આપણું ઉમરેઠ ( Since 2009 )

• હપ્તાનાભાર નીચે દબાયેલ પોલીસે આખરે છકડા-રીક્ષા ચાલકોને તગેડાવા પડ્યા..!

બસ સ્ટેશન વિસ્તાર, ઉમરેઠ

છેલ્લા કેટલાય સમયથી ઉમરૅઠના બસ સ્ટેશનની આસપાસ ખાનગી વાહનો તેમજ છકડા રીક્ષાન ઉભા ન રહે તે માટે કલેક્ટરે હુકમ કર્યો હોવા છતા પણ છકડા અને રીક્ષાવાળા ઉમરેઠ બસ સ્ટેશનની સામે બિન્દાસ છકડા રીક્ષાઓ ઉભી કરી ઘેરકાયદેસર રીતે ગીચોગીચ મુસાફરો ભરી ઉમરેઠ-આણંદ અને ઉમરેઠ-ડાકોર સહિત અન્ય રૂટ ઉપર પણ મોતની મુસાફરી કરતા હતા કેટલીય વાર આ રૂટો ઉપર છકડા રીક્ષા પલ્ટી મારી હોવાના પણ બનાવો બન્યા છે અને મુસાફરો ઘાયલ પણ થયા છે. છતા પણ હપ્તાના પહાડ નીચે દબાયેલ પોલિસ તંત્ર હંમેશા ગાંધીજીના ત્રણ વાંદરાની ભૂમિકામાં દેખાતું હતું પરંતું લગભગ પંદર વીશ દિવસ પહેલા ગાંધીનગરના કોઈ ઉચ્ચ અધિકારી કે પત્રકાર ઉમરેઠ બસ સ્ટેશન પાસેથી પસાર થતા તેઓની કાર સામે એક છકડો આવી ગયો હતો જ્યારે છકડો રસ્તાની વચ્ચે હોવાથી કારમાં બેઠેલા આ સરકારી અધિકારી કે પત્રકારે છકડા ચાલકને પોતાનો છકડો બાજૂમાં લેવા જણાવ્યું હતું, પરંતુ હપ્તા આપી પોતાની મનમાની કરતા આ છકડા ચાલકે ઉપરથી કાર ચાલકને ગમે તેમ વાત કરી હતી.

જ્યારે બધુ નાટક જોઈ કારમાં બેઠેલા તે અધિકારી કે પત્રકારે ત્યાંથીજ કોઈ વ્યક્તિને ફોન કરી ઉમરેઠ બસ સ્ટેશન વિસ્તાર માંથી બધા છકડા હટાવવા નિર્દેશ કર્યો હતો અને તેઓએ જે કોઈ વ્યક્તિને ફોન કર્યો હતો તેને રીતસર ખખડાવી ઉમરૅઠ બસ સ્ટેશન વિસ્તારમાંથી તાબળતોળ છકડા રીક્ષા દૂર કરવા મોટા અવાજે કહ્યું હતું, જેના ગણતરીના કલાકોમાં હાંફતા હાંફતા આવી ચડેલ પોલીસ કર્મીઓએ તાબળતોળ ઉમરેઠ બસ સ્ટેશન સામેથી છકડા રીક્ષાઓ તગેડી મુકી હતી.

જ્યારે આમ તુરંત પોલીસ હરકતમાં આવતા પેલો કાર ચાલક કોણ હતો..? જેના એકજ ફોનથી પોલીસ તંત્ર હરકતમાં આવી ગયું. તે કોઈ સરકારી અધિકારી હતો..? કે પછી કોઈ મોટો પત્રકાર..? જે આજે પણ બસ સ્ટેશન વિસ્તારના લોકો માટે યક્ષ પ્રશ્ન છે. પરંતુ એક વાત તો ચોક્ક્સ છે કે ઉમરેઠ બસ સ્ટેશન સામેથી છકડા રીક્ષાઓનું સરનામું બદલાતા હવે બસ સ્ટેશન સામે શિપીંગ સેન્ટરમાં દૂકાનો ધરાવતા વહેપારીઓમાં આનંદની લાગણી દેખાઈ રહી છે. આ પહેલા પણ ઉમરેઠ પોલીસ ધ્વારા બસ સ્ટેશન વિસ્તાર માંથી અવાર નવાર છકડા રીક્ષા ચાલકોને હટાવવાની કામગીરી કરવામાં આવતી હતી પરંતુ તે નાટક વહેલું પૂર્ણ થતું હતુ અને છકડા રીક્ષા પૂનઃ શરૂ થઈ જતા હતા જ્યારે આજે છકડા રીક્ષા ચાલકોને બસ સ્ટેશન સામેથી તગેડી મુકે પંદર દિવસ જેટલો સમય થઈ ગયો હોવા છતા પૂનઃ છકડા રીક્ષા ચાલુ ન થતા છેક ઉપરથી દબાણ આવ્યું હોવાની લોકો ચર્ચા કરી રહ્યા છે.

છકડા-રીક્ષા વાળાની સુડી વચ્ચે સોપારી જેવી હાલત..

છકડા રીક્ષાવાળાની સુડી વચ્ચે સોપારી જેવી હાલત થઈ ગઈ છે.એકતો પહેલેથી હપ્તા આપી ધંધો કરે છે ઉપરથી હવે બસ સ્ટેશન સામેથી છકડા રીક્ષા તગેડી દેવાતા તેઓનો ધંધો મંદ થઈ ગયો છે, કેટલાક રીક્ષા ચાલકો ચર્ચા કરી રહ્યા છે કે હજૂ પણ પોલીસના ભાડુતી માણસો તેઓ પાસેથી હસ્પ્તા લઈ જાય છે..! ત્યારે છકડા રીક્ષા ચાલકોને આવી રીતે હેરાન કરી પોલીસ શું સાબિત કરવા માગે છે..?

છકડા-રીક્ષા ચાલકો પાસે હપ્તો ઉઘરાવનાર વ્યક્તિ કોણ…?

ઉમરેઠ બસ સ્ટેશન સામેથી છકડા રીક્ષાને તગેડી મુક્યા હોવા છતાપણ કેટલાક છકડાવાળાઓ ચર્ચા કરી રહ્યા છે કે, તેઓ પાસેથી કેટલાક પોલીસના દલાલો હપ્તા ઉઘરાવી જાય છે ત્યારે આ હપ્તા પોલીસ સુધી ખરેખર પહોંચે છે કે, પછી પોલીસના નામે કોઈ ચરી ખાય છે તે તપાસ નો વિષય છે. અવાર નવાર બાઈક ઉપર છકડા રીક્ષા ચાલકો પાસે ગુફતેગુ કરનાર આ શંકાસ્પદ વ્યક્તિ કોણ છે..? તેની પણ ચોફેર ચર્ચાઓ થઈ રહી છે.