்பதை நாங்கள் சாதாரணமாக எடுத்துக் கொண்டோம். இவை இந்த இடத்தில் எப்போதுமே நிலைத்திருக்கும் என்ற எண்ணத்தை மாற்றியதாக எல் நினோவானது எங்களுக்கு ஒரு விழிப்படையும் அழைப்பைக் கொடுத்தது. இது மட்டுமில்லாமல் இவை வெப்பமண்டலப் புயல்கள், வெள்ளங்கள், சுனாமிகளுக்கு எதிராக ஓர் இயற்கைத் தடுப்பாக உள்ளன. இறந்த பவலப் பாறைகளின் கூடுகளில் கடல் களைகள் வளர்கின்றன.

— 

2016-இல் மீண்டும் மாலைத்தீவுகளின் பவளப்பாறை நீரடித் திட்டுக்களானவை ஒரு கடுமையான அழிவு நிகழ்வைக் கண்டன. சில தீவுகளைச் சுற்றியிருந்த பவளங்களில் 95% வரையிலானவை இறந்தன. ஆறு மாதங்களுக்குப் பிறகும் கூட இளம் பவளங்கள் 100% இறந்தன. 2016-இல் கடல் மட்ட நீரின் வெப்ப நிலைகளானவை அது வரை இல்லாத உச்ச அளவாக மே மாதத்தில் 31° செல்சியசை அடைந்தன.

அண்டை பவளத்தீவுகளுக்கு இடையில் விலங்குகளின் ஒருங்கமைவானது பெருமளவுக்கு மாறுபடலாம் என்று சமீபத்திய அறிவியல் ஆய்வுகள் பரிந்துரைக்கின்றன. குறிப்பாக, பெருங்கடல் ஆழத்திலுள்ள உயிரினங்களின் வகையில் இது மாறுபடலாம். மீன் பிடித்தலால் ஏற்படும் அழுத்தங்கள் (கள்ள வேட்டையாடுதல் உள்ளிட்டவை) ஆகியவற்றின் வகையில் ஏற்படும் வேறுபாடுகளானவை இதற்குக் காரணமாக இருக்கலாம் என்று கருதப்படுகிறது.

காட்டுயிர்

கடிகாரச் சுற்றாக மேல் இடது புறமிருந்து: வாவு பவளத்தீவிற்கு அருகில் மஞ்சள்-பழுப்பு கம்பளச் சுறாக்கள், அட்டு நகரத்தில் ஓடத்துறை, சிறிய பச்சைக் கொக்கு, வெட்சி இனங்கள்.

தீவுகள், நீரடித்திட்டுகள், சுற்றியுள்ள பெருங்கடல் ஆகியவற்றின் தாவரவளம் மற்றும் விலங்குவளம் ஆகியவற்றை உள்ளடக்கியதாக மாலைத்தீவுகளின் காட்டுயிர்கள் உள்ளன. வடக்கிலிருந்து தெற்காகத் தேய்மானம் அடையும் ஒரு வடிவமைப்பைப் பின்பற்றியதாக பவளத்தீவுகளுக்கு இடையிலான உயிரினங்களானவை பெருமளவுக்கு வேறுபடுகின்றன என சமீபத்திய அறிவியல் ஆய்வுகள் பரிந்துரைக்கின்றன. ஆனால், அண்டை பவளத்தீவுகளுக்கு இடையிலான முக்கியமான வேறுபாடுகளும் கண்டுபிடிக்கப்பட்டுள்ளன. குறிப்பாக, கடல் விலங்குகளைப் பொறுத்த வரையில், சட்டத்திற்குப் புறம்பான வேட்டையாடுதல் உள்ளிட்ட மீன்பிடித் தொழிலின் அழுத்தங்களில் உள்ள மாறுபாடுகளுடன், இது தொடர்புடையதாக இருக்கலாம் என்று கருதப்படுகிறது.

வரம்புக்குட்பட்ட நில ஆதாரங்கள் மீது விரிவான வளர்ச்சித் திட்டங்களானவை விரைவாக ஆக்கிரமிப்பதால் ஏற்படும் ஒரு முக்கியமான அச்சுறுத்தலை எதிர் கொண்டதாக மாலைத்தீவுகளின் நில வாழ்விடங்கள் உள்ளன. ஒரு காலத்தில் அடிக்கடி வருகை புரியப்படாத, முன்னர் மக்கள் வாழாத் தீவுகளானவை தற்போது அழியும் நிலையில் உள்ளன. மக்களால் கிட்டத்தட்ட தொடப்படாத இடங்களாக இவை இருந்தன. செறிவான வளர்ச்சியின் சமீபத்திய தசாப்தங்களின் போக்கில், ஏராளமான பூர்வகுடி உயிரினங்களுக்கு இன்றியமையாததாக இருந்த ஏராளமான இயற்கைச் சுற்றுச் சூழல்களானவை கடுமையான அருகிய நிலை அல்லது மொத்தமாக அழிக்கப்படும் நிலை ஆகியவற்றை அடைந்துள்ளன.

செயற்கையான தீவுகளை உருவாக்குவதால் ஏற்பட்ட நிலத்திற்கான அழுத்தம் காரணமாக பவள நீரடித்தட்டு வாழ்விடங்களானவை சேதமடைந்துள்ளன. நீரடித் தட்டு மீது ஓடும் நீரோட்டங்களில் ஏற்படும் மாற்றங்கள் மற்றும் நீரடித் தட்டுகளின் விளிம்பில் பவளப் பாறை வளர்ச்சி மற்றும் அது தொடர்பான உயிரின வடிவங்களை எவ்வாறு இந்தப் புதிய வடிவமைப்பு பாதிக்கும் என்பது குறித்து சிறிதளவு பொறுப்புடனே நடந்து கொண்டு சில நீரடித் தட்டுகளானவை குப்பைகளால் நிரப்பப்பட்டுள்ளன. மாலைத்தீவுகளின் பகுதியளவு உப்பு நீரை அல்லது சேறு நிறைந்த நீரைக் கொண்ட பகுதிகளில் அலையாத்திக் காடுகளானவை பெருகி வளர்கின்றன. 10 பேரினங்களைச் சார்ந்த 14 அலையாத்தித் தாவரங்களை இந்தத் தீவுக்கூட்டம் கொண்டுள்ளது. தாம் தோன்றிய இடமாக இந்தத் தீவுகளைக் கொண்டுள்ள பெரணித் தாவரமும் (அக்ரோச்திச்சம் ஔரேயம்) இதில் ஒன்றாகும்.

மாலைத்தீவுகளில் சிறிய பச்சைக் கொக்கு

இத்தீவுகளின் சுருங்கிய அளவு காரணமாக மாலைத்தீவுகளில் நிலத்தில் வாழும் ஊர்வன இனங்கள் குறைவாகவே காணப்படுகின்றன. நெகிழும் வெள்ளை-புள்ளி தோட்ட அரணை (ரியோபா அல்போபங்ததா), இந்திய ஓநாய் பாம்பு (வெள்ளிக்கோல் வரையன்), பிராமினி கண் பார்வைற்ற பாம்பு (ரம்போடைப்லோப்சு பிராமினசு) ஆகியவற்றுடன் சேர்த்து, வீட்டுப் பள்ளி மற்றும் கிழக்குத் தோட்ட ஓணான் (ஓணான்) உயிரினங்கள் இந்தத் தீவின் வரம்புக்குட்பட்ட நில ஊர்வன உயிரினங்களில் சிலவாக உள்ளன.

எனினும், சுற்றியுள்ள கடல் நீரில் ஒரு மிகுந்த பன்முகத் தன்மையுடைய ஊர்வன உயிர்களானவை பெருகி வளர்கின்றன. பச்சைக் கடல் ஆமை (தோணியாமை), அழுங்காமை, பேராமை ஆகியவற்றுக்கான கூடு கட்டும் இடங்களாக மாலைத்தீவுக் கடற்கரைகளானவை உள்ளன. மேலும், உவர் நீர் முதலையானது அவ்வப்போது இத்தீவுகளை அடைவதாகக் குறிப்பிடப்பட்டுள்ளது. இந்தத் தீவுகளின் சதுப்பு நிலப் பகுதிகளில் இவை தங்குகின்றன.

இந்த இந்தியப் பெருங்கடல் தீவுக்கூட்டத்தின் அமைவிடத்தின் பொருளானது இங்கு காணப்படும் பறவைகள் முதன்மையாக திறந்த வெளி கடல் பறவைகளாகவே உள்ளன என்பதாகும். இத்தீவில் காணப்படும் பெரும்பாலான இனங்களானவை ஐரோவாசிய வலசைப் பறவைகளாகும். இதில் வெகு சிலவே இந்தியத் துணைக்கண்டத்துடன் பொதுவாக தொடர்பு கொண்டவையாகும். கப்பற்பறவை போன்ற சில பறவைகள் பருவ காலங்களில் மட்டுமே வருகின்றன. சாம்பல் நாரை மற்றும் தாழைக் கோழி போன்ற சில பறவைகளானவை சதுப்பு நிலங்களிலும், தீவுப் புதர்களிலும் வாழ்கின்றன. வெள்ளை ஆலாக்களானவை தெற்குத் தீவுகளின் செழிப்பான வாழ்விடங்கள் காரணமாக அவ்வப்போது அங்கே காணப்படுகின்றன.

அரசாங்கமும், அரசியலும்

முகமது முயிசு
அதிபர்

உசைன் மொகம்மெது இலத்தீப்
துணை அதிபர்

மாலைதீவுகள் அதிபரைக் கொண்ட, அரசுத் தலைவர் மற்றும் நாட்டுத் தலைவராக அதிபரின் விரிவான செல்வக்குடன் அமைந்த ஓர் அரசியலமைப்புக் குடியரசு ஆகும். அதிபர் செயலாட்சிப் பிரிவுக்குத் தலைமை தாங்குகிறார். மக்களின் மச்லிசு (நாடாளுமன்றம்) அங்கீகரிக்கப்படும் அமைச்சரவையை நியமிக்கிறார். ஆயுதப் படைகளுக்குத் தலைமை தாங்குகிறார். தற்போதைய அதிபராக 17 நவம்பர் 2023-இலிருந்து பணியாற்றும் முகமது முயிசு உள்ளார். மாலைத்தீவுகளின் அதிபரும், ஓரவை முறைமையைக் கொண்ட மச்லிசுவின் உறுப்பினர்களும் பதவிக் காலமாக ஐந்தாண்டுகளைக் கொண்டுள்ளனர். உறுப்பினர்களின் மொத்த எண்ணிக்கையானது பவளத்தீவுகளின் மக்கள் தொகைகளால் தீர்மானிக்கப்படுகின்றன. 2024-இல் மக்கள் தேசியப் பேரவையானது 93 தொகுதிகளுக்கு நடைபெற்ற நாடாளுமன்றத் தேர்தலில் பெரும்பான்மையை பெற்று வெற்றி பெற்றது.

குடியரசுக்கான அரசியலமைப்பானது 1968-இல் செயல்படுத்தப்பட்டது. 1970, 1972, 1975 ஆகிய ஆண்டுகளில் திருத்தம் செய்யப்பட்டது. 27 நவம்பர் 1997 அன்று அப்போதைய அதிபர் மாமூனால் அங்கீகரிக்கப்பட்ட மற்றொரு அரசியலமைப்பால் இது இடமாற்றம் செய்யப்பட்டது. இந்த அரசியலமைப்பானது 1 சனவரி 1998 அன்று செயல்பாட்டுக்கு வந்தது. மாலைத்தீவுகளின் தற்போதைய அரசியலமைப்பானது அதிபர் மாமூனால் 7 ஆகத்து 2008 அன்று ஏற்பளிக்கப்பட்டது. உடனடியாக செயல்பாட்டுக்கு வந்தது. 1998-ஆம் ஆண்டின் அரசியலமைப்பை இடம் மாற்றி, ரத்து செய்தது. ஒரு சுதந்திரமான ஆணையத்தால் நடத்தப்படும் ஒரு நீதித்துறை, தேர்தல்கள் மற்றும் ஊழல் எதிர்ப்பை மேற்பார்வையிடுவதற்காக அமைக்கப்பட்ட சுதந்திரமான ஆணையங்கள் ஆகியவற்றை உள்ளடக்கியதாக இந்த புதிய அரசியலமைப்பு திகழ்கிறது. அதிபரிடமிருந்த செயலாட்சி அதிகாரங்களையும் இது குறைத்துள்ளது. நாடாளுமன்றத்தை வலிமைப்படுத்தியுள்ளது. இவை அனைத்துமே அதிபரை நாட்டின் தலைவராகவும், அரசின் தலைவராகவும், மாலைத்தீவுகளின் ஆயுதப் படைகளின் தலைமைத் தளபதியாகவும் குறிப்பிடுகின்றன.

2018-இல் அப்போதைய ஆளும் கட்சியான மாலைத்தீவுகள் முற்போக்குக் கட்சிக்கும், எதிர்க் கட்சிகளுக்கும் இடையிலான பதட்டங்கள் மற்றும் இதைத் தொடர்ந்து நடத்தப்பட்ட ஒடுக்குமுறைகளானவை ஐநா மனித உரிமைத் தலைவரால் "சனநாயகம் மீதான தாக்குதல்" என்று குறிப்பிடப்பட்டது.

மே 2019-இல் அதிபர் இப்ராகிம் முகமது சாலி மக்களின் மச்லீசுவின் சபாநாயகரான முகம்மது நசீதுக்கு வாழ்த்துக்கள் தெரிவிக்கிறார்.

ஏப்பிரல் 2019 நாடாளுமன்றத் தேர்தலில் அதிபர் இப்ராகிம் முகமது சாலியின் மாலைத்தீவு சனநாயக் கட்சியானது பெரும் வெற்றி பெற்றது. நாடாளுமன்றத்தில் மொத்தமுள்ள 87 தொகுதிகளில் 65-ஐப் பெற்றது. மாலைத்தீவு வரலாற்றில் நாடாளுமன்றத்தில் இத்தகைய பெரும் எண்ணிக்கையிலான தொகுதிகளை ஒற்றைக் கட்சியானது பெற்றது இதுவே முதல் முறையாகும்.

நிசானிசுதீனின் ஒழுங்கு என்பது ஒரு நபருக்கு மாலைத்தீவுகளால் வழங்கப்படக் கூடிய மிக உயர்ந்த குடிமகன்களுக்கான விருதாகும். இது அதிபரால் பொதுவாக ஒரு நுட்பமான விழாவில் வழங்கப்படுகிறது.

ஏப்பிரல் 2024-இல் மாலைத்தீவு நாடாளுமன்றத் தேர்தலில் அதிபர் முகமது முயிசுவின் சீனவுக்கு ஆதரவளிக்கும் மக்களின் தேசியப் பேரவையானது 66 தொகுதிகளை வென்றது. அதே நேரத்தில், இக்கட்சியின் கூட்டணிக் கட்சிகளானவை ஒன்பது தொகுதிகளில் வென்றன. 93 உறுப்பினர்களைக் கொண்ட சபையில் 75 உறுப்பினர்களின் ஆதரவை இது அதிபருக்குக் கொடுத்தது. இதன் பொருள் மிகப் பெரும் பெரும்பான்மையாகும். அரசியலமைப்பை மாற்றக் கூடிய அளவுக்கு இந்த எண்ணிக்கை இருந்தது.

நிர்வாகப் பிரிவுகள்

பவளத்தீவை அடையாளப்படுத்த தான எழுத்துமுறை எழுத்துக்களைப் பயன்படுத்தியதுடன் ஒவ்வொரு நிர்வாகப் பவளத்தீவும் குறிக்கப்பட்டுள்ளது. இயற்கையான பவளத்தீவுகளானவை வெளிர் நீல நிறத்தில் பெயரிடப்பட்டுள்ளன.

மாலைத்தீவுகளானவை 26 இயற்கையான பவளத்தீவுகளையும், தனித்து விடப்பட்ட நீரடித் திட்டுக்கள் மீது சில தீவுக் குழுக்களையும் கொண்டுள்ளன. இவை அனைத்தும் 21 நிர்வாகப் பிரிவுகளாகப் (17 நிர்வாகப் பவளத்தீவுகள், மற்றும் மாலே, அட்டு, புவகுமுலா, தினாதூ, குலுதுபுசி ஆகிய நகரங்கள்) பிரிக்கப்பட்டுள்ளது.

ஒவ்வொரு பவளத்தீவும் ஒரு தேர்ந்தெடுக்கப்பட்ட பவளத்தீவு மன்றத்தால் நிர்வகிக்கப்படுகிறது. தீவுகளானவை ஒரு தேர்ந்தெடுக்கப்பட்ட தீவு மன்றத்தால் நிர்வகிக்கப்படுகின்றன.

ஒரு பெயருடன் சேர்த்து ஒவ்வொரு நிர்வாகப் பிரிவும் மாலைத்தீவு குறியீட்டு எழுத்துக்களால் அடையாளப்படுத்தப்படுகின்றன. திலதுன்மதி உதுருபுரிக்கு (திலதுன்மதி வடக்கு) "ஆ அலீப்" போன்று அடையாளப்படுத்தப்படுகின்றன, மற்றும் ஒரு இலத்தீன் குறியீட்டு எழுத்தால் அடையாளப்படுத்தப்படுகின்றன. இதில் முதல் பெயரானது புவியியல் சார்ந்த மாலத்தீவின் பெயரைக் குறிக்கிறது. இரண்டாவது பெயரானது வசதிக்காகப் பின்பற்றப்படும் ஒரு குறியீடு ஆகும். வெவ்வேறு பவளத்தீவுகளில் உள்ள குறிப்பிட்ட தீவுகளானவை ஒரே பெயரைக் கொண்டுள்ளன. நிர்வாக தேவைகளுக்காக இந்தக் குறியீடானது தீவின் பெயருக்கு முன்னாள் குறிப்பிடப்படுகிறது. எடுத்துக்காட்டாக, பா புனதூ, காபு புனதூ, காபு-அலிபு புனதூ ஆகியவற்றைக் குறிப்பிடலாம். பெரும்பாலான பவளத்தீவுகளானவை மிக நீண்ட புவியியல் பெயர்களைக் கொண்டுள்ளதால் நீண்ட பெயர் எப்போதெல்லாம் குறிப்பிட கடினமாக உள்ளதோ அப்பதெல்லாம் இப்பெயர்கள் பயன்படுத்தப்படுகின்றன. எடுத்துக்காட்டாக, பவளத்தீவுகளின் இணையதளப் பெயர்களில் இவை பயன்படுத்தப்படுகின்றன.

குறியீட்டு எழுத்துப் பெயர்கள் அறிமுகப்படுத்தப்பட்டதானது மிகுந்த குழப்பம் மற்றும் புரிந்து கொள்ள இயலாத தன்மைக்கான ஓர் ஆதாரமாக இருந்து வந்துள்ளது. குறிப்பாக, அயல்நாட்டவரின் மத்தியில் இந்நிலை உள்ளது. பல மக்கள் நிர்வாகப் பவளத்தீவின் குறியீட்டு எழுத்தானது இதன் புதிய பெயர் என்றும், புவியியல் பெயரை இது இடமாற்றம் செய்துவிட்டது என்றும் எண்ணத் தொடங்குகின்றனர். இத்தகைய சூழ்நிலைகளின் கீழ் பயன்படுத்த சரியான பெயர் எது என்பதை அறிந்து கொள்வது கடினமாக உள்ளது.

அயல்நாட்டு உறவுகள்

1996-இலிருந்து இந்தியப் பெருங்கடல் ஆணையத்தின் அலுவல்பூர்வ செயல்பாட்டுக் கண்காணிப்பாளராக மாலைத்தீவுகள் உள்ளது. 2002-இல் இந்த ஆணையத்தில் சேருவதற்கு மாலைத்தீவுகள் விருப்பத்தை தெரிவிக்கத் தொடங்கியது. ஆனால், 2008 நிலவரப்படி, இது உறுப்பினர் பதவிக்கு விண்ணப்பிக்கவில்லை. மாலைத்தீவுகளின் விருப்பமானது ஒரு சிறிய தீவு நாடாக இதன் அடையாளத்துடன் தொடர்புடையதாக உள்ளது. குறிப்பாக, பொருளாதார வளர்ச்சி மற்றும் சுற்றுச்சூழலைப் பாதுகாப்பது ஆகியவை குறித்ததாக உள்ளது. இந்தியப் பெருங்கடல் ஆணையப் பகுதியில் ஒரு முதன்மையான செயல்பாட்டாளராக இருக்கும் பிரான்சுடன் நெருக்கமான உறவுமுறைகளை வைத்துக் கொள்ள இதன் விருப்பமும் இதற்குக் காரணமாக உள்ளது.

தெற்காசிய நாடுகளின் பிராந்தியக் கூட்டமைப்பைத் (தெ. நா. பி. கூ.) தோற்றுவித்த ஓர் உறுப்பினராக மாலைத்தீவுகள் உள்ளது. 1982-இல் பொதுநலவாயத்தில் இக்குடியரசானது இணைந்தது. ஐக்கிய இராச்சியத்திடமிருந்து சுதந்திரத்தைப் பெற்று சுமார் 17 ஆண்டுகளுக்குப் பிறகு இணைந்தது. அக்டோபர் 2016-இல் பொதுநலவாயத்திலிருந்து தான் விலகுவதை மாலைத்தீவுகள் அறிவித்தது. மனித உரிமை மீறல்கள் மற்றும் சனநாயகப் பின்னிறக்கம் குறித்து ஆதாரம் இல்லாவிட்டாலும் இந்நாடு மீது சுமத்தப்பட்ட குற்றச்சாட்டுகளுக்கு எதிர்ப்பு தெரிவித்து விலகியது. பொதுநலவாய உறுப்பினர்களான சீசெல்சு மற்றும் மொரிசியசு ஆகிய நாடுகளுடன் மாலைத்தீவுகள் நெருக்கமான உறவுமுறைகளைக் கொண்டுள்ளது. மாலைத்தீவுகளும், கொமொரோசும் இசுலாமிய ஒத்துழைப்பு அமைப்பிலும் உறுப்பினர்களாக உள்ளன. 2018-இல் அதிபராகத் தான் தேர்ந்தெடுக்கப்பட்டதைத் தொடர்ந்து இப்ராகிம் முகமது சாலியின் நிர்வாகமானது சனநாயகச் சீர்திருத்தத்திற்கான சான்றுகளை வெளிக் காட்டியதற்குப் பிறகு பொதுநலவாயத்தில் மீண்டும் இணைய விரும்பியது. 1 பெப்பிரவரி 2020-இல் இந்நாடு பொதுநலவாயத்தில் மீண்டும் சேர்த்துக் கொள்ளப்படுவதற்கு இது காரணமானது.

2022 உருசியா-உக்குரைன் போருக்கு எதிர் வினையாக மேற்குலகத்தால் உருசிய சிலவராட்சி உறுப்பினர்கள் மீது விதிக்கப்பட்ட பொருளாதாரத் தடைகளின் ஒரு விளைவாக, அமெரிக்கா மற்றும் பிற நாடுகளுடன் மாலைத்தீவுகள் எந்த வித குற்றவாளிகளைக் கைது செய்து அனுப்பும் ஒப்பந்தத்தையும் கொண்டிராததன் காரணமாக மாலைத்தீவுகளில் தங்களது பெரும் சொகுசுப் படகுகளுக்காக பல உறுப்பினர்கள் புகலிடம் தேடினர்.

சூன் 2024-இல் ஓர் அமைச்சரவைக் கூட்டத்தைத் தொடர்ந்து மாலைத்தீவுகள் அரசாங்கமானது நடந்து கொண்டிருந்த காசா போருக்கு ஓர் எதிர் வினையாக இந்நாட்டிற்குள் நுழைவதிலிருந்து இசுரேலிய எல்லைக் கடவுச் சீட்டு கொண்டவர்களைத் தடை செய்ய முடிவு செய்தது.

இராணுவம்

பெப்பிரவரி 2024 அதிபர் உரையின் போது மாலைத்தீவுகளின் இராணுவ வீரர்கள்

மாலைத்தீவுகளின் பாதுகாப்பு மற்றும் இறையாண்மையைப் பாதுகாப்பதற்கான பொறுப்பைக் கொண்டுள்ள ஒன்றிணைந்த பாதுகாப்பு அமைப்பாக மாலைத்தீவுகள் தேசிய பாதுகாப்புப் படையானது (மா. தே. பா. ப.) உள்ளது. மாலைத்தீவுகளின் அனைத்து உள்நாட்டு மற்றும் வெளிநாட்டுப் பாதுகாப்புத் தேவைகளை செய்து கொடுக்கும் பொறுப்பை முதன்மைச் செயலாக இது கொண்டுள்ளது. பொருளாதாரத் தனியுரிமைப் பகுதியின் (பொ. த. ப.) பாதுகாப்பு மற்றும், அமைதி மற்றும் பாதுகாப்பைப் பேணுவது உள்ளிட்ட பணிகளும் இதில் அடங்கும். மா. தே. பா. ப.-ஆனது கடலோரக் காவல்படை, கடல்சார் பிரிவு, சிறப்புப் படைகள், சேவைப் பிரிவுகள், பாதுகாப்பு உளவு சேவை, இராணுவக் காவல்துறை, பொறியாளர்களின் பிரிவு, சிறப்புப் பாதுகாப்புக் குழு, மருத்துவப் பிரிவு, உதவித் தளபதியின் பிரிவு, வான் பிரிவு, மற்றும் தீ மற்றும் மீட்புச் சேவை ஆகிய பிரிவுகளைக் கொண்டுள்ளது. கதிரலைக் கும்பா செயலெல்லையில் ஒத்துழைப்புக்கு அனுமதியளிக்கும் ஓர் அமைப்பை இந்தியாவுடன் மாலைத்தீவுகள் கொண்டுள்ளது.

நீரால் சூழப்பட்ட ஒரு தேசமாக, இந்நாட்டின் பாதுகாப்புப் பிரச்சனைகளில் பெரும்பாலானவை கடலில் உள்ள மக்கள் குறித்தவையாக உள்ளன. கிட்டத்தட்ட இந்நாட்டின் 99% பரப்பளவானது நீரில் உள்ளது. எஞ்சிய 1% நிலமானது 800 கிலோமீட்டர் நீளம் மற்றும் 120 கிலோமீட்டர் அகலத்தைக் கொண்ட ஒரு பரப்பளவில் சிதறியுள்ளது. இந்நாட்டின் மிகப் பெரிய தீவானது 8 சதுர கிலோமீட்டர்களுக்கும் அதிகமான பரப்பளவைக் கொண்டிருக்கவில்லை. இவ்வாறாக, இந்நாட்டின் நீர்ப்பரப்பு மீது கண்காணிப்பைப் பேணுவது, பொ. த. ப. மற்றும் சொந்த நீர்ப்பரப்பின் மீது அயல்நாட்டு ஊடுருவாளர்களின் சட்டத்திற்குப் புறம்பான வேட்டைகளுக்கு எதிராகப் பாதுகாப்பை வழங்குவது ஆகியவை மா. தே. பா. ப.வுக்கு வழங்கப்பட்ட பணிகளாக உள்ளன. போக்குவரத்து மற்றும் பொருளாதாரப் பார்வை ஆகிய இரண்டிலுமே இவை மிக முக்கியமான பணிகளாக உள்ளன. இந்தப் பணிகளைச் செயல்படுத்துவதில் ஓர் இன்றியமையாத பங்கைக் கடலோரக் காவல்படை ஆற்றுகிறது. சரியான நேரத்தில் பாதுகாப்பை வழங்குவதற்காக இதன் ரோந்துப் படகுகளானவை பல்வேறு மா. தே. பா. ப. மாகாணத் தலைமையகங்களில் நிறுத்தப்பட்டுள்ளன. கடல் சார் பிரச்சனை அழைப்புகளுக்குப் பதிலளிப்பது, பாதுகாப்பு மற்றும் மீட்பு நடவடிக்கைகளை உடனடியாக நடத்துவது ஆகிய பணிகளும் கடலோரக் காவல் படைக்கு வழங்கப்பட்டுள்ளன. 2019-இல் அணு ஆயுதப் பரவல் தடை குறித்த ஐநா ஒப்பந்தத்தில் மாலைத்தீவுகள் கையொப்பமிட்டது.

சட்டம்

மாலைத்தீவுகளின் அரசியலமைப்பின் படி, "நீதிபதிகள் சுதந்திரமானவர்கள், அரசியலமைப்பு மற்றும் சட்டத்துக்கு மட்டுமே பதில் கூறக்கூடியவர்கள். தீர்மானிக்கும் விவகாரங்களில் அரசியலமைப்போ அல்லது சட்டமோ எதையும் கூறாத வேளையில் நீதிபதிகள் இசுலாமிய சரியாவைக் கவனமாக எண்ணிப் பார்க்க வேண்டும்".

மாலைத்தீவுகளின் அலுவல்பூர்வ சமயம் இசுலாம் ஆகும். எந்த பிற சமயப் பழக்கழக்கங்களையும் வெளிப்படையாகப் பின்பற்றுவதானது தடை செய்யப்பட்டுள்ளது. 2008-ஆம் ஆண்டு அரசியலமைப்பானது, குடியரசானது "இசுலாமின் கொள்கைகளை அடிப்படையாகக் கொண்டது" மற்றும் "இசுலாமின் எந்தக் கொள்கைக்கும் மாறாக அமையும் எந்தச் சட்டமும் பயன்படுத்தக் கூடாது" என்று குறிப்பிடுகிறது. குடியுரிமை பெறுவதிலிருந்து முசுலிம் அல்லாதவர்கள் தடை செய்யப்பட்டுள்ளனர்.

ஒரு குறிப்பிட்ட சமயத்தைச் சார்ந்தவராக இருக்க வேண்டும் என்ற தேவை, பிற சமயத்தைப் பின்பற்றுவோர் ஒரு பொது இடத்தில் வழிபடுவதற்கான தடை ஆகியவை உலக மனித உரிமைகள் சாற்றுரையின் பிரிவு 18 மற்றும் அனைத்துலக குடிசார் மற்றும் அரசியல் உரிமைகள் உடன்படிக்கையின் பிரிவு 18 ஆகியவற்றுக்கு முரண்பட்டதாகும். இந்த இரு பிரிவுகளுக்கும் மாலைத்தீவுகள் சமீபத்தில் தான் பங்கெடுப்பாளராக உருவானது. இந்த உடன்படிக்கைகளைப் பின்பற்றுவதில் மாலைத்தீவுகள் முரண்படுவதானது பின் வருமாறு "இந்த உடன்படிக்கையின் பிரிவு 18-இல் குறிப்பிடப்பட்டுள்ள கொள்கைகளைச் செயல்படுத்துவதானது மாலைத்தீவுகள் குடியரசின் அரசியலமைப்பை மீறியதாக அமையக் கூடாது" என்று குறிப்பிடப்பட்டது.

16 சூலை 2015 அன்று ஒரு புதிய குற்றவியல் சட்டமானது செயல்பாட்டுக்கு வந்தது. 1968-ஆம் ஆண்டு சட்டத்தை இது இடமாற்றியது. இசுலாமியச் சட்டத்தின் முதன்மையான அம்சங்கள் மற்றும் கொள்கைகளுடன் உள்ளிணைக்கப்பட்ட அகல் விரிவான குற்றவியல் சட்டம், முதல் நவீன சட்டம் இதுவாகும்.

மனித உரிமைகள்

மாலைத்தீவுகளில் மனித உரிமைகளானவை சச்சரவுக்கு காரணமாக அமையக் கூடிய விவகாரங்களாக உள்ளன. தனது 2011-ஆம் ஆண்டு உலகில் சுதந்திரம் என்ற அறிக்கையில், பிரீடம் ஔசு அமைப்பானது, மாலைத்தீவுகளை "பகுதியளவு சுதந்திரமான" நாடு என்று குறிப்பிட்டது. 2009 மற்றும் 2010-இல் தொடங்கப்பட்ட சீர்திருத்தச் செயல் முறையானது நிறுத்தப்பட்டதாகக் குறிப்பிட்டது. சனநாயகம், மனித உரிமைகள், மற்றும் பணியாளர்களுக்கான ஐக்கிய அமெரிக்க செயலகமானது இந்நாட்டில் மனித உரிமை பழக்கவழக்கங்கள் குறித்த தன்னுடைய 2012-ஆம் ஆண்டு அறிக்கையில் இந்நாட்டின் மிக முக்கியமான பிரச்சினைகளாக இலஞ்ச ஊழல், சமயச் சுதந்திரம் இல்லாதது, அதிகாரத்தைத் தவறாப் பயன்படுத்துவது, பெண்கள் சமமற்ற முறையில் நடத்தப்படுவது ஆகியவற்றைக் குறிப்பிட்டது.

பொருளாதாரம்

முதன்மைக் கட்டுரை: மாலத்தீவின் பொருளாதாரம்

மாலே துறைமுகம்

வரலாற்று ரீதியாக மாலைத்தீவுகளானவை தொடக்க காலங்களின் பன்னாட்டுப் பணமான சோகி ஓடுகளைப் பெருமளவில் வழங்கியது. பொ. ஊ. இரண்டாம் நூற்றாண்டிலிருந்து இத்தீவுகளானவை அரேபியர்களால் "பணத் தீவுகள்" என்று அறியப்பட்டன. ஆப்பிரிக்காவில் பணமாக நூற்றாண்டுகளுக்கு மானெட்டரியா மானெட்டாவானது பயன்படுத்தப்பட்டது. அடிமை வணிக காலத்தின் போது, மேற்குலக நாடுகளால் ஆப்பிரிக்காவுக்குள் சோகிகளானவை பெருமளவில் அறிமுகப்படுத்தப்பட்டன. மாலைத்தீவுகளின் நாணய அமைப்பின் சின்னமாக சோகி தற்போது உள்ளது.

1970-கள் மற்றும் 1980-களின் தொடக்கத்தில் 1,00,000 மக்கள் தொகையுடன் உலகின் 20 மிக ஏழ்மையான நாடுகளில் ஒன்றாக மாலைத்தீவுகள் திகழ்ந்தது. மீன்பிடித் தொழில், மற்றும் தும்புக் கயிறு, திமிங்கல வாந்தி (மாவகரு), மற்றும் கோக்கோ தே மேர் (தவகாசி, பொருள்: கடல் தென்னை) போன்ற உள்நாட்டுப் பொருட்களை அண்டை நாடுகள் மற்றும் கிழக்காசிய நாடுகளுடன் வணிகம் செய்து வந்ததைப் பெருமளவு சார்ந்திருந்ததாக அந்நேரத்தில் இந்நாட்டின் பொருளாதாரம் திகழ்ந்தது.

மாலைத்தீவு அரசாங்கமானது 1980-களில் பெருமளவு வெற்றியடைந்த பொருளாதாரச் சீர்திருத்தத் திட்டத்தைத் தொடங்கியது. இறக்குமதி ஒதுக்கீடுகளை நீக்கி, தனியார் துறையில் அதிக வாய்ப்புகளை வழங்கியதன் மூலம் இதைத் தொடங்கியது. அந்நேரத்தில் சுற்றுலாத் துறையானது அதன் தொடக்க நிலையில் இருந்தது. ஆனால், பிற்காலத்தில் தேசத்தின் வளர்ச்சியில் ஒரு முக்கியமான பங்கை ஆற்றியது. பொருளாதாரத்தில் வேளாண்மை, உற்பத்தித் துறையானது தொடர்ந்து சிறிய பங்கையே ஆற்றி வருகிறது. அறுவடை செய்யத் தகுந்த நிலம் குறைவாகவே கிடைப்பது, உள்நாட்டுப் பணியாளர்கள் பற்றாக்குறை ஆகியவற்றின் காரணமாக இத்துறைகளின் வளர்ச்சியானது மட்டுப்படுத்தப்பட்டுள்ளது.

சுற்றுலா

முதன்மைக் கட்டுரை: மாலத்தீவுகளில் சுற்றுலா

உயர்ந்த தென்னை மரங்கள், தூய்மையான நீல நிற கடற்கழிகளுடன் பிலித்தேயோ தீவின் கடற்கரை

1970-களின் தொடக்கம் வரை மாலைத்தீவுகளானது பெரும்பாலும் சுற்றுலாப் பயணிகளால் அறியப்படாமலேயே தொடர்ந்து இருந்தது. இதன் 3,82,751 குடியிருப்புவாசிகளுக்குத் தாயகமாக வெறும் 200 தீவுகளே உள்ளன. பிற தீவுகளானவை முழுவதுமாக பொருளாதாரப் பயன்பாடுகளுக்காகப் பயன்படுத்தப்படுகின்றன. இத்தகைய தீவுகளில் சுற்றுலாவும், வேளாண்மையும் மிக முக்கியமானவையாக உள்ளன. மொத்த உள்நாட்டு உற்பத்திக்கு சுற்றுலாவானது 28% பங்களிப்பையும், மாலைத்தீவின் அன்னியச் செலாவணி வரவுகளில் 60%-க்கும் அதிகமான பங்கையும் பெற்றுத் தருகிறது. அரசின் வரி வருவாயில் 90%-க்கும் அதிகமானது இறக்குமதி வரிகள் மற்றும் சுற்றுலா சார்ந்த வரிகளிலிருந்து கிடைக்கப் பெறுகிறது.

சுற்றுலாத்துறை வளர்ச்சியானது நாட்டின் பொருளாதாரத்தின் ஒட்டு மொத்த வளர்ச்சிக்குக் காரணமானது. நேரடி மற்றும் மறைமுக வேலைவாய்ப்பையும், பிற தொடர்புடைய துறைகளில் வருமானத்தை உருவாக்கும் வாய்ப்புகளையும் உருவாக்கியது. பாந்தோசு தீவு விடுமுறைப் போக்கிடம் மற்றும் குரும்பா கிராமம் (தற்போதைய பெயர் குரும்பா மாலைத்தீவுகள்) ஆகியவற்றில் 1972-இல் முதல் சுற்றுலா விடுமுறைப் போக்கிடங்களானவை திறக்கப்பட்டன. இவை மாலைத்தீவுகளின் பொருளாதாரத்தை மாற்றமடைய வைத்தன.

இலண்டா கிராவரு (பா பவளத்தீவு) விடுமுறைப் போக்கிடத் தீவு

சுற்றுலா அமைச்சகத்தின் கூற்றுப் படி, 1972-இல் சுற்றுலா வளர்ச்சியடையத் தொடங்கியதானது பொருளாதாரத்தை மாற்றமடைய வைத்தது. மீன்பிடித் தொழிலைச் சார்ந்திருந்ததிலிருந்து சுற்றுலாவுக்கு துரிதமாக நகர்வானது ஏற்பட்டது. வெறும் மூன்றரை தசாப்தங்களில் சுற்றுலாவானது வருவாய்க்கான முதன்மையான ஆதாரமாக உருவானது. சுற்றுலாவானது நாட்டின் மிகப் பெரிய அன்னியச் செலாவணியை ஈட்டும் துறையாக உள்ளது. மொத்த உள்நாட்டு உற்பத்திக்கு ஒற்றை மிகப் பெரிய பங்களிப்பாளராக உள்ளது. 2008-ஆம் ஆண்டு நிலவரப் படி, மாலத்தீவுகளில் உள்ள 89 விடுமுறைப் போக்கிடங்களானவை 17,000-க்கும் அதிகமான படுக்கைகளை வழங்கியும், ஆண்டு தோறும் 6 இலட்சத்துக்கும் அதிகமான சுற்றுலாப் பயணிகளையும் ஈர்த்துள்ளது. 2019-இல் 17 இலட்சத்துக்கும் அதிகமான சுற்றுலாப் பயணிகள் மாலைத்தீவுகளுக்கு வருகை புரிந்தனர்.

1972 மற்றும் 2007 ஆகிய ஆண்டுகளுக்கு இடையில் விடுமுறைப் போக்கிடங்களின் எண்ணிக்கையானது 2-இலிருந்து 92-ஆக அதிகரித்தது. 2007-ஆம் ஆண்டு நிலவரப் படி, மாலைத்தீவுகளுக்கு 83.80 இலட்சத்துக்கும் அதிகமான சுற்றுலாப் பயணிகள் வருகை புரிந்தனர்.

ஐக்கிய நாடுகள் கல்வி, அறிவியல், பண்பாட்டு நிறுவனத்தின் தற்காலிகத் தளங்களாகப் பட்டியலிடப்பட்ட ஆறு பாரம்பரிய பவளத்தீவு பள்ளிவாசல்களை இந்நாடு கொண்டுள்ளது.

பயணிகள்

வேலனா பன்னாட்டு விமான நிலையத்திற்கு வெளியே உள்ள பெயர்ப் பலகை

குறைந்தது ஒரு மாத முறைமைக் காலமுள்ள ஓர் எல்லைக் கடவுச் சீட்டு, ஒரு முழுமையான பயண விவர முன் வரைவு (திரும்பிச் செல்வதற்கென்று உறுதி செய்யப்பட்ட பயணச் சீட்டுகள், ஒரு பதிவு செய்யப்பட்ட தங்குமிடத்தில் உறுதி செய்யப்பட்ட முன் பதிவு, மாலைத்தீவுகளில் தங்கியிருப்பதற்கு ஆதரவளிக்கப் போதுமான நிதிக்கான ஆதாரம், அவர்களது பிற செல்லுமிடங்களுக்கான நுழைவுத் தேவைகள் - இசைவுச்சீட்டு மற்றும் எல்லைக் கடவுச்சீட்டு போன்றவை), ஒரு பயணி உத்தரவாதப் படிவம் (இது முழுமையாகப் பூர்த்தி செய்யப்பட்டு, விமானத்திலிருந்து வந்த 96 மணி நேரத்திற்குள் மாலைத்தீவுகளுக்கு வருகை புரியும் அனைத்து அயல்நாட்டவராலும் சமர்ப்பிக்கப்பட வேண்டும்), மற்றும் தேவைப்பட்டால் மஞ்சள் காய்ச்சல் தடுப்பூசிச் சான்றிதழ் ஆகியவற்றைக் கொண்டிருந்தால் அவர்கள் எந்த நாட்டைச் சேர்ந்தவர்களாக இருந்தாலும் மாலைத்தீவுகளுக்கு வருகை புரிபவர்கள் வருகைக்கு முன்னரே இசைவுச் சீட்டுக்கு விண்ணப்பிக்க வேண்டிய தேவையில்லை. எனினும், இந்நாட்டிற்குள் நுழைவதற்கு இசுரேலிய எல்லைக் கடவுச்சீட்டைக் கொண்டிருப்பவர்களுக்கு அனுமதி மறுக்கப்படுகிறது.

தலைநகரம் மாலேவுக்குப் பக்கவாட்டில் அமைந்துள்ள குல்குலே தீவின் வேலனா பன்னாட்டு விமான நிலையத்திற்குப் பெரும்பாலான பயணிகள் வருகை புரிகின்றனர். இந்தியா, இலங்கை, தோகா, துபாய், அபுதாபி, சிங்கப்பூர், டாக்கா, இசுதான்புல் ஆகிய இடங்களிலிருந்து வருவதற்கும், அவ்விடங்களுக்குச் செல்வதற்கும், மற்றும் மலேசியாவின் கோலாலம்பூர் பன்னாட்டு விமான நிலையம் போன்ற தென்கிழக்கு ஆசியாவில் உள்ள முதன்மையான விமான நிலையங்கள், மேலும், பிரான்சிலுள்ள சார்லசு டி கௌல் போன்ற ஐரோப்பாவிலிருந்து வரும் தனியார் விமானங்கள் வருவதற்கும், போவதற்கும் இந்த விமான நிலையம் சேவையாற்றுகிறது. தெற்கு அட்டு பவளத்தீவு மீது உள்ள கான் விமான நிலையமானது ஒரு வாரத்திற்குப் பல முறை மிலனின் மல்பேன்சாவுக்கு பன்னாட்டு விமானங்களை இயக்குகிறது. இலண்டன் ஹீத்ரோ விமான நிலையத்திலிருந்து மாலைத்தீவுகளுக்கு நேரடி விமானச் சேவைகளை பிரிட்டிசு ஏர்வேசு வழங்குகிறது.

மீன் பிடித்தல்

தீவுகளுக்கு இடையில் பாரம்பரியமாகப் பயன்படுத்தப்படும் ஓர் இயந்திரமாக்கப்பட்ட, பாய்மரங்கள் நீக்கப்பட்ட தோணி

பல நூற்றாண்டுகளுக்கு மாலைத்தீவுகளின் பொருளாதாரமானது மீன்பிடித்தல் மற்றும் பிற கடல்சார் பொருட்களை முழுவதுமாக சார்ந்திருந்தது. மக்களின் முதன்மையான வேலையாக மீன்பிடித்தல் இன்றும் தொடர்கிறது. மீன்பிடித் தொழிற்துறைக்கு அரசாங்கமானது முக்கியத்துவம் கொடுக்கிறது.

1974-இல் தோணி என்றழைக்கப்பட்ட பாரம்பரிய மீன்பிடிப் படகுகள் இயந்திரமயமாக்கப்பட்டதானது இந்நாட்டின் மீன்பிடித் தொழிற்துறையின் வளர்ச்சியில் ஒரு முதன்மையான மைல் கல்லாக அமைந்தது. 1977-இல் மீன்களை கொள்கலன்களுக்குள் அடைத்து வைக்கும் ஒரு தொழிற்சாலையானது உருவாக்கப்பட்டது. சப்பானிய நிறுவனத்துடன் ஓர் இணைந்த திட்டமாக இது அமைக்கப்பட்டது. 1979-இல் மீன்பிடித் தொழிற்துறையின் ஒட்டு மொத்த வளர்ச்சிக்கான கொள்கை வழிமுறைகள் குறித்து அரசாங்கத்திற்கு ஆலோசனை வழங்குவதை கடமையாகக் கொண்ட ஒரு மீன்பிடி ஆலோசனை வாரியமானது அமைக்கப்பட்டது. 1980-களின் தொடக்கத்தில் மனிதவள மேம்பாட்டுத் திட்டங்களானவை தொடங்கப்பட்டன. பள்ளிப் பாடத்திட்டத்தில் மீன்பிடியானது இணைக்கப்பட்டது. பல்வேறு உத்தி ரீதியிலான இடங்களில் மீன்களை ஈர்க்கும் கருவிகளும், கடல் பயண வழிகாட்டுக் கருவிகளும் அமைக்கப்பட்டன. மேலும், மீன்பிடித் தொழிற்துறைக்காகப் பொருளாதாரத் தனியுரிமைப் பகுதி திறக்கப்பட்டதானது மீன்பிடித் தொழிற்துறையின் வளர்ச்சியை மேலும் எளிதாக்கியது.

2010-ஆம் ஆண்டு நிலவரப் படி, மீன்பிடித் தொழிற்துறையானது இந்நாட்டின் மொத்த உள்நாட்டு உற்பத்திக்கு 15%-க்கும் அதிகமான பங்களிப்பை வழங்கியது. இந்நாட்டின் பணியாளர்களில் சுமார் 30% பேர் இதில் ஈடுபட்டுள்ளனர். சுற்றுலாத் துறைக்குப் பிறகு அதிக அன்னியச் செலாவணியைப் பெறும் இரண்டாவது மிகப் பெரிய துறையாக மீன்பிடித்தல் உள்ளது.

போக்குவரத்து

வேலனா பன்னாட்டு விமான நிலையமானது மாலைத்தீவுகளுக்கான முதன்மையான நுழைவாயிலாகத் திகழ்கிறது. தலைநகரமான மாலேவுக்குப் பக்கவாட்டில் இது அமைந்துள்ளது. சினமாலே பாலத்தால் இணைக்கப்பட்டுள்ளது. அரசாங்கத்துக்குச் சொந்தமான, தீவு வான் சேவைகளிலும் (மாலைத்தீவியர் என்ற நிறுவனப் பெயர் இதற்குக் கொடுக்கப்பட்டுள்ளது) பன்னாட்டுப் பயணமானது வழங்கப்படுகிறது. இச்சேவையானது பல பம்பார்டியர் டேசு 8 விமானங்களுடன் சேர்த்து டி. எச். சி.-6 டிவின் ஆட்டர் கடல் விமானங்களையும் இயக்குகிறது. இந்தியா, வங்காளதேசம், இலங்கை, மலேசியா, தாய்லாந்து, சீனாவுக்குப் பன்னாட்டுச் சேவை வழங்க ஒரு ஏர்பசு ஏ320 விமானத்தையும் பயன்படுத்துகிறது.

மாலைத்தீவுகளில் தீவுகளுக்கு இடையில் பயணம் மேற்கொள்ள உள்நாட்டு விமானம், கடல் விமானம், படகுகள் என மூன்று முதன்மையான வழிகள் உள்ளன. பல ஆண்டுகளாக டிஎம்ஏ (திரான்சு மாலைத்தீவு ஏர்வேசு) மற்றும் மாலைத்தீவிய ஏர் டாக்சி எனும் இரு கடல் விமான நிறுவனங்களானவை செயல்பட்டன. ஆனால், 2013-ஆம் ஆண்டில் இந்த இரு நிறுவனங்களும் திரான்சி மாலைத்தீவு ஏர்வேசு என்ற ஒரே பெயரில் இணைக்கப்பட்டன. கடல் விமானக் குழுவானது முழுவதுமாக டி. எச். சி.-6 டிவின் ஆட்டர் விமானங்களால் முழுவதுமாக உருவாக்கப்பட்டுள்ளது. வில்லா ஏர் என்று பெயருடைய மற்றொரு விமான நிறுவனமும் இந்நாட்டில் செயல்படுகிறது. உள்நாட்டு விமான நிலையங்களுக்கு இடையில் ஏடிஆர் வகை விமானங்களைப் பயன்படுத்தி இது செயல்படுகிறது. முதன்மையாக வில்லா-மாமிகிலி, தரவந்தூ மற்றும் சில பிற இடங்களுக்குச் சேவை வழங்குகிறது. 2019-இல் மாண்டா ஏர் விமான நிறுவனமானது தன் முதல் கால அட்டவணையிடப்பட்ட கடல் விமான சேவையைத் தொடங்கியது. இதன் கடல் விமானக் குழுவானது டி. எச். சி.-6 டிவின் ஆட்டர் விமானங்களைக் கொண்டு முழுமையாக உருவாக்கப்பட்டுள்ளது. தன் கடல் விமானச் சேவையுடன் சேர்த்து மாண்டா ஏர் விமான நிறுவனமானது முதன்மையான வேலனா பன்னாட்டு விமான நிலையத்திலிருந்து தாலு விமான நிலையம், தரவந்தூ விமான நிலையம் மற்றும் கூட்டூ விமான நிலையம் ஆகியவற்றுக்கு உள்நாட்டு விமானங்களை ஏடிஆர் 72-600 விமானகளைப் பயன்படுத்தி இயக்குகிறது. விமான நிலையத்திலிருந்து செல்ல வேண்டிய தீவின் தூரத்தைப் பொறுத்து விடுமுறைப் போக்கிடங்களானவை தங்களது விருந்தினர்களுக்காக விடுமுறைப் போக்கிடத் தீவின் படகுத் துறைக்கு விரைவுப் படகு இடமாற்றுகள் அல்லது கடல் விமானங்களை நேரடியாக ஏற்பாடு செய்து தருகின்றன. வேலனா பன்னாட்டு விமான நிலையத்திலிருந்து 18 உள்நாட்டு மற்றும் பன்னாட்டு விமான நிலையங்களுக்கு அன்றாட விமானகள் இந்நாட்டில் இயக்கப்படுகின்றன. மாலேயிலிருந்து பல பவளத்தீவுகளுக்கு கால அட்டவணையிடப்பட்ட கடல் பயணக் கப்பல்களும் இயக்கப்படுகின்றன. பாரம்பரிய மாலைத்தீவுப் படகானது தோணி என்றழைக்கப்படுகிறது. மாலைத்தீவுகளில் மிகப் பழைமையானதாக அறியப்பட்ட கடல் கொள்கலன்களில் இதுவும் ஒன்றாகும். விரைவுப் படகுகளும், கடல் விமானங்களும் மிகுந்த செலவு பிடிக்கக் கூடியவையாக உள்ளன. அதே நேரத்தில், மெதுவானதாக இருந்தாலும், தோணி மூலம் பயணம் மேற்கொள்வதானது ஒப்பீட்டளவில் விலை குறைவானதாகவும், வசதியானதாகவும் உள்ளது.

மக்கள் தொகையியல்

முதன்மைக் கட்டுரை: மாலைதீவுகளின் மக்கள் தொகையியல்

இந்நாட்டின் மிகப் பெரிய மற்றும் ஒரே ஒரு இனக்குழுவானவர்கள் மாலைத்தீவுகள் (திவேகின்) ஆவர். தற்கால மாலைத்தீவுகள் குடியரசு, இந்தியாவின் இலட்சத்தீவு ஒன்றியப் பகுதியிலுள்ள மினிக்காய் தீவு ஆகியவற்றை உள்ளடக்கிய மாலைத்தீவு வரலாற்றுப் பகுதியைப் பூர்வீகமாகக் கொண்டவர்கள் இவர்கள் ஆவர். இவர்கள் ஒரே பண்பாட்டைப் பகிர்ந்து கொண்டு, திவெயி மொழியைப் பேசுகின்றனர். இவர்கள் முதன்மையாக ஓர் இந்திய-ஆரிய மக்கள் ஆவர். மத்திய கிழக்கு, தெற்காசிய, ஆசுத்திரோனீசிய, ஆப்பிரிக்க மரபணுக்களின் தடயங்களைத் தங்கள் மக்கள் தொகையில் இவர்கள் கொண்டுள்ளனர்.

மாலைத்தீவுகளின் மக்கள் தொகை

ஆண்டு	மக்கள் தொகை
1911	72,237
1966	1,00,883
2000	2,70,101
2014	3,44,023
2022	5,15,132

முன்னர் கிரவரு மக்கள் என்று அறியப்பட்ட ஒரு சிறிய தமிழ் பேசும் மக்கள் தொகையையும் இந்நாடு கொண்டிருந்தது. இக்குழுவானது தற்போது கிட்டத்தட்ட முழுவதுமாக பெரிய மாலைத்தீவு சமூகத்திற்குள் இணைக்கப்பட்டுவிட்டது. ஆனால், கிரவரு தீவைப் பூர்வமாக கொண்டவர்களாக இவர்கள் திகழ்ந்தனர். இத்தீவு கடுமையாக அரிக்கப்பட்டதன் காரணமாக 1968-இல் இத்தீவிலிருந்த அனைவரும் வெளியேற்றப்பட்டனர். மாலைத்தீவுகளிலுள்ள ஒரு சிறிய சிங்கள மக்கள் தொகையானது 2000-ஆம் ஆண்டில் மொத்த மக்கள் தொகையில் சுமார் 0.7%-ஆக இருந்தது.

சில சமூகப் பகுப்புகளானவை இத்தீவுகளில் உள்ளன. பணி, செல்வம், இசுலாமிய மாண்புகள், குடும்ப உறவுகள் உள்ளிட்ட பல்வேறு காரணிகளை அடிப்படையாகக் கொண்டு தரநிலையானது உள்ளதால் இது மாற இயலாததாக இல்லை. ஒரு சிக்கலான சாதி அமைப்பிற்குப் பதிலாக, மாலைத்தீவுகளில் உயர் குடியினர் (பெபுலு) மற்றும் பொது மக்களுக்கு இடையில் வெறுமனே ஒரு தனி வேறுபாடு மட்டுமே காணப்படுகிறது. சமூக உயர் குடியின உறுப்பினர்களானவர்கள் மாலேவில் செறிந்துள்ளனர்.

மாலைத்தீவுகளின் ஆயுட்கால எதிர்பார்ப்பு

1978 வாக்கில் மக்கள் தொகையானது இரு மடங்கானது. 1985-இல் 3.4% ஆக மக்கள் தொகை வளர்ச்சி வீதமானது உச்ச நிலையை அடைந்தது. 2000-ஆம் ஆண்டு மக்கள் தொகைக் கணக்கெடுப்பானது மக்கள் தொகை வளர்ச்சி வீதமானது 1.9%-ஆகக் குறைந்ததை காட்டினாலும், 2006-ஆம் ஆண்டின் மக்கள் தொகைக் கணக்கெடுப்பின் போது இந்நாட்டின் மக்கள் தொகையானது 2,98,968-ஐ அடைந்தது. 1978-இல் பிறப்பின் போது ஆயுட்கால எதிர்பார்ப்பானது 46 ஆண்டுகளாக இருந்தது. பின்னர் 72 ஆண்டுகளாக உயர்ந்தது. குழந்தை இறப்பு வீதமானது 1977-இல் 12.7% என்பதிலிருந்து தற்போது 1.2% ஆகக் குறைந்துள்ளது. வயது வந்தோருக்கான எழுத்தறிவு வீதமானது 99%-ஐ அடைந்துள்ளது. ஒட்டு மொத்த பள்ளி மாணவர் சேர்க்கை வீதமானது 90-களின் உயர்ந்த பாதியை அடைந்தது. 2010-ஆம் ஆண்டில் நாட்டின் மக்கள் தொகையானது 3,17,280-ஐ அடையும் என்று மதிப்பிடப்பட்டுள்ளது.

2022-ஆம் ஆண்டு மக்கள் தொகைக் கணக்கெடுப்பு, மற்றும் வீடு மற்றும் பொருளாதார மக்கள் தொகைக் கணக்கெடுப்பு ஆகியவை மாலைத்தீவுகளின் மொத்த மக்கள் தொகையாக 5,15,132-ஐப் பட்டியலிட்டுள்ளன. இதில் 3,82,639 பேர் மாலைத்தீவுக் குடியிருப்புவாசிகளாகவும், 1,32,493 பேர் குடியிருக்கும் அயல்நாட்டவராகவும் உள்ளனர். மொத்த மக்கள் தொகையில் அயல்நாட்டில் பிறந்தவர்களின் மக்கள் தொகையானது 26% ஆக உள்ளது. இந்நாட்டில் புலம் பெயர்ந்து வாழ்பவர்களில் ஆறு மிகப் பெரிய தேசிய இனத்தவர்களாக வங்காளதேசத்தவர் (56.4%), இந்தியர் (24.9%), இலங்கையர் (8.6%), நேபாளி (3.9%), இந்தோனேசியர் (1.7%), பிலிப்பினோ (1.3%) ஆகியோர் உள்ளனர்.

மாலைத்தீவுகளின் மக்கள் தொகையானது அதிகரித்து வந்த நிலையாக மாலேயில் செறிந்துள்ளது. 2022-இல் தோராயமாக 41% மக்கள் தலைநகரத்தில் வாழ்ந்து வருகின்றனர். 2000-ஆம் ஆண்டில் வெறும் 27% ஆக இருந்ததுடன் ஒப்பிடும் போது இது ஓர் அதிகரிப்பாகும்.

மொழிகள்

இதனையும் பார்க்க: திவெயி மொழி

இந்நாட்டின் அலுவல்பூர்வ மற்றும் தேசிய மொழி திவெயி ஆகும். இலங்கையின் சிங்கள மொழியுடன் நெருங்கிய தொடர்புடைய ஓர் இந்திய-ஆரிய மொழி இதுவாகும். திவெயி மொழியை எழுதப் பயன்படுத்தப்பட்டதாக முதன் முதலில் அறியப்பட்ட எழுத்துமுறையானது எவேய்லா அகுரு எழுத்துமுறையாகும். மன்னர்களின் வரலாற்று ரீதியிலான பதிவில் (இராதவல்கி) இது காணப்படுகிறது. பிறகு, திவேசு அகுரு என்றழைக்கப்பட்ட ஓர் எழுத்துமுறையானது நீண்ட காலத்திற்குப் பயன்படுத்தப்பட்டது. தற்போதைய எழுத்துமுறையானது தான எழுத்துமுறை என்றழைக்கப்படுகிறது. இது வலதுபுறமிருந்து இடதுபுறமாக எழுதப்படுகிறது. திவேசு அகுரு மற்றும் அரேபியா அப்சத் ஆகிய பழைய பூர்வகுடி எழுத்துமுறைகளின் ஒரு கலவையிலிருந்து தான எழுத்துமுறையானது தருவிக்கப்பட்டுள்ளது. தான எழுத்துமுறையானது மொகம்மெது தகுருபானுவின் ஆட்சிக் காலத்தின் போது அறிமுகப்படுத்தப்பட்டதாகக் கூறப்படுகிறது.

தான எழுத்துமுறை

மாலைத்தீவுகளின் உள்நாட்டு மக்களால் ஆங்கிலமானது பரவலாகப் பேசப்படுகிறது: "வெளிப்புற உலகத்துக்கு தேசமானது திறந்துவிடப்பட்டது, கல்வியின் இரண்டாவது மற்றும் மூன்றாவது நிலைகளில் பயிற்றுவிக்கும் மொழியாக ஆங்கிலம் அறிமுகப்படுத்தப்பட்டது, சுற்றுலா மூலமாக இம்மொழியை அரசாங்கம் அங்கீகரித்ததன் காரணமாக வழங்கப்படும் வாய்ப்புகள் ஆகியவற்றைத் தொடர்ந்து ஆங்கிலமானது தற்போது இந்நாட்டில் தன்னைத் தானே உறுதியாக நிறுவிக் கொண்டுள்ளது."

இது தவிர்த்து, அரசின் சமயமாக சன்னி இசுலாம் உள்ளதன் காரணமாக அரபு மொழியானது பள்ளிகளிலும், பள்ளிவாசல்களிலும் பயிற்றுவிக்கப்படுகிறது. அனைத்து தொடக்க மற்றும் இரண்டாம் நிலைப் பள்ளி மாணவர்களுக்கும் கட்டாய சமயக் கல்வியின் ஒரு பகுதியாக அரபு மொழியில் வாசிப்பது, எழுதுவது, உச்சரிப்பது ஆகியவற்றில் அலுவல்பூர்வ அல்லது அலுவல் சாராத கல்வியை மாலைத்தீவு மக்கள் தொகையானது பெற்றுள்ளது.

திகிசேகி தானா

ஏற்கனவே இருந்த எழுத்துக்களுடன் புள்ளிகளைச் (நுகுத்தா) சேர்த்ததன் மூலம் தானா எழுத்துக்களுடன் இந்த மேற்கொண்ட எழுத்துக்களானவை, அரபியிலிருந்து பெறப்பட்ட சொற்களுக்கான ஒலி பெயர்ப்பை அனுமதிக்க இவை சேர்க்கப்பட்டன. ஏனெனில், முன்னர் அரேபியக் கடன் சொற்களானவை அரேபிய எழுத்துமுறையைப் பயன்படுத்தி எழுதப்பட்டன. இவற்றின் பயன்பாடானது வழக்கமானதாக இல்லை. உண்மையான அரேபிய உச்சரிப்பைக் காட்டிலும், மாலைத்தீவு மக்களின் உச்சரிப்பைப் பிரதிபலிப்பதற்காக உச்சரிப்பு மாற்றங்களானவை குறைவாகவே பயன்படுத்தப்படும் நிலை உருவாகி வருகிறது. ஏனெனில், மாலைத்தீவு மொழிக்குள் இச்சொற்களானவை உள்ளிழுக்கப்படுவதால் இவ்வாறான நிலை உள்ளது.

சமயம்

மாலைத்தீவின் வரலாற்றில் நீண்ட பௌத்த காலத்திற்குப் பிறகு முசுலிம் வணிகர்கள் இசுலாமை அறிமுகப்படுத்தினர். 12-ஆம் நூற்றாண்டின் நடுப்பகுதி வாக்கில் மாலைத்தீவர்கள் இசுலாமுக்கு மதம் மாறினர். இந்நாட்டின் வரலாற்றில் காணப்படும் சமாதிகளை அமைத்தல் போன்ற செயல்களில் காணபப்டுவதைப் போல் சூபித்துவ ஒழுங்குமுறைகளின் ஒரு நீண்ட வரலாற்றை இத்தீவுகள் கொண்டுள்ளன. புதைக்கப்பட்ட புனிதர்களின் உதவியை வேண்டுவதற்காக 1980-கள் வரை கூட இச்சமாதிகள் பயன்படுத்தப்பட்டன. சில பழைய பள்ளிவாசல்களுக்கு அடுத்து இவற்றை நாம் காண முடியும். மாலைத்தீவின் பண்பாட்டு மரபுவளத்தின் ஒரு பகுதியாக இவை கருதப்படுகின்றன.

மௌலுது (மீலாதுன் நபி) என்றழைக்கப்பட்ட சடங்கு முறையாக்கப்பட்ட திக்கிர் விழாக்கள் போன்ற சூபித்துவத்தின் பிற அம்சங்களானவை மிக சமீப காலங்கள் வரை எஞ்சியிருந்தன. ஓர் இசை போன்ற தொனியில் ஒப்புவிப்பதையும், சில பிரார்த்தனைகளையும் உள்ளடக்கியிருந்த ஒரு வழிபாட்டு முறை இதுவாகும். இந்த மௌலுது விழாக்களானவை இந்நிகழ்வுக்கு என அமைக்கப்பட்ட ஒப்பனைப் பாங்குடைய கூடாரங்களில் நடத்தப்பட்டன. குடியுரிமைக்கு இதைச் சார்ந்திருக்க வேண்டிய தேவையிருப்பதால் தற்சமயத்தில் ஒட்டு மொத்த மக்கள் தொகையின் அலுவல்பூர்வ சமயமாக இசுலாம் திகழ்கிறது என்று குறிப்பிடப்படுகிறது.

அரேபியப் பயணி இப்னு பதூதாவின் கூற்றுப் படி, இந்த மத மாற்றத்திற்குப் பொறுப்பான நபர் அபு அல்-பரக்கத் யூசுப் அல்-பர்பரி என்று பெயரிடப்பட்ட ஒரு சன்னி முசுலிம் வருகையாளர் ஆவார். தற்போதைய மொராக்கோவிலிருந்து இவர் கப்பல் பயணம் மூலம் வந்திருந்தார். இவர் தப்ரிசுகேபானு என்றும் குறிப்பிடப்படுகிறார். மாலேயின் வெள்ளிக்கிழமை பள்ளிவாசல் அல்லது குகுரு மிசுகியிலிருந்து தெருவின் மறு பக்கம் மெது சியாரய் மைதானத்தில் இவரது வழிபடப்படும் சமாதியானது தற்போது அமைந்துள்ளது. உண்மையில் 1153-இல் கட்டமைக்கப்பட்ட இது 1658-இல் மீண்டும் கட்டப்பட்டது. நாட்டின் மிகப் பழைய எஞ்சியிருக்கும் பள்ளிவாசல்களில் இதுவும் ஒன்றாகும்.

மாலைத்தீவில் உள்ள கிறித்தவர்களின் எண்ணிக்கையானது 1,400 அல்லது நாட்டின் மக்கள் தொகையில் 0.4% என்று பெலிக்சு வில்பிரெட் என்ற இறையியலாளர் குறிப்பிடுகிறார்.

2008-ஆம் ஆண்டு அரசியலமைப்பு பின்பற்றப்பட்டதிலிருந்து இசுலாமானது நாட்டின் அரசின் சமயமாக நிறுவப்பட்டுள்ளது. மாலைத்தீவுக் குடிமக்கள் சட்டத்தின் படி, சன்னி பிரிவைப் பின்பற்ற வேண்டும் என்ற தேவையுள்ளது. எனினும், 2020-இல் சுதந்திரமாக நடத்தப்பட்ட ஆய்வுகளானவை, மக்கள் தொகையில் தோராயமாக 0.29% கிறித்தவர்கள் (இவர்கள் தோராயமாக கத்தோலிக்க மற்றும் சீர்திருத்தத் திருச்சபைகளாகப் பிரிந்துள்ளனர்) என்பதைக் கண்டறிந்தது.

கல்வி

பட்டப் படிப்புக்கான இந்நாட்டின் கல்வி நிலையங்களில் ஒன்றாக மாலைத்தீவு தேசியப் பல்கலைக்கழகம் திகழ்கிறது. 1973-இல் சுகாதார அமைச்சகத்தால் இணைந்த சுகாதாரச் சேவைகள் பயிற்றுவிப்பு மையமானது (சுகாதார அறிவியலுக்கான பயிற்றுவிப்பாளர் குழுவுக்கான முன்னோடி) நிறுவப்பட்டது. தொழில்முறைக் கல்வி பயிற்றுவிப்பு மையமானது 1974-இல் நிறுவப்பட்டது. இயந்திரவியல் மற்றும் மின்னாற்றல் தொழில்களுக்கான பயிற்சியை இது வழங்குகிறது. 1984-இல் ஆசிரியர் கல்வி நிலையமானது உருவாக்கப்பட்டது. சுற்றுலாத் தொழிற்துறைக்கு பயிற்றுவிக்கப்பட்ட பணியாட்களை வழங்குவதற்காக 1987-இல் உணவக மற்றும் சமையல் கலை சேவைகளுக்கான பள்ளியானது நிறுவப்பட்டது. 1991-இல் அரசு மற்றும் தனியார் சேவைகளுக்கு பணியாளர்களைப் பயிற்றுவிப்பதற்காக மேலாண்மை மற்றும் நிர்வாகக் கல்வி நிலையமானது உருவாக்கப்பட்டது. 1998-இல் கல்லூரிக் கல்விக்கான மாலைத்தீவுகள் கல்லூரியானது உருவாக்கப்பட்டது. சரா மற்றும் சட்டத்திற்கான கல்வி நிலையமானது சனவரி 1999-இல் உருவாக்கப்பட்டது. 2000-இல் இக்கல்லூரியானது தன் முதல் பட்டப் படிப்பான, கலைகளுக்கான இளையோர் பட்டப் படிப்பைத் தொடங்கி வைத்தது. 17 சனவரி 2011 அன்று மாலைத்தீவுகளின் அதிபரால் மாலைத்தீவுகள் தேசியப் பல்கலைக்கழகச் சட்டமானது இயற்றப்பட்டது. 15 பெப்பிரவரி 2011 அன்று மாலைத்தீவு தேசியப் பல்கலைக்கழகமானது பெயரிடப்பட்டது. 2015-இல் அதிபரின் ஓர் ஆணையின் கீழ் இசுலாமியப் படிப்புகளுக்கான கல்லூரியானது மாலைத்தீவுகளின் இசுலாமியப் பல்கலைக்கழகம் (ஐஎம்யூ) என்று மாற்றப்பட்டது.

ஒரு குறிப்பிட்ட அளவுக்கு மேலான மதிப்பெண்களுடன் தேர்வு முடிவுகளில் தங்களது மேல்நிலைக் கல்வியை முடித்த மாணவர்களுக்கு மாலைத்தீவு அரசாங்கமானது தற்போது மூன்று வெவ்வேறு அளவுகளில் கல்வி உதவித் தொகைகளை வழங்குகிறது. தங்களது 12-ஆம் வகுப்புத் தேர்வுகளில் மாணவர்களால் பெறப்பட்ட தரநிலைகளை அடிப்படையாகக் கொண்டு கல்வி உதவித் தொகை பெறும் அளவுகளானவை கொடுக்கப்படுகின்றன.

சுகாதாரம்

மனித உரிமைகள் அளவீட்டுத் திட்டமானது, இந்நாட்டின் வருமான நிலையைக் கருத்தில் கொள்ளும் போது சுகாதாரத்திற்கான உரிமைக்கான எதிர்பார்ப்பைப் பூர்த்தி செய்வதில் 10-இல் 5.1 என்ற அளவை மாலைத்தீவு அடைவதாகக் குறிப்பிடுகிறது. இந்நாட்டின் தற்போதைய வருமானத்தை அடிப்படையாகக் கொண்ட குழந்தைகள் சுகாதார உரிமைகளுக்கான எதிர்பார்ப்பு நிலையில் 98%-ஐ மாலைத்தீவானது குறிப்பாக அடைகிறது. இந்நாட்டின் வருமான நிலையைக் கருத்தில் கொள்ளும் போது, வயது வந்தோருக்கான சுகாதார உரிமைகளுக்கான எதிர்பார்ப்பைப் பூர்த்தி செய்யும் அளவில் 99.7%-ஐ இந்நாடானது அடைகிறது.

2011-இல் மாலைத்தீவுகளின் ஆயுள் எதிர்பார்ப்பானது 77 ஆண்டுகளாக இருந்தது. 1990-இல் 1,000 பேருக்கு 34 என்பதிலிருந்து 2004-இல் 15 என்று குழந்தைகளின் இறப்பு வீதமானது குறைந்தது. தலைநகரம் மற்றும் பிற தீவுகளுக்கு இடையில் சுகாதாரத்தில் அதிகரித்து வந்த வேற்றுமை காணப்படுகிறது. ஊட்டக்குறை பிரச்சனையும் இந்நாட்டில் உள்ளது. இறக்குமதி செய்யப்பட்ட உணவானது இந்நாட்டில் விலை அதிகமானதாக உள்ளது.

24 மே 2021 அன்று மாலைத்தீவுகளானது உலகின் மிக வேகமாக அதிகரித்து வரும் கோவிட்-19 பெருந்தொற்றைக் கொண்டிருந்தது. முந்தைய 7 மற்றும் 14 நாட்களில் 10 இலட்சம் பேரில் மிக அதிக எண்ணிக்கையிலான நோய்த் தொற்று வீதத்தை இந்நாடு கொண்டிருந்ததென புளூம்பெர்க்கு பத்திரிகையால் தொகுக்கப்பட்ட தரவானது குறிப்பிட்டது. கோவிட்-19 சிகிச்சைக்கான அதிகரித்து வந்த தேவையானது மாலைத்தீவுகளில் பிற சுகாதார அவசர நிலைகளைக் கையாளும் தங்களது ஆற்றலைப் பாதிக்கலாமென மருத்துவர்கள் எச்சரித்தனர். இந்த நோய்ப் பரவலுக்கான காரணமானது கோவிட்-19 தீ நுண்மியின் டெல்டா வகைத் திரிபு ஆகும்.

பண்பாடு

முதன்மைக் கட்டுரை: மாலத்தீவின் கலாச்சாரம்

இதனையும் பார்க்க: மாலத்தீவின் உணவுகள் மற்றும் மாலத்தீவின் நாட்டுப்புறவியல்

காலங்களின் போக்கில் இத்தீவுகளில் குடியமர்ந்த வெவ்வேறு இனங்களைச் சேர்ந்த மக்களின் பண்பாடுகளால் மாலைத்தீவுகளின் பண்பாடானது தாக்கம் பெற்றுள்ளது.

புவகுமுலா தீவில் மாகேபுன் விழா

இசுலாமுக்கு மதம் மாறியது மற்றும் நடு இந்தியப் பெருங்கடலின் சந்திப்பில் இந்நாட்டின் அமைவிடம் ஆகியவற்றின் காரணமாக பொ. ஊ. 12-ஆம் நூற்றாண்டிலிருந்து மாலைத்தீவுகளின் மொழி மற்றும் பண்பாட்டில் அரேபியாவிலிருந்து வந்த தாக்கங்களும் காணப்படுகின்றன. தூரக் கிழக்கு மற்றும் மத்திய கிழக்குக்கு இடையிலான நீண்ட வணிக வரலாற்றின் காரணமாகவும் இந்நிலை உள்ளது.

பல தசாப்தங்களுக்கு உலகிலேயே மிக அதிக தேசிய விவாகரத்து வீதத்தை மாலைத்தீவுகள் கொண்டுள்ளது என்ற உண்மையானது பின்வருவனவற்றைப் பிரதிபலிப்பதாகக் குறிப்பிடப்படுகிறது. முழுமையாக வளர்ச்சியடைந்த வேளாண்மை உடைமைகள் மற்றும் உறவு முறைகளின் ஒரு வரலாற்றைக் கொண்டிராத, நிலையான வாழ்க்கையற்ற அல்லது பகுதியளவு நிலையான வாழ்க்கையற்ற மக்களிடையே பொதுவானவை என்று அடையாளம் காணப்பட்டுள்ள விவாகரத்து தொடர்பான தாராண்மை இசுலாமிய விதிகள் மற்றும் ஒப்பீட்டளவில் தளர்வான திருமண உறவுமுறைகள் ஆகியவற்றின் கலவையின் காரணமாக இந்நிலை உள்ளது என்ற ஒரு கோட்பாடும் முன் வைக்கப்படுகிறது.

ஊடகம்

பிஎசுஎம் நியூசானது நாட்டின் முதன்மையான ஊடக நிறுவனமாக உள்ளது. மாலைத்தீவுகள் அரசாங்கத்திற்குச் சொந்தமானதாக இது உள்ளது. 3 மே 2017 அன்று இந்த நிறுவனத்தின் செய்தித் தாளானது உலகப் பத்திரிகைச் சுதந்திர நாள் கொண்டாட்டத்தின் போது தொடங்கப்பட்டது. 2023-இல் 100, 2024-இல் 106 ஆகிய தரநிலைகளை ஊடகச் சுதந்திரச் சுட்டெண்களில் மாலைத் தீவுகள் பெற்றுள்ளது. இந்நாட்டின் முதல் தினசரி செய்தித் தாளான அவீரு டெய்லி நியூசானது இந்நாட்டின் முதல் மற்றும் நீண்ட காலம் வெளியிடப்பட்ட செய்தித்தாளாக மாலைத்தீவுகளின் வரலாற்றில் உள்ளது. 28 திசம்பர் 1978 அன்று பதிவு செய்யப்பட்ட இந்த செய்தித்தாள் 2016-ஆம் ஆண்டு மூடப்பட்டது. மாலைத்தீவுகளின் அரசியலமைப்பின் பிரிவு 28-ஆனது பத்திரிகைச் சுதந்திரத்திற்கு உத்தரவாதம் அளித்து, பின்வருமாறு குறிப்பிடுகிறது:

ஒரு நபரால் ஆதரிக்கப்பட்ட, பரப்பப்பட்ட, பதிப்பிக்கப்பட்ட எந்தவொரு தகவலின் ஆதாரத்தையும் வெளியிட வேண்டும் என எந்தவொரு நபரும் கட்டாயப்படுத்தப்படக் கூடாது.

விளையாட்டுகள்

மாலைத்தீவுகளில் பிளைபோர்டிங் விளையாட்டு

மாலைத்தீவுகளின் பண்பாட்டில் விளையாட்டுகளானவை ஆழமாகப் பதிந்துள்ளன≥ பாரம்பரியப் பொழுது போக்குகள் மற்றும் நவீன விளையாட்டு நாட்டங்கள் ஆகியவற்றை அடிப்படையாகக் கொண்டு பல்வேறு செயல்பாடுகளானவை நடத்தப்படுகின்றன. இந்தியப் பெருங்கடலால் சூழப்பட்ட இந்நாட்டின் சிதறிய தீவுகளின் புவியியலைக் கருத்தில் கொள்ளும் போது, நீர் சார்ந்த விளையாட்டுகளானவை இயல்பாகவே முக்கிய இடத்தைப் பெற்றுள்ளன. அலைச்சறுக்கானது குறிப்பாக பன்னாட்டு அங்கீகாரத்தைப் பெற்றுள்ளது. வடக்கு மற்றும் தெற்கு மாலே, தலுசுதூ மற்றும் இம்மபுசி பவளத்தீவுகள் போன்ற இடங்களானவை அலைச்சறுக்குக்கு மிகச் சரியான சூழ்நிலைகளை வழங்குகின்றன. மேற்கொண்டு, நீரடி நீச்சலும், நீரடிக் காற்று வழங்கலைக் கொண்ட நீச்சலும் மிகவும் பிரபலமானவையாக உள்ளன.

2021 தெற்காசியக் கால்பந்துக் கூட்டமைப்புப் போட்டியில் வங்காளதேசத்திற்கு எதிராக விளையாடும் மாலைத்தீவுகள்

மாலைத்தீவுகளில் கால்பந்தானது மிகப் பரவலாக விளையாடப்படும் மற்றும் இந்நாட்டில் ஆர்வம் மிகுந்த பார்வையாளர்களைக் கொண்டுள்ள விளையாட்டுகளில் ஒன்றாகத் திகழ்கிறது. பிராந்திய மற்றும் பன்னாட்டுப் போட்டிகளில் மாலைத்தீவு தேசியக் கால்பந்து அணியானது போட்டியிடுகிறது. திவேகி பிரீமியர் லீக் என்றழைக்கப்படும் தனது சொந்த கால்பந்து லீக் போட்டிகளை இந்நாடு கொண்டுள்ளது. முதன்மை நிலைக்காகப் போட்டியிடும் மாலைத்தீவுகளை சேர்ந்த பல்வேறு கால்பந்து அணிகளை இது கொண்டுள்ளது. கால்பந்து போட்டிகளானவை பொதுவாகப் பெரும் கூட்டங்களை ஈர்க்கின்றன. புத்சால் வகைக் கால்பந்தாட்டம் இந்நாட்டில் பிரபலமாக உள்ளது. குறிப்பாக, இளம் தலைமுறையினர் மத்தியில் பிரபலமாக உள்ளது. நட்பு ரீதியிலான போட்டிகள் மற்றும் போட்டித் தொடர்களுக்கென ஏராளமான உள் விளையாட்டரங்க வசதிகளுக்கான இடங்கள் வழங்கப்படுவதுடன் புத்சால் விளையாடப்படுகிறது.

உலர்ந்த தென்னை இலைகளிலிருந்து தயாரிக்கப்படும் ஒரு தைக்கப்பட்ட பந்தைக் கொண்டு விளையாடப்படும் கைப்பந்தாட்டத்தைப் போலுள்ள "பைபலா" மற்றும் மற்போரின் ஒரு வடிவமான "பெனேயி பாசி" போன்ற பாரம்பரிய விளையாட்டு நிகழ்வுகளுடன் பொதுவாக பொடு பேரு எனும் ஓர் இசை மேள மற்றும் நடன நிகழ்ச்சியானது நடத்தப்படுகிறது.

கலாச்சாரம்

மாலைத்தீவுகளில் இஸ்லாம் இந்திய வாணிப சமுதாயத்தைத் தவிர்த்த ஏனைய மாலைத்தீவினர் சுன்னி இஸ்லாம் மதப்பிரிவை சேர்ந்தவர்களாகும். மாலைத்தீவில் சட்டவரைவு கிடையாது, மாறாக இஸ்லாமிய சட்டம் நேரடியாக அமுலில் உள்ளது. இஸ்லாம் மதம் வழிபாடுகளுக்கு, பள்ளிவாசல்கள் முக்கிய நிலையங்களாகும். முஸ்லிம்களின் முக்கிய நாளான வெள்ளிக் கிழமைகளில் மதிய நேரத்துக்குப் பின்னர் வியாபார நிலையங்கள் மூடப்படுகின்றன. மாலைத்தீவில் மொத்தம் 724 பள்ளிவாசல்களும் 266 பெண்களுக்கான பள்ளிவாசல்களும் உள்ளன. மாலேயில் உள்ள பெரிய பள்ளிவாசல் பாக்கிஸ்தான், புருனை, மலேசியா, பாரசீக வளைகுடா பகுதி நாடுகள் இணைந்து பணவுதவி செய்து கட்டப்பட்டதாகும் இங்கு இஸ்லாமிய மையம் அமைந்துள்ளது.

ஐவேளை தொழுகையின் போது வேலைத்தளங்களும் கடைகளும் 15 நிமிடத்துக்கு மூடப்படும். மேலும் முஸ்லிம்கள் விரதம் இருக்கும், ரமழான் மாதத்தில் சகல உணவகங்களும் பகல் வேளையில் மூடப்படும். மற்றைய இஸ்லாமிய நாடுகளுடன் நேரடித் தொடர்பைப் பல நூற்றாண்டுகளாகக் கொண்டிருக்காதபடியால் இங்கு பழைய சமயங்களின் நம்பிக்கைகள் இஸ்லாம் சமயத்தோடு சேர்த்து பேணப்பட்டுள்ளன. அசுத்த ஆவிகள்பற்றிய நம்பிக்கை இவ்வாறான ஒன்றாகும். இதற்கு இவர்கள் பல மந்திர தந்திரங்களைப் பின்பற்றுகின்றார்கள்.

மாலைத்தீவுகளின் இசை

மாலைத்தீவுகளில் ஏனைய கலாச்சார அம்சங்களைப் போலவே அதன் இசையும் காலங்காலமாக மாலைத்தீவுகளுக்கு வந்த பிற காலாசாரங்களின் பாதிப்பைத் தன்னிடம் கொண்டுள்ளது. இதன் இசையில் மலேசிய, இந்திய, கிழக்காபிரிக்க அரபு தாக்கத்தை முதன்மையாகக் காணலாம்.

மிகப் பிரசித்தமான உள்ளூர் இசை "போடுபெரு" என அழைக்கப்படுகிறது. இது மாலைத்தீவுகளில் 11ஆம் நூற்றாண்டளவில் ஆரம்பித்ததாகக் கருதப்படுகிறது. இது கிழக்காபிரிக்க சாயலைக்கொண்டுள்ளது. இது ஒரு நடன இசையாகும். தலைமைப் பாடகர் ஒருவரோடு, கூட 15 பேர் கொண்ட குழுவினரால் இசைக்கப்படும். இக்குழுவில் மணி மற்றும் கிடை தவாளிப்புகள் வெட்டப்பட்ட மூங்கில் இசைகருவிகளாகப் பயனபடுத்தப்படும். போடுபெரு பாடல்கள் மெல்லிசையில் ஆரம்பித்துப் பின்னர் வேக இசைக்கு மாறும் அதேவேளை நடனத்தின் வேகமும் அதிகரிக்கும். பாடல் வரிகள் பலதரப்பட்ட கருத்துக்களைக் கொண்டிருக்கும். சிலவேலைகளில் கருத்துகளற்ற சத்தங்கள் கொண்டும் பாடல்கள் அமைக்கப்படுவதுண்டு.

பாரசீக வளைகுடாவில் இருந்து வந்த அரேபியர்களால் கிபி 17வது நூற்றாண்டில் கொண்டுவரப்பட்டதாகக் கருதப்படும் "தாரா" இசை மாலைத்தீவுகளின் இன்னொரு முக்கிய இசை வகையாகும். இதில் சுமார் 22 பேர் இரண்டு நிரல்களில் ஒருவரை ஒருவர் பார்த்தபடி அமர்ந்து இசைப்பார்கள். ஆண்கள் மட்டுமே இதனை இசைப்பது வழக்கமாகும். போடுபெரு இசைகளைப் போலவே இதுவும் மெல்லிசையாக ஆரம்பித்து வேக இசையாக மாறும்.

"கா ஒடி லாவா" என்பது உடல் உழைப்பு தேவையான வேலைகளின் முடிவில் இசைக்கப்படும் பாடலாகும். இது முதலாவது முகம்மது இமாதுதீன் (1620-1648), என்ற சுல்தானின் காலத்தில் மாலே கோட்டைச் சுவர் கட்ட உதவிய தொழிளாலருக்காக எழுதப்பட்டதாகும்.

20ம் நூற்றாண்டின் ஆரம்ப பகுதியில் மூன்றாம் முகம்மது சமூசுதீன் என்ற சுல்தான "இலங்கிரி" என்ற இசைவடிவை அறிமுகப்படுத்தினார். இது தாரா இசையிலிருந்து திருத்தியமைக்கப்பட்டதாகும்.

"பொலிமாலாஃபாத் நெசுன்" என்ற பாடல் சுல்தானுக்குப் பரிசுகள் வழங்கும்போது பாடப்படும் பாடலாகும். சுமார் 24 பெண்கள் இப்பாடல்களை இசைப்பது வழக்கமாகும். 1968இல் குடியரசான பிறகு சுல்தான் ஒருவர் இல்லாத காரணத்தால் இது இசைக்கப்படுவதில்லை.

விடுமுறை நாட்கள்

மாலைத்தீவுகளில் இசுலாமிய நாட்காட்டி புழக்கத்தில் உள்ளது. விடுமுறை நாட்கள் அந்நாட்காட்டியின்படி கணிக்கப்படுவதால் கிரெகொரியின் நாட்காட்டி யில் விடுமுறை நாட்கள் வருடாவருடம் வேறுபடுவதோடு ஒரு கிரெகொரியின் ஆண்டில் ஒரே விடுமுறை இரண்டு முறை வருவதற்கான சந்தர்ப்பங்களும் உண்டு.

மாலைத்தீவுகளின் பொது வங்கி விடுமுறை நாட்கள்
நாள்	பெயர்	நாட்கள்	குறிப்புகள்
ஜனவரி 1	புத்தாண்டு	1
வேறுபக்கூடியது	ஹஜ் பெருநாள்	1
வேறுபடக்கூடியது	ஈதுல் அழ்ஹா	4	ஆபிரகாம் தனது மகன் இஸ்மாயிலை பலியிட ஆயத்தமாவதைக் குறிக்கும்
வேறுபடக்கூடியது	இசுலாமிய புத்தாண்டு	1
வேறுபடக்கூடியது	மீலாதுந் நபி	1	நபிகளின் பிறந்த நாள்
வேறுபடக்கூடியது	தேசிய நாள்	1
வேறுபடக்கூடியது	இஸ்லாம் மதத்தைத் தழுவிய நாள்	1
ஜூலை 26	சுதந்திர நாள்	2
வேறுபடக்கூடியது	ரமதான்	1	ரமழான் மாத ஆரம்பம்
வேறுபடக்கூடியது	ஈதுல் பித்ர்	3	ரமழான் மாதம் முடிந்ததும்
நவம்பர் 3	வெற்றி நாள்	1
நவம்பர் 11	குடியரசு தினம்	2

அவசரநிலை

2015 ஆம் ஆண்டு நவம்பர் மாதம் 03 ஆம் திகதி இதன் தலைநகர் மாலியில் நிறுத்திவைக்கப்பட்டுருந்த சுமை வண்டியில் ராணுவ ஆயுதங்கள் ஏறாளமாக கண்டுபிடிக்கப்பட்டது. இதன் காரணமாக துணை அதிபர் ஒரு மாதத்திற்கு அவசர நிலை அறிவித்தார்.

வெளி இணைப்புகள்

• Official tourist guide to Maldives; பரணிடப்பட்டது 16 சனவரி 2020 at the வந்தவழி இயந்திரம்
• President's Office; பரணிடப்பட்டது 30 மே 2023 at the வந்தவழி இயந்திரம்
• Official website of the Government of Maldives; பரணிடப்பட்டது 12 சூன் 2020 at the வந்தவழி இயந்திரம்
• Maldives; பரணிடப்பட்டது 29 சூலை 2022 at the வந்தவழி இயந்திரம். த வேர்ல்டு ஃபக்ட்புக். நடுவண் ஒற்று முகமை.
• Maldives from UCB Libraries GovPubs
• Maldives; பரணிடப்பட்டது 29 சூலை 2018 at the வந்தவழி இயந்திரம் from BBC News
• Maldives; பரணிடப்பட்டது 2 திசம்பர் 2022 at the வந்தவழி இயந்திரம் Encyclopædia Britannica entry
• Wikimedia Atlas of Maldives
• Geographic data related to மாலைத்தீவுகள் at OpenStreetMap
• Key Development Forecasts for Maldives; பரணிடப்பட்டது 6 சூலை 2012 at the வந்தவழி இயந்திரம் from International Futures
• Constitution of the Republic of Maldives