આપણું ઉમરેઠ ( Since 2009 )

૨૪.૮.૨૦૧૫ના રોજ રેલી કાઢી મામલતદારશ્રીને આવેદનપત્ર સુપ્રત કરાશે.

સમગ્ર ગુજરાતમાં પાટીદાર સમાજ અનામત મુદ્દે આંદોલન કરી રહ્યો છે ત્યાર ઉમરેઠ પંથકમાં પણ પાટીદાર સમાજ દ્વારા આંદોલનને આગળ વધારવા માટે ચર્ચા વિચારણા કરવા એક બેઠકનું આયોજન કરવામાં આવ્યું હતુ જેમાં પટેલ સમાજના લોકો મોટી સંખ્યામાં ઉપસ્થિત રહ્યા હતા. આ અંગે વધુ માહીતી આપતા ઓમ ગૃપના ભાવિનભાઈ પટેલે જણાવ્યું હતુ કે, શિક્ષણ સંસ્થામાં પ્રવેશ સહીત નોકરી માટે અનામત પ્રથાને કારણે સમાજના લોકો પાછળ રહી જાય છે,માર્ક વધુ હોવા છતા શૈક્ષણિક સંસ્થામાં પ્રવેશ થી વંચિત રહેવું પડે છે અથવા મોટી રકમ ચુકવી પેમેન્ટ સીટ પર પ્રવેશ મેળવવો પડે છે. સારું શિક્ષણ મેળવ્યા પછી પણ જ્ઞાતિના વિદ્યાર્થીઓને નોકરી મેળવતા સમયે પણ અનામત પ્રથા નડે છે, જેને કારણે યુવાનો નાસીપાસ થાય છે,આજ દીન સુધી સમાજના કેટલાય યુવાનોની જિંદગી અનામત પ્રથાને કારાણે બરબાદ થઈ ગઈ છે. ત્યારે હવે સમાજની આવનારી પેઢીને પણ આવી સમસ્યાઓથી અવગત ન થવું પડે તે માટે હવે અનામતની માગણી કરવી અનિવાર્ય થઈ ગઈ છે. તેઓએ ઉમેર્યુ હતુ કે, સદર બેઠકમાં ઉમરેઠ શહેર કોગ્રેસ પ્રમુખ શૈલેષભાઈ પટેલ, નગરપાલિકાના સભ્ય જયેશભાઈ પટેલ, અશોકભાઈ પટેલ સહીતના અગ્રણીઓ સહીત યુવાનો ઉપસ્થિત રહ્યા હતા. સદર બેઠકમાં તા.૨૪.૮.૨૦૧૫ના રોજ એસ.એન.ટી. ગ્રાઉન્ડ થી રેલી કાઢી મામલતદારશ્રીને આવેદન પત્ર સુપ્રત કરવા અંગે સર્વસંમતિ થઈ હતી. ઉલ્લેખનીય છે કે પહેલા પાટીદાર આંદોલન અંગે સકારાત્મક નિવેદન આપનાર ઉમરેઠ નગરપાલિકાના પ્રમુખ સંજયભાઈ પટેલ આંદોલન અંગે મળેલ બેઠકમાં ગેર હાજર રહ્યા હતા. ત્યારે શું હવે તેઓનો આંદોલન મુદ્દે અભિગમ બદલાઈ ગયો હશે તે યક્ષ પ્રશ્ન બની ગયો છે. બીજૂ બાજૂ સમાજના યુવાનોએ તેમ પણ જણાવ્યું હતુ કે રાજકિય કારણોથી પાલિકા પ્રમુખ પાટીદાર સમાજની બેઠકથી અગળા રહ્યા હશે પણ તેઓએ સમગ્ર આંદોલનને ટેકો જાહેર કર્યો છે. ઓમ ગૃપના ભાવિનભાઈ પટેલે જણાવ્યું હતુ કે આવનારા દિવસોમાં આંદોલનમાં ઉમરેઠના ધારાસભ્યશ્રી જયંતભાઈ પટેલને પણ સામેલ કરવાના પ્રયાસો હાથ ધરાશે.