Posted in ઓડીયો આલ્બમ, કહો આપણે ક્યારે મળીએ?, ગઝલ, ગાયત્રી ભટ્ટ, યુગલ ગીત, રિષભ મહેતા on જાન્યુઆરી 4, 2010| 1 Comment »
કોઈ પણ રીતે મળી જા તું મને,
ઝૂરતો પાછો મૂકી જા તું મને.
કોઈ પણ રીતે મળી જા તું મને,
ઝૂરતી પાછી મૂકી જા તું મને.
દાવ પર મૂકી છે મારી લાગણી,
ખેલ સમજીને રમી જા તું મને.
ઝેર જેવી જિંદગી જીવું છું હું,
હોય જો મીરાં તો પી જા તું મને.
એકલી છું કેટલી તારા વગર,
ભીડમાં મૂકી ભૂલી જા તું મને.
એકલો છું કેટલો તારા વગર,
ભીડમાં મૂકી ભૂલી જા તું મને.
– રિષભ મહેતા ‘બેતાબ’
Posted in ઓડીયો આલ્બમ, કહો આપણે ક્યારે મળીએ?, ગઝલ, ગાયત્રી ભટ્ટ, યુગલ ગીત, રિષભ મહેતા on જાન્યુઆરી 4, 2010| Leave a Comment »
શું થશે આગળ હવે પાછળ હવે ?
છોડ ચિંતા મન મૂકીને મળ હવે !
આપણી વચ્ચે કશું તો છે જરૂર,
લોક અમસ્તાં ના કરે અટકળ હવે.
કંઈક એવું છે કે જે બોલાય ના,
આંખથી આંખને તું સાંભળ હવે.
કોઈની લાગી જશે તુજને નજર,
આંખમાં આંજ્યા ન કર કાજળ હવે.
કેમ શોધ્યું પણ હવે જડતું નથી ?
ક્યાં ગયું મળવાનું પેલું સ્થળ હવે ?
– રિષભ મહેતા ‘બેતાબ’
Posted in ઓડીયો આલ્બમ, કારણ તમને પ્રેમ કરું છું, ગઝલ, ગાયત્રી ભટ્ટ, યુગલ ગીત, રિષભ મહેતા on ડિસેમ્બર 27, 2009| 2 Comments »
એમ શાને થાય છે તારા વગર રહેવાય ના ?
ને વળી આ લાગણીને પ્રેમ પણ કહેવાય ના !
ખુબ ઊંડેથી તને હું સાદ દઉં છું ને છતાં,
રૂબરૂમાં તું મળે તો “કેમ છે?” પુછાય ના.
રાહ તારી જોઉં કે નીરખું કે હું ઝંખું તને ?
ત્રણ ઘટનાઓથી આગળ આ કથા કંઈ જાય ના.
એક દી’ તું આ નજરથી દૂર થઈ જાશે અને,
હું કહી પણ ના શકીશ કે કંઈ મને દેખાય ના.
મ્હેકતો ગજરો હશે તારી લટોમાં ને અહીં,
એ સ્થિતિ મારી હશે કે શ્વાસ પણ લેવાય ના.
આ બધું શાને લીધે છે આ બધું શા કારણે ?
આ બધું કહેવાય ના સહેવાય ના સમજાય ના.
– રિષભ મહેતા ‘બેતાબ’
Posted in ઓડીયો આલ્બમ, કારણ તમને પ્રેમ કરું છું, ગઝલ, ગાયત્રી ભટ્ટ, યુગલ ગીત, રિષભ મહેતા on ડિસેમ્બર 27, 2009| 1 Comment »
મારો ન થઈ શક્યો હું તમારો થયા વગર,
ઝીલે તો કોણ આભને બોલો ધરા વગર !
ઝૂકી જરાક હું જો તમારા ખભા ઉપર,
પંખી રહી શક્યું જ ના ટહૂકો કર્યા વગર.
ધબકાર એટલે જ હ્રદયના વધી ગયાં,
આવી વસ્યું છે કોઈ કશું પણ કહ્યાં વગર.
આવી વસ્યાં છો હોઠ ઉપર નામ થઈ તમે,
ચુંબન તમારું સાંપડ્યું તમને ચૂમ્યાં વગર !
આથી વધુ શું આપું પુરાવો હું પ્રેમનો,
તમને નિહાળું છું બધે તમને મળ્યા વગર.
– રિષભ મહેતા ‘બેતાબ’
Posted in ઓડીયો આલ્બમ, ગઝલ, ગાયત્રી ભટ્ટ, દિલમાં તું છે, મુક્તક, યુગલ ગીત, રિષભ મહેતા on ડિસેમ્બર 20, 2009| 5 Comments »
ગઝલ તો ગાઉં પણ તારા સુધી એ જાય છે કે નઈં ?
મને જે થાય છે દિલમાં, તને તે થાય છે કે નઈં ?
“તને ચાહું છું” એવું બોલતો હરશબ્દ આ મારો,
હવે જોવાનું છે કે એ તને સંભળાય છે કે નઈં !
~~~~~~~~~~~~~~~
હું શબ્દ છું તો સૂર મારો તું થજે સનમ,
થઈને પ્રણયનું ગીત બધે ગૂંજજે સનમ !
પહેલાં નિહાળજે મને નખશીખ ને પછી,
મારી જ હાજરીમાં મને ઝૂરજે સનમ !
મુઠ્ઠીમાં ધૂળ લઈને હવામાં તું ફેંકજે,
કણકણમાં તે પછી મને તું ઢુંઢજે સનમ !
કારણ મને મળી રહે તુજને મનાવવા,
કોઈ નજીવી વાત પર તું રૂઠજે સનમ !
– રિષભ મહેતા ‘બેતાબ’
Posted in ઓડીયો આલ્બમ, ગઝલ, ગાયત્રી ભટ્ટ, દિલમાં તું છે, યુગલ ગીત, રિષભ મહેતા on ડિસેમ્બર 20, 2009| Leave a Comment »
જિંદગીભર આપણો છે સાથ, સાથે ચાલ તું !
હાથમાં મારા મૂકી દે હાથ, સાથે ચાલ તું !
હરકદમ પર કેટલાં પ્રશ્નો કસોટી કેટલી !
આ હજી તો માત્ર છે શરુઆત, સાથે ચાલ તું !
આપણું આ મૌન પણ દુનિયાને સંભળાતું હશે,
લે હવે કરવી નથી કંઈ વાત, સાથે ચાલ તું !
કોઈ પણ મારા વિચારોમાંય ફરકે ના હવે,
એકલી છે ખૂબ મારી જાત, સાથે ચાલ તું !
– રિષભ મહેતા ‘બેતાબ’
Posted in ઓડીયો આલ્બમ, કહો આપણે ક્યારે મળીએ?, ગઝલ, ગાયત્રી ભટ્ટ, યુગલ ગીત, રિષભ મહેતા on ડિસેમ્બર 17, 2009| 2 Comments »
ફૂલ શા નાજુક સંબંધ સ્થાપીએ,
જે ચૂંટે એનેય ખુશ્બુ આપીએ.
આપણી વચ્ચે પડ્યો અલગાવ જે,
આંસુઓથી એનું અંતર માપીએ.
છે ગતિને પણ જરૂરી સંગતિ,
ચાલ, સાથે ચાલી રસ્તો કાપીએ.
“જાવ, તમને હું કદીયે ના મળું…”
આ કસમને હરપળે ઉથાપીએ.
– રિષભ મહેતા ‘બેતાબ’
Posted in 'આશકા', 'તિરાડ', 'સંભવામિ ગઝલે ગઝલે', ઓડીયો આલ્બમ, કહો આપણે ક્યારે મળીએ?, કારણ તમને પ્રેમ કરું છું, ગઝલ, ગઝલ સંગ્રહ, ગરબા-ગીત સંગ્રહ, ગાયત્રી ભટ્ટ, ગીત, દિલમાં તું છે, મુક્તક, યુગલ ગીત, રિષભ મહેતા on ડિસેમ્બર 16, 2009| 11 Comments »
હે પ્રિયજન,
પ્રેમનાં મારાં આ સરનામે હું રિષભ મહેતા, આપનું ખુબ ખુબ સ્વાગત કરું છું !
આજે હું મારા ૬૦માં જન્મદિવસે મને આપની સમક્ષ આ રીતે પોતાનાં અસ્તિત્વને ખુલ્લું મૂકતાં ખુબ જ આનંદ અનુભવી રહ્યો છું. આ સાથે જ આપને દર અઠવાડીયે મારી એક રચના અહીં માણવા માટે આપને આમંત્રું છું, અને એ રીતે મને હંમેશા આપની પ્રતિક્ષા રહેશે.
તે દરમિયાન આપને હું આ પ્રેમના સરનામાં વિશે કંઈક મારી વાત સાંભળવા આમંત્રું છું. જે તમને “સરનામું પ્રેમનુ…” પાના હેઠળ મળી રહેશે. તદુપરાંત મારા “તિરાડ” ગઝલસંગ્રહની પ્રસ્તાવના આપને “તિરાડ – ગઝલસંગ્રહ” પાના પર મળી રહેશે.
સાથે સાથે હજી નવી સામગ્રી અહીં ઉમેરાતી રહેશે, જે પણ મારી જેમ જ આપની પ્રતિક્ષામાં મગ્ન રહેશે…
