ધર્મ અને કર્મના નામે પાખંડ : જનતા ક્યાં સુધી છેતરાશે?

શ્રદ્ધાનો સૌથી વધુ ફાયદો કોણ ઉઠાવે છે? શું નેતાઓ અને સત્તાધીશો પોતે કર્મના સિદ્ધાંતને માને છે? શું જે લોકો ધર્મના નામે સૌથી વધુ બૂમો પાડે છે, એમના આચરણ અધર્મી છે?

ધર્મ અને કર્મના નામે પાખંડ :
જનતા ક્યાં સુધી છેતરાશે?

✍️વર્ષા માનવ

આ જગતમાં લાખો લોકો એવા છે, જેઓ હિન્દુ ધર્મ અને તેના ‘કર્મના સિદ્ધાંત’ (જેવું કરશો તેવું પામશો)માં અતૂટ શ્રદ્ધા ધરાવે છે; પણ આ શ્રદ્ધાનો સૌથી વધુ ફાયદો કોણ ઉઠાવે છે? સત્તા પર બેઠેલા નેતાઓ, પ્રખ્યાત લોકો અને મોટા-મોટા ધર્મગુરુઓ. સ્ટેજ પર માઇક હાથમાં આવતાં જ આ લોકો કર્મના સિદ્ધાંતની મોટી-મોટી વાતો કરશે, લોકોને પાપ-પુણ્યના પાઠ ભણાવશે અને ધર્મના નામે આખી જનતાને ડરાવશે.

પરંતુ સવાલ એ છે કે શું આ નેતાઓ અને સત્તાધીશો પોતે આ સિદ્ધાંતોને માને છે ખરા? શું તેઓ ક્યારેય પોતાના કર્મો તરફ આત્મચિંતન કરે છે? જવાબ કડવો અને સ્પષ્ટ છે—બિલકુલ નહીં! તેઓ ધર્મને માનતા જ નથી. જો માનતા હોત, તો એમના કામ આવાં ન હોત. તેઓ માત્ર ધર્મનો ‘ઉપયોગ’ જનતાને મૂરખ બનાવી પોતાની ખુરશી અને પ્રસિદ્ધિ ટકાવી રાખવા માટે કરે છે.

માત્ર વાતો ધર્મની, કામ બધાં અધર્મના!

જો આ સત્તાધીશો અને પ્રખ્યાત લોકોને ખરેખર કર્મના સિદ્ધાંત પર વિશ્વાસ હોત, અને જો એમના મનમાં ખરાબ કર્મોના કુદરતી ન્યાયનો થોડોક પણ ડર હોત, તો પ્રજા કે દેશને નુકસાન પહોંચાડતાં પહેલાં તેઓ હજાર વખત વિચાર કરતા હોત. જો એમના મનમાં ખરેખર ધર્મ પ્રત્યે આદર હોત, તો તેઓ પોતાના અતિ સ્વાર્થ માટે ધર્મના નામે માનવ-માનવ વચ્ચે વેર ઊભું કરીને સમાજના ટુકડા ન કરતા હોત. પણ વાસ્તવિકતા સાબિત કરે છે કે એમના મનમાં કોઈ ડર નથી. એમના માટે ધર્મ આત્માને શુદ્ધ કરવાનો માર્ગ નથી, પણ વોટ મેળવવાનું અને તિજોરીઓ ભરવાનું સાધન છે. પોતાની અતિ સ્વાર્થી વૃત્તિઓ પૂરી કરવા માટે તેઓ દેશ અને સમાજનું નુકસાન કરતાં એક ક્ષણ માટે પણ અચકાતા નથી.

અહીં સત્તાધીશો અને પ્રસિદ્ધિ ધરાવતા એક મોટા વર્ગનું બેવડું વલણ (Double Standards) જોવા મળે છે. એક બાજુ ગરીબ અને સામાન્ય જનતાને ‘કર્મ’ અને ‘નસીબ’ના નામે સંતોષી જીવન જીવવાનું શીખવવામાં આવે છે, તો બીજી બાજુ તેઓ પોતે જ ભ્રષ્ટાચારનાં અને અન્યાયનાં કામો કરીને સમાજને મોટું નુકસાન પહોંચાડતા હોય છે. આ તદ્દન પાખંડ છે. સત્તાના નશામાં અંધ થયેલા આ લોકોને એ વિચાર સુધ્ધાં નથી આવતો કે, “હું આ કેવાં કર્મો કરી રહ્યો/રહી છું અને આનાથી આખા દેશનું શું થશે?”

સૌથી મોટી વિડંબના એ છે કે આ કહેવાતા મોટા લોકો કાયદાને ખિસ્સામાં રાખે છે અને ભગવાનના નામે વેપાર કરે છે. જો સત્તામાં બેઠેલા અને પ્રસિદ્ધિ મેળવેલા લોકો પોતે જ ખરાબ કર્મોનો ડર રાખતા ન હોય, તો એમને મંચ પર ઊભા રહીને ધર્મની અને કર્મોની વાતો કરવાનો કોઈ જ નૈતિક અધિકાર નથી.

જનતાએ હવે જાગીને સમજવું પડશે કે જેઓ ધર્મના નામે સૌથી વધુ બૂમો પાડે છે, એમના જ આચરણ સૌથી વધુ અધર્મી છે. આવા ધાર્મિક સત્તાધીશોના અસલી ચહેરા ઓળખવાનો સમય હવે આવી ગયો છે.

✍️વર્ષા માનવ

‘ફેસબુક.કોમ’ પર તા. 10 જુલાઈ, 2026ના રોજ પ્રગટ થયેલ સુશ્રી વર્ષા માનવની પોસ્ટ (સ્રોત : https://www.facebook.com/varsha.parmar.313/posts/pfbid0D4JrofgNTip4wXnaAnK2UFEYuSq1tW9hMcrhoChrmBbmxDcixXoRs1edek51cvLxl )માંથી, લેખિકાના અને ‘ફેસબુક’ના સૌજન્યથી સાભાર…

લેખિકા–સમ્પર્ક : સુશ્રી વર્ષા માનવ (MA, MSW & LLB), લેખિકા ‘રિથિંક સેલ્ફ ડેવલપમેન્ટ ઍન્ડ કાઉન્સેલર સેન્ટર’ https://rethink.org.in/ ના સ્થાપક છે. તેમણે તાલીમકાર તરીકે સરકારી, અર્ધસરકારી સંસ્થાઓ, સ્વૈચ્છિક સંસ્થાઓ તથા ટાટા ગૃપ, ટોરેન્ટ પાવર, મુરુગપ્પા, બૉસ, જગદંબા જેવી કંપનીઓમાં, આકાર સંસ્થા સાથે સહાયક ટ્રેનરની ભૂમિકાઓ અદા કરી.

હાલમાં તેઓ આકાર ગૃપ સાથે એસોસિયેટ ટ્રેનર અને સિનિયર ફેકલ્ટી તરીકે, આદર્શ અમદાવાદ નામની સંસ્થામાં તેજસ્વિની તેમ જ હેપ્પી કપલ – હેપ્પી લાઈફના પ્રોગ્રામ ઉપરાંત લાઈફ સ્કિલ તાલીમ પ્રોગ્રામ દ્વારા વિદ્યાર્થીઓમાં જીવન પ્રત્યેની સજાગતા ઊભી કરવાની કામગીરી કરી રહ્યાં છે. ઇ-મેલ : varshasmile09@gmail.com

નવી દૃષ્ટિ, નવા વિચાર, નવું ચિન્તન ગમે છે? તેના પરિચયમાં રહેવા નિયમિત મારો રૅશનલ બ્લૉગ http://govindmaru.com/ વાંચતા રહો. હવેથી દર મંગળવારે અને શુક્રવારે સવારે, આમ સપ્તાહમાં બે પોસ્ટ મૂકાય છે. તમારી મહેનત ને આતુરતા નકામાં નહીં જાય તેની સતત કાળજી રાખીશ..

અક્ષરાંકન : ગોવિંદ મારુ – ઇ-મેલ : govindmaru@gmail.com

પોસ્ટ કર્યા તારીખ : ૨-૧૦-૨૦૨૬