屬格

屬格，粵拼：suk6 gaak3，參見英文：genitive，歐文簡寫 gen，係名詞其中一格。簡化講，語法格涉及名詞要視乎佢喺語句入便扮演咩角色而變樣，而屬格就係指名詞做緊「擁有者」嘅角色嗰時嘅位置。用粵語做類比，以下呢句話，阿珍就係處於擁有者個位，功能上相當於會用屬格嚟表達嘅成份：

阿珍部手機爛咗。

對屬格等語法格嘅分析，傳統用於歐洲語言。例如英文喺一般情況下，男性嘅第三人稱代名詞係 he 但假如語句中嗰個男性佢，係扮演擁有者嘅角色嗰陣，就唔係用 he 而係要將隻詞變做其屬格形態 his，例如想講佢本書唔見咗：

錯誤例子：He book is missing.

正確例子：His book is missing.

喺呢度 his 就係由原本主格嘅 he 轉咗做屬格形態 his，用嚟表示佢嘅噉嘅意思。就算講者唔使用屬格，聽者依然可能聽得明佢想講乜，但講出嗰句說話就會錯語法。

某啲語言，譬如係拉丁文同俄文等，被指係語序比較靈活，可以靠格嘅變化嚟清楚表達邊樣嘢屬於邊個。

基本概念

内文：語法格

睇埋：名詞、擁有 (語言學)同擁有式

用英文做例。廿一世紀初嘅英文被指係已經演變到冇咩格詞形變化可言，得返代詞等少數嘅詞語會有格詞形變化：

1. I hear him.

   → 粵譯：字面解係我聽到佢，意思係我聽到佢講嘢，或者聽到佢製造嘅其他聲音。

2. I hear his dog.

   → 粵譯：字面解係我聽到佢隻狗，可能係隻狗喺度吠緊。

响句一當中，him 係男性佢，做緊句子嘅賓語；而响句二入面，his 係男性佢嘅屬格形態，表示緊佢嘅噉解。即係話，英文中嘅男性佢要按照隻詞做緊主語、賓語定係表示擁有，而變樣​——​做主語用 he，做賓語用 him 而表示擁有就用 his。

屬格係語法格一種，用嚟標記某名詞係用嚟修改第個名詞嘅，喺英文中通常係行先嗰個名詞「擁有」跟喺佢後面嗰個，而簡單講屬格嗰個就係「擁有者」嘅名詞嘅位。而英文以外嘅歐洲語言仲有更複雜嘅屬格變化，諸如拉丁文、德文等英文以外嘅日耳曼語言、以至捷克文同俄羅斯文等嘅多種斯拉夫語言，唔淨只係代名詞會做主語定做擁有者會唔同咗樣，而係名詞普遍都有噉嘅情況。

所謂擁有未必真係擁有，而係可以係第種關係。例如，如果用現在分詞將一句句子變成名詞短語，原句嘅主語喺德文會變屬格；英文本來都係一樣，但係而今喺非正式場合好多時都係變賓格而唔係變屬格。

喺某啲語言，例如芬蘭文，詞根嘅基本形式可以唔係主格而係屬格。

漢語類比

傳統上，語法格相關嘅分析主要用於印歐語言。不過好似粵語同官話等嘅漢語都有類似屬格嘅結構。

嘅、的句

漢語中嘅屬格擁有關係，一般由以下三個部分組成，可以噉思考：

擁有者 + 屬格標記 + 被擁有者

例如喺粵語入便，最常見嘅屬格標記係嘅一詞，譬如話我嘅志願係指緊我所擁有嘅志願、屬於我嘅志願，結構：我係擁有者，嘅係屬格標記，志願係被擁有者。呢種結構同官話中嘅的結構高度相似：

我的志願，普拼：wǒ de zhì yuàn

意思基本等同粵語我嘅志願，結構：我係擁有者，的係屬格標記，志願係被擁有者。

量詞活用

除咗嘅、的呢種「標準」做法外，粵語仲可以直接用量詞嚟表示擁有，而唔使嘅。例如以下用普通嘅量詞：

我隻狗

意思係指我所擁有嘅狗，結構係：我係擁有者，隻本來係量詞但充當屬格標記，狗則係被擁有者。同樣嘅構造仲可見於我部手機指我所擁有嘅手機、阿萍件衫指阿萍所擁有嘅衫、同埋阿明架車指阿明所擁有嘅車等。

量詞啲亦有類似功能，仲可以進一步標示被擁有方嘅數量多過一個：

我啲書

係指我所擁有嘅書，而且呢啲書數量超過一本。例句仲有你啲同事、佢啲仔女等，都係將你、佢等嘅擁有者同同事、仔女等嘅被擁有者，用啲一詞連接起嚟，表示屬格噉嘅關係同時被擁有方嘅數量多過一個。

量詞扮演屬格標記噉嘅作用，算係有粵語特色嘅用法，能夠令語句簡化。

漢語以外

印歐語言

以印歐語言嚟講，英文喺語法格系統上經過咗高度嘅簡化。廿一世紀初嘅英文，整體上冇咩格變化可言，但仍然保留咗屬格嘅基本用法。屬格常用嚟表示擁有、隸屬或者類似嘅關係，一般名詞主要透過兩種方式表達：

• 加 's，例如：A-ming's book 表示阿明嘅書；
• 用 of 結構，例如：the color of the sky 表示個天嘅顏色；

以 's 結構為例，以下係一句簡單嘅英文語句，當中用咗屬格標示物件嘅擁有者：

I	saw	my	friend's	book	.
S	V	O
代名詞	過去式動詞	所有代詞	屬格名詞	名詞
我	見到	我嘅	朋友嘅	書

句中嘅 friend's 就係屬格形式，表示本書係由朋友擁有嘅。除咗加喺表示人物嘅名詞後，英文嘅 's 有時亦可以加喺時間詞度，例如 today's news 表示今日嘅新聞，又或者係加喺抽象概念度，例如 the company's policy 表示間公司嘅政策。使用得宜可以令句子更簡潔、更清晰。

其他語言

其他非印歐系非漢語嘅語言，都有方法表示屬格，或者至少有類似嘅功能。

日語都有方法標示擁有者同被擁有者間嘅關係。日語中最常見嘅屬格標記係助詞のno，讀音近似粵拼：no1 ，句法上係擺喺擁有者後，被擁有者前，形成以下結構：

擁有者 + の + 被擁有者

例如：

わたし の 車，日羅：watashi no kuruma

可以噉分析，結構係わたし表示我，係擁有者；の係屬格標記；車則係車，屬於被擁有者。呢種構造喺語法功能上，同粵語嘅我架車或者官話嘅我的車高度類似。而の除咗可以表示擁有關係，仲可以用嚟表達所屬分類、材料來源等等，係日語嘅語法入面一個極常用而且多功能嘅元素。

睇埋

• 主格
• 賓格
• 與格
• 變格
• 下位詞