“સમાધી”

“યુગોની અનેકે લગાવી સમાધી,
અને ચેતનાથી પચાવી સમાધી

હકીકી, મિજાજી, ભુલાવે સમસ્તી,
સમર્પણ કરીને જગાવી સમાધી

સજે સેજ રજની વિતે સંગ સજની,
સુમનની સુવાસે સજાવી સમાધી

મરણની પછી પણ સજીવન થયેલો,
તમારા હ્રદયમાં બનાવી સમાધી

સુરાલય મહીં જ્યાં “સિફર” ખુદ ગયા ત્યાં,
ફકત એક જામે કરાવી સમાધી…..

“સિફર”

“કરી બેઠો”

“પરીચય છે નિયમનો પણ, અકલ્પી કળ કરી બેઠો,
સફળતા પામવા હું એટલુ જોખમ કરી બેઠો,

અજાણ્યા માર્ગ પર મળતા, અજાણ્યા જણ ઘણા કિંતુ,
ફકત કો’ એક વ્યક્તિ પર નિછાવર મન કરી બેઠો,

લગીરે આશ રાખત ના, તમારા આવવાની પણ,
તમોને જાણવા ખાતર, સ્વયમથી છળ કરી બેઠો,

ફરીને પીઠ દેખાડી, છતાં અણસાર ના આપ્યો,
તમારા આવવાના માનમાં ઉત્સવ કરી બેઠો,

“સિફર” તે પણ ખરી કીધી, કશો વિદ્રોહ ના કર્યો,
ખુદા ખુદ પાડ માને એમ કાં આખર કરી બેઠો?

“સિફર”

“પ્રતિબિંબ”

“ જે હતા અમારી નજીક સૌ,તે થયાં પરાયા શરીફ સૌ,

આ જીગર પરસ્તી ઘણી નડી, દુશ્મનો જ રાખ્યા સજીવ સૌ,

કેદમાં તમારી નથી છતાં, મે હજી ઉતાર્યા ન બંધનો,

કાં હશે અધૂરી મનોવ્યથા, કાં હશે અકલ્પ્યા નસીબ સૌ,

જે ન થોભતો કે ન હારતો, એ સમય તણો આમ ફેંસલો,

સુર્ય જ્યાં થતો મ્હાત રાતનાં, ત્યાં જુગનુ સરીખા હરીફ સૌ,

બિંદુમાં ડુબી જાવ છે મજા, ના કરો પ્રયત્નો તરાવવા,

શાંત સિંધુને થપ-થપાવતા, પ્રતિબિંબ થાશે અજીબ સૌ,

મૃત્યુનો સમય જ્યાં નજીક હો, શોકમાં હશે ત્યાં સગા-સખા,

લાશ જ્યાં “સિફર”ની હસી રહી, ત્યાં જ રોઈ પડશે ઘડીક સૌ.”

“સિફર”