არტურ ზაის-ინკვარტი

არტურ ზაის-ინკვარტი Arthur Seyß-Inquart
ზაის-ინკვარტი 1940-იან წანეფს
ავსტრიაშ კანცლერი
პოსტის გერინაშ ბორჯი
11 მელახი, 1938 – 13 მელახი, 1938
პრეზიდენტი	ვილჰელმ მიკლასი
წიმოხონი	კურტ შუშნიგი
მონძე	პოსტიქ გეუქვჷ
დუნაბადი	22 კვირკვე, 1892 შტანერნი, ავსტრია-უნგრეთი
ნაღურა	16 გჷმათუთა, 1946 (54 წანერი) ნიურნბერგი, მორსხუეეფიშით ოკუპირაფილი გერმანია
ღურაშ ბაძაძი	ღურათ საჯება
პოლიტიკური პარტია	ნაცისტური პარტია (1938–1945)
ალმასქუ	გერტრუდ მაშკა
სქუალეფი	3
ხეშმოჭარუა

არტურ ზაის-ინკვარტი (გერმ. Arthur Seyß-Inquart; დ. 22 კვირკვე, 1892 — ღ. 16 გჷმათუთა, 1946) — ავსტრიალი ნაცისტი პოლიტიკოსი, ავსტრიაშ კანცლერი ჟირ დღაშ გოძვენას 1938 წანაშ 11-13 მელახის, ნაცისტურ გერმანიაშით ავსტრიაშ ანშლუსიშახ.

ზაის-ინკვარტი მონაწილენდჷ მაართა მოსოფელიშ ლჷმას, სოდეთ დიჭკირჷ. ლჷმაშ თებაშ უკულ, ვენაშა დირთჷ დო იურისტო ქიდიჭყჷ მუშობა. 1920-იან წანეფშე აქტიურო ოკათუდჷ პოლიტიკურ პროცესეფს დო რდჷ ავსტრიაშ გერმანიაწკჷმა აკოართაფაშ მოხუჯე. ზაის-ინკვარტი წოროხანდენდჷ ავსტრიაშ ნაცისტურ პარტიაწკჷმა. ზაის-ინკვარტი მოღალენდჷ ენგელბერტ დოლფუსიშ დო კურტ შუშნიგიშ ადმინისტრაციეფს დო უკებუდჷ შხვადოშხვა შანულამ პოსტეფი. 1938 წანაშ 11 მელახის შუშნიგიქ კანცლერიშ პოსტიშე გეგნოდირთჷ. თიშ გინორინაშ უკულ კანცლერო ზაის-ინკვარტიქ. თიქ ხუჯი დუკინჷ ავსტრიაშ ანშლუსის. შედეგო, ავსტრიაქ გინირთჷ ნაცისტური გერმანიაშ ართ-ართ პროვინციათ.

მაჟირა მოსოფელიშ ლჷმაშ მიმალობას, ზაის-ინკვარტი მოღალენდჷ პოლონეთის, უკულ ნიდერლანდეფს. 1940 წანაშე რდჷ ოკუპირაფილი ნიდერლანდეფიშ რაიხსკომისარი. ზაის-ინკვარტი, თაშნეშე რდჷ შუცშტაფელიშ მაკათური, რანგით ობერგრუპენფიურერი. ნიდერლანდეფიშ რაიხსკომისარობაშ გოძვენას თინა აწარმენდჷ ტერორიშ პოლიტიკას: ურიეფიშ უმეტაშობაქ გინოხორაფილქ დო ჸვილირქ იჸუ.

მაჟირა მოსოფელიშ ლჷმა თებაშ უკულ, ნიურნბერგიშ პროცესის ზაის-ინკვარტი გასამართეს, ქეკადვეს შხვადოშხვა დანაშურეფი დო ღურაშ განჩინება გეგშუღეს. 1946 წანაშ 16 გჷმათუთას თინა ქეგთაშქვიდეს.

ქოძირით თაშნეშე

• ავსტრიაშ კანცლერი
• ანშლუსი