Andorra la Vella

	Andorra la Vella
	Symboal
	Bestjoer
Lân	Andorra
Parochy	Andorra la Vella
	Sifers
Ynwennertal	26.658 (2026)
Oerflak	12 km²
Hichte	1.023 m
	Oar
Postkoade	AD500
Netnûmer	+376
	Offisjele webside
	www.andorralavella.ad
	Kaart
	;

Andorra la Vella (Frânsk: Andorre-la-Vieille) is de haadstêd fan Andorra , in lytse steat midden yn 'e Pyreneeën. De stêd hie neffens rûzing yn 2026 26.758 ynwenners en is njonken in sintrum foar de ekonomy en kultuer ek de wichtichste parochy fan it lân.

De stêd stiet bekend om de belestingfrije winkels. Dêrom komme in soad toeristen út de buorlannen en oare Jeropeeske lannen nei dit plak om bygelyks goedkeap tabak en alkohol te keapjen.

Geografy

Om't de stêd yn in komfoarmige delling leit, hat Andorra troch it ferkear te meitsjen mei loftfersmoaring. Njonken Andorra la Vella sels en it buorskip La Comella krekt súdlik fan it stedssintrum leit yn 'e parochy ek noch it doarp Santa Coloma (2.944 ynw.) en it byhearrende buorskip La Margineda.

Demografy

De oarspronklike Andorranen, etnyske Katalanen, meitsje mar in tredde part (33%) fan 'e befolking út. De mearderheid fan 'e befolking is Spaansk (43%) (dy't sawol Spaansk as Katalaansk prate). Oare grutte minderheden binne Portegezen (11%) en Frânsen (7%).

Befolkingsûntwikkeling
Jier	1865	1947	1965	1981	1985	1988
Ynwennertal	1.100	1.975	8.833	14.783	17.201	19.566
Jier	1995	2000	2005	2007	2013
Ynwennertal	21.984	20.845	23.587	24.574	22.546

It besjen wurdich

De âlde binnenstêd fan Andorra la Vella stiet bekend om de âlde strjitten en huzen. De sintrale Sint-Stefanustsjerke (Katalaansk: església de Sant Esteve) wurdt omskreaun as in skildereftich ûnderdiel fan 'e stêd en stiet foar it riedshûs oer. De tsjerke is yn 'e 11e iuw yn romaanske styl boud. In pear strjitten fierderop leit it histoaryske parlemintsgebouw fan Andorra, de Casa de la Vall. Op it pleintsje dêrfoar wurde alle jierren kulturele eveneminten organisearre. It regearingsgebouw leit oan it Plaça del Poble, tichteby it parlemintsgebouw.

Nei alle gedachten is it âldste gebou in oare tsjerke, de Sint-Kolumbatsjerke yn Santa Coloma, dy't út de 9e iuw stammet. Dêrnjonken is Santa Coloma bekend om de iuwenâlde Sint-Finsintsiusstjerke, dy't boppe it doarp úttuorket. Andorra la Vella telt yn meiïnoar seis beskerme monuminten, wêrfan fjouwer yn it sintrum, de Sint-Kolumbatsjerke te Santa Coloma en de Pont de la Margineda by La Margineda.