Jump to content

Կենսապահովման ծախսեր

Վիքիպեդիայից՝ ազատ հանրագիտարանից

Կենսապահովման ծախսեր (անգլ.՝ cost of living), անհատի կամ տնային տնտեսության համար որոշակի կենսամակարդակի ապահովման ծախսեր։ Կենսապահովման ծախսերի հաշվարկներն օգտագործվում են նաև տարբեր աշխարհագրական տարածքներում որոշակի կենսամակարդակի ապահովման ծախսերը համեմատելու համար[1]։ Տարբեր վայրերում կենսապահովման ծախսերի տարբերությունները կարելի է չափել գնողունակության համարժեքության ցուցանիշներով։

Չափում

[խմբագրել | խմբագրել կոդը]

Կենսապահովման ծախսերը որոշակի կենսամակարդակի ապահովման ծախսերն են։ Ժամանակի ընթացքում կենսապահովման ծախսերի փոփոխությունները կարող են արտահայտվել կենսապահովման ծախսերի ինդեքսի միջոցով։ Կենսապահովման ծախսերի հաշվարկները կարող են օգտագործվել տարբեր աշխարհագրական տարածքներում որոշակի կենսամակարդակի պահպանման ծախսերը համեմատելու համար[1]։ Տարբեր վայրերում կենսապահովման ծախսերի տարբերությունները կարելի է չափել գնողունակության համարժեքության ցուցանիշներով։

Կենսապահովման ծախսերի մեջ ներառվում են սննդամթերքի, բնակարանի և էլեկտրաէներգիայի ծախսերը[2]։ Էլեկտրաէներգիայի ծախսերը ներառում են ջեռուցման, լուսավորության և սննդի պատրաստման ծախսերը։ Միացյալ Թագավորությունում միջին տնային տնտեսության էլեկտրաէներգիայի ծախսերի մոտ 18%-ը բաժին է ընկնում ջրային ջեռուցմանը[3]։

Սպառողական գների ինդեքսը (ՍԳԻ) չափում է բնակչության անձնական սպառման համար ձեռք բերված ապրանքների և ծառայությունների փաստացի հաստատագրված կազմի սպառողական զամբյուղի արժեքի փոփոխությունը որոշակի ժամանակահատվածում[4]։ Ժամանակի ընթացքում ՍԳԻ-ի աճը ցույց է տալիս տվյալ ժամանակահատվածում կենսապահովման ծախսերի աճը։ Մեկ տարվա ընթացքում սպառողական գների ինդեքսի աճը կոչվում է նաև գնաճի մակարդակ։

Սպառողական գների ինդեքսը ըստ երկրների 2024 թվականին՝ համեմատած 2010 թվականի հետ՝ տոկոսային արտահայտությամբ[5]

     100-ից 110      110-ից 120      120-ից 130      130-ից 140      140-ից 150      150-ից 200      200-ից 300      300-ից 1000      1000-ից ավելի      տվյալներ չկան

«Economist Intelligence Unit»-ը տարեկան երկու անգամ հրապարակում է կենսապահովման ծախսերի համաշխարհային հետազոտության արդյունքները, որը համեմատում է ավելի քան 400 առանձին գներ՝ 160 ապրանքների և ծառայությունների համար։ Դրանք ներառում են սննդամթերքը, խմիչքները, հագուստը, կենցաղային պարագաներն ու անձնական խնամքի միջոցները, բնակարանների վարձավճարները, տրանսպորտը, կոմունալ ծառայությունների վճարները, մասնավոր դպրոցների վարձերը, տնային սպասարկման ծառայությունները և հանգստի ծախսերը։ Ուսումնասիրությունն ինքնին առցանց գործիք է, որը նախատեսված է կենսապահովման ծախսերի համար նախատեսվող հավելավճարները հաշվարկելու և արևմտյան կենսակերպ վարող կորպորատիվ ղեկավարների համար փոխհատուցման փաթեթներ կազմելու նպատակով։ Ուսումնասիրությունը ներառում է քաղաքների միջև կենսապահովման ծախսերի հեշտ ընկալելի համեմատական ինդեքսներ։ Հարցումն ապահովում է քաղաքների միջև համեմատելի կենսապահովման ցուցանիշներ։ Բոլոր քաղաքները համեմատվում են հիմք ընդունված Նյու Յորքի հետ, որի ինդեքսը սահմանված է 100։ Ուսումնասիրությունն իրականացվում է ավելի քան 30 տարի։

2017 թվականի մարտին Սինգապուրը չորրորդ տարին անընդմեջ շարունակում է մնալ աշխարհի ամենաթանկ քաղաքը։ Հազվադեպ դեպք է գրանցվել, երբ ամենաթանկ քաղաքների լավագույն հնգյակի կազմը նախորդ տարվա համեմատ ամբողջությամբ անփոփոխ է մնացել[6]։ Սիդնեյը և Մելբուռնը նույնպես ամրապնդել են իրենց դիրքերը աշխարհի ամենաթանկ քաղաքների տասնյակում։ Սիդնեյը դարձել է հինգերորդ, իսկ Մելբուռնը՝ վեցերորդ ամենաթանկ քաղաքը։ Ասիայում են գտնվում աշխարհի 20 ամենաթանկ քաղաքներից ավելի քան հինգը, սակայն միևնույն ժամանակ՝ աշխարհի տասը ամենաէժան քաղաքներից ութը։

Հետևանքներ

[խմբագրել | խմբագրել կոդը]

Կենսապահովման ծախսերի կտրուկ աճը կարող է հանգեցնել կենսապահովման ծախսերի ճգնաժամի[2], որի պայմաններում մարդիկ կորցնում են գնողունակությունը, իսկ որոշ մարդկանց համար նախկին կենսակերպն դառնում է անհասանելի։

Եկամտի և առողջության կապը գիտականորեն ապացուցված է[7]։ Աղքատ մարդիկ ավելի քիչ հավանականությամբ են դիմում կանոնավոր և մասնագիտական բժշկական խորհրդատվության, գնում ատամնաբուժարան կամ լուծում իրենց առողջական խնդիրները։ Դեղատոմսով ձեռք բերվող դեղերի արժեքը հաճախ օգտագործվում է որպես ցուցանիշ կենսապահովման ծախսերի ուսումնասիրություններում և սպառողական գների ինդեքսներում[8]։ Կենսապահովման ծախսերի աճով պայմանավորված ճնշումները կարող են հանգեցնել տնային տնտեսությունների էլեկտրաէներգիայի կամ վառելիքային սղության, ինչպես նաև գերբնակվածության[7]։ Երբ կենսապահովման ծախսերն աճում են առանց մեկ շնչին բաժին ընկնող եկամտի համարժեք աճի, ապա բավարար ֆինանսական միջոցներ ունեցող մարդկանց մասնաբաժինը, որպես կանոն, նվազում է։

Պատճառներ

[խմբագրել | խմբագրել կոդը]

Որոշ հարկեր կարող են բարձրացնել կենսապահովման ծախսերը․ օրինակ՝ ուսումնասիրությունները ցույց են տվել, որ վաճառքի հարկերը հակված են բարձրացնելու գները[9][10]։ Բնակարանային ծախսերը կազմում են կենսապահովման ծախսերի զգալի մասը[11]։ Շուկայի կենտրոնացվածության աճը և տնտեսական մրցակցության նվազումը կարող են բարձրացնել կենսապահովման ծախսերը[12]։

Կենտրոնական բանկերի կողմից գնաճի դրական տարեկան նպատակադրում սահմանումը հանգեցնում է անվանական կենսապահովման ծախսերի դանդաղ աճի[13]։

Կենսապահովման ծախսերի ճշգրտում

[խմբագրել | խմբագրել կոդը]

Աշխատանքային պայմանագրերը և կենսաթոշակային նպաստները կարող են կապված լինել կենսապահովման ծախսերի ինդեքսի հետ, որպես կանոն՝ սպառողական գների ինդեքսի (ՍԳԻ) հետ: Մեկ այլ վիճակագրական ցուցանիշ՝ կենսապահովման ծախսերի ճշգրտումը[14], ճշգրտում է աշխատավարձերը՝ ելնելով կենսապահովման ծախսերի ինդեքսի փոփոխություններից: Աշխատավարձերը սովորաբար ճշգրտվում են տարեկան կտրվածքով: Դրանք կարող են կապված լինել նաև ըստ աշխարհագրական տեղադիրքի փոփոխվող կենսապահովման ծախսերի ինդեքսի հետ, եթե աշխատակիցը տեղափոխվում է: Վերջինիս դեպքում այլ երկիր կամ տարածաշրջան տեղափոխված աշխատակցի աշխատավարձի միայն հայեցողական (դիսկրեցիոն) եկամտի մասն է ինդեքսավորվում՝ ըստ աշխատանքի նոր և հին վայրերի միջև ՍԳԻ-ի տարբերության, մինչդեռ ոչ հայեցողական մասը (օրինակ՝ հիպոթեքային վճարումները, ապահովագրությունը, ավտոմեքենայի վճարները) մնում է անփոփոխ: Վերջին շրջանում իրականացված կենսապահովման ծախսերի ճշգրտման օրինակներից են Սոցիալական ապահովության նպաստների 3,2% աճը և ավանդական ու «Roth IRA»-ների համար տարեկան առավելագույն մուծման սահմանաչափի 22 500-ից մինչև 23 000 ԱՄՆ դոլար բարձրացումը, որոնք երկուսն էլ իրականացվել են 2024 թվականին։

Աշխատանքային պայմանագրերում ներառվող տարեկան աճի դրույթները կարող են սահմանել աշխատողների վարձատրության հետադարձ ուժով կամ ապագա ժամանակահատվածի համար տոկոսային աճեր, որոնք կապված չեն որևէ ինդեքսի հետ։ Բանակցությունների արդյունքում համաձայնեցված աշխատավարձի այս բարձրացումները ոչ պաշտոնական խոսքում կոչվում են կենսապահովման ծախսերի ճշգրտումներ կամ կենսապահովման ծախսերի ավելացումներ, քանի որ դրանք նման են արտաքինից որոշվող ինդեքսներին կապված աճերին։ Կենսապահովման ծախսերի նպաստը հավասար է անվանական տոկոսադրույքի և իրական տոկոսադրույքի տարբերությանը։

Ժամանակավորապես այլ վայր տեղափոխված աշխատակիցներին տրամադրվող նպաստները կամ հավելավճարները նույնպես կարող են կոչվել կենսապահովման ծախսերի ճշգրտումներ կամ կենսապահովման ծախսերի նպաստներ։ Նման ճշգրտումները նպատակ ունեն փոխհատուցելու բարեկեցության արժեքի փոփոխությունները, որոնք պայմանավորված են տարբեր աշխարհագրական վայրերում կենսապահովման ծախսերի տարբերություններով։ Նման ճշգրտումները կարող են ավելի ճշգրիտ նկարագրվել որպես օրավարձի նպաստ կամ կապված լինել որոշակի կետի հետ, ինչպես բնակարանային նպաստների դեպքում։ Մշտապես այլ վայր տեղափոխվող աշխատակիցներն ավելի քիչ հավանականությամբ են ստանում նման նպաստներ, սակայն կարող են ստանալ հիմնական աշխատավարձի ճշգրտում՝ տեղական շուկայի պայմաններն արտացոլելու նպատակով։

Երբ կենսապահովման ծախսերի ճշգրտումները, բանակցությունների արդյունքում ձեռք բերված աշխատավարձային համաձայնությունները և բյուջետային ավելացումները գերազանցում են ՍԳԻ-ն, լրատվամիջոցները հաճախ համեմատում են այդ երկու ցուցանիշները՝ առանց համապատասխան հարկային օրենսդրությունը հաշվի առնելու։ Սակայն ՍԳԻ-ն հիմնված է սպառողական զամբյուղի արժեքի վրա։ Այդ նույն զամբյուղից կատարվող գնումների մեծ մասը պահանջում է հարկումից հետո մնացած գումարի օգտագործում, այսինքն՝ այնպիսի գումարի, որը հաճախ ենթարկվել է սահմանային հարկի առավել բարձր դրույքաչափին։ Հետևաբար, գնողունակությունը պահպանելու համար կենսապահովման ծախսերի ճշգրտումներն անհրաժեշտաբար պետք է գերազանցի ՍԳԻ-ով չափվող գնաճի մակարդակը[15]։

Գնաճի հետևանքով աշխատավարձերի և հարկերի աճը կարող է առաջանալ նաև այն երկրներում, որտեղ սահմանային հարկի դրույքաչափը ինքնին ինդեքսավորված չէ։ Կենսապահովման ծախսերի ճշգրտումների ավելացումների պատճառով եկամտի որոշակի մասն հայտնվում է ավելի բարձր հարկային դաշտում։ Միայն համահարթ հարկային համակարգում է համախառն եկամտի աճը հանգեցնում հարկումից հետո եկամտի՝ գնաճը փոխհատուցող նույն համամասնությամբ աճին։

ԱՄՆ-ում կենսապահովման ծախսերի փոփոխություններին համապատասխան ճշգրտվող որոշ աշխատավարձեր և կենսաթոշակները ներառում են՝

  • Սոցիալական ապահովության նպաստները
  • Քաղաքացիական ծառայության կենսաթոշակային համակարգ[16]
  • Դաշնակցային Գործավորների Կենսաթոշակի Համակարգ[16]

Կանադայում կենսապահովման ծախսերի փոփոխություններին համապատասխան ճշգրտվող կենսաթոշակները ներառում են՝

  • Կանադայի ավտոշինարարների միության Օնտարիոյի 200-րդ տեղամասային բաժանմունքը
                     M2 Դրամական զանգվածի տոկոսային փոփոխությունը նախորդ տարվա համեմատ                     Սպառողական գների ինդեքս
Իսրայելում «Histadrut» արհմիության կողմից 1980 թվականին անցկացված բողոքի ցույց՝ կենսապահովման ծախսերի դեմ։

ԱՄՆ

[խմբագրել | խմբագրել կոդը]

ԱՄՆ-ում սոցիալական ապահովության նպաստների չափը ճշգրտվում է կենսապահովման ծախսերի փոփոխություններին համապատասխան՝ քաղաքաբնակ վարձու աշխատողների և գրասենյակային ծառայողների սպառողական գների ինդեքսի աճին համապատասխանելու համար: Դրանք կարող են նաև ֆինանսավորում ստանալ հանրային բարեգործական կազմակերպություններից՝ կոնկրետ խնդիրների լուծման նպատակով: Կենսապահովման ծախսերի ճշգրտումները սահմանվում են տարեկան կտրվածքով և հաշվարկվում են տարվա երրորդ եռամսյակի քաղաքաբնակ վարձու աշխատողների և գրասենյակային ծառայողների սպառողական գների ինդեքսի հիման վրա (միջինացնելով հուլիս, օգոստոս և սեպտեմբեր ամիսների արժեքները): Կենսապահովման ծախսերի ճշգրտումները կարող են միայն ավելացնել նպաստների չափը, ուստի գնանկումային տարիներին, երբ այդ ինդեքսը նվազում է, որևէ ճշգրտում չի կատարվում[17]։

Չհարկվող կենսապահովման հավելավճարը (ԱՄՆ զինված ուժեր) հաճախ հատկացվում է ԱՄՆ այն զինծառայողներին, ովքեր ծառայում են արտերկրի ռազմաբազաներում, եթե տվյալ տարածքում կենսապահովման ծախսերն ավելի բարձր է, քան ԱՄՆ-ի միջին ցուցանիշը: Օրինակ՝ Ճապոնիայում զինծառայողները, ի հավելումն իրենց հիմնական աշխատավարձի, ամսական ստանում են 300-ից 700 դոլար կենսապահովման հավելավճար (կախված զինվորական կոչումից, ծառայության տարիներից և խնամքի տակ գտնվողների թվից):

Կանադա

[խմբագրել | խմբագրել կոդը]

Կանադայի սոցիալական ապահովության համակարգը կենսապահովման ծախսերի ճշգրտումներ է ներառում դաշնային և նահանգային բազմաթիվ ծրագրերում՝ գնաճի պայմաններում կենսաթոշակային նպաստների գնողունակությունը պահպանելու նպատակով: Դաշնային ծրագրերը ներառում են ծերության ապահովության կենսաթոշակը, որը ճշգրտվում է եռամսյակային կտրվածքով և անցյալ տարվա ընթացքում աճել է 2,0%-ով[18]։ 2025 թվականի հունվարից մարտ ընկած ժամանակահատվածի համար ծերության ապահովության կենսաթոշակի աճ չի արձանագրվել, քանի որ Սպառողական գների ինդեքսը նախորդ երեք ամիսների համեմատ արտացոլել է փոքր-ինչ անկում[18]: Կանադական կենսաթոշակային ծրագրի նպաստները կավելանան կենսապահովման ծախսերի ճշգրտումների շնորհիվ՝ ի պատասխան աճող կենսապահովման ծախսերի[19]:

Դաշնային նախաձեռնություններից բացի, նահանգային և մասնագիտական կենսաթոշակային ծրագրերը նույնպես կիրառում են կենսապահովման ծախսերի ճշգրտման մեխանիզմներ: Բրիտանական Կոլումբիայի համայնքային կենսաթոշակային ծրագիրը 2025 թվականի հունվարի 1-ից կիրառել է 1,6% աճ, մինչդեռ Օնտարիոյի «OPTrust» կենսաթոշակները 2025 թվականի համար ավելացել են 2,7%-ով[20]։ Ալբերտայի ուսուցիչների կենսաթոշակային հիմնադրամը ցուցադրում է ճշգրտման տարբերակված դրույքաչափեր՝ 1,74%՝ մինչև 1993 թվականը կատարած ծառայության համար, և 2,03%՝ 1993 թվականից հետո կատարած ծառայության համար[21]:

Կենսապահովման ծախսերի ճշգրտման հաշվարկման մեթոդաբանություններն ունեն ընդհանուր գծեր, սակայն տարբերվում են իրենց կիրառմամբ: Նահանգային ծրագրերի մեծ մասն օգտագործում է Կանադայի սպառողական գների ինդեքսի (ՍԳԻ)՝ կոնկրետ ժամանակահատվածներում չափված փոփոխությունները: Քոլեջների կենսաթոշակային ծրագիրն իր 2,6% ճշգրտումը հիմնում է մինչև 2024 թվականի հոկտեմբերի վերջն ընկած 12-ամսյա կանադական սպառողական գների միջին ինդեքսի (ՍԳԻ) փոփոխության վրա՝ նախորդ 12-ամսյա ժամանակահատվածի համեմատ։ Ալբերտայի ուսուցիչների հիմնադրամն օգտագործում է Ալբերտայի սպառողական գների ինդեքսը, որը հատուկ է Ալբերտայի տնտեսությանը[21]: Նոր կենսաթոշակառուների համար կենսապահովման ծախսերի ճշգրտումը սովորաբար հաշվարկվում է համամասնորեն՝ հիմնվելով կենսաթոշակի ստացման տևողության վրա[21]:

Այս ճշգրտումները զգալիորեն ազդում են կենսաթոշակառուների երկարաժամկետ ֆինանսական ապահովության վրա: «OPTrust»-ը ակնառու կերպով ցույց է տալիս այս ազդեցությունը։ 1995 թվականին նշանակված 20,000 դոլար կենսաթոշակը մինչև 2025 թվականը կաճի մինչև 37,313 դոլար, ինչը նշանակում է 87% աճ երեք տասնամյակի ընթացքում[20]։ Թեև գնողունակության պահպանումը մնում է առաջնահերթ նպատակ, կենսաթոշակային կառավարիչները պետք է դա հավասարակշռեն համակարգի կայունության խնդիրների հետ: Քոլեջների կենսաթոշակային ծրագիրը նշում է, որ կենսապահովման ծախսերի ամբողջական ճշգրտում տրամադրելու ծրագրի կարողությունը վկայում է ծրագրի՝ գնաճի ճշգրտման հաշվի առողջ վիճակի մասին, մինչդեռ Բրիտանական Կոլումբիայի համայնքային կենսաթոշակային ծրագիրը հանել է ճշգրտումների սահմանաչափերը մինչև 2025 թվականը՝ ծրագրի հաշիվների ֆինանսական ապահովության շնորհիվ[22]։

Քանի որ Կանադան շարունակում է բախվել գնաճային ճնշումների, դաշնային, նահանգային և մասնագիտական ծրագրերում կիրառվող կենսապահովման ծախսերի այս ճշգրտումներն էական պաշտպանություն են ապահովում կենսաթոշակառուների համար՝ ի ցույց դնելով Կանադայի հանձնառությունը՝ պաշտպանելու կենսաթոշակային նպաստները գնաճի քայքայիչ ազդեցությունից՝ միաժամանակ պահպանելով համակարգի կայունությունը:

Ծանոթագրություններ

[խմբագրել | խմբագրել կոդը]
  1. 1 2 Jambrina-Canseco, Beatriz (2026-07-25). «Local cost of living and the geography of inequality: evidence from Spain». The Journal of Economic Inequality (անգլերեն). doi:10.1007/s10888-026-09734-8. ISSN 1573-8701.
  2. 1 2 «What the cost of living crisis looks like around the world». International Rescue Committee (անգլերեն). 7 May 2024. Վերցված է 15 July 2024-ին.
  3. ↑ Yorkshire Water (2024), Summer of Saving
  4. ↑ OECD (2008), OECD Glossary of Statistical Terms. OECD Publishing, Paris. 2008. doi:10.1787/9789264055087-en. ISBN 978-92-64-02556-1. Վերցված է September 13, 2019-ին.
  5. ↑ «Consumer price index (2010 = 100), World Bank Group, accessed July 2025».
  6. ↑ «Singapore Maintains Top Spot as World's Costliest City». Bloomberg. March 3, 2015.
  7. 1 2 Broadbent, Philip; Thomson, Rachel; Kopasker, Daniel; McCartney, Gerry; Meier, Petra; Richiardi, Matteo; McKee, Martin; Vittal Katikireddi, Srinivasa (27 April 2023). «The public health implications of the cost-of-living crisis: outlining mechanisms and modelling consequences». The Lancet Regional Health - Europe. 27 100585. doi:10.1016/j.lanepe.2023.100585. PMC 10068020. PMID 37035237.
  8. ↑ «Consumer Price Index, Australia methodology, December Quarter 2024 | Australian Bureau of Statistics». www.abs.gov.au (անգլերեն). 2025-01-29. Վերցված է 2025-04-10-ին.
  9. ↑ Besley, Timothy J.; Rosen, Harvey S. (1999). «Sales Taxes and Prices: An Empirical Analysis». National Tax Journal. 52 (2): 157–178. doi:10.1086/NTJ41789387. ISSN 0028-0283. Վերցված է 2026-08-04-ին.
  10. ↑ Zhao, Jianqiang (Jason); Barrett, Christopher B.; Zheng, Yuqing; Kaiser, Harry M. (2025). «The incidence of grocery taxes in US food and factor markets». American Journal of Agricultural Economics ajae.70034. doi:10.1111/ajae.70034. ISSN 0002-9092. Վերցված է 2026-08-04-ին.
  11. ↑ Lyons, Ronan; Shertzer, Allison; Gray, Rowena (2026). Rental Prices and the Cost of Living in the United States, 1914–2006 (Report). Cambridge, MA: National Bureau of Economic Research. doi:10.3386/w35124.
  12. ↑ Hovhannisyan, Vardges; Cho, Clare; Bozic, Marin (2019). «The relationship between price and retail concentration: evidence from the US food industry». European Review of Agricultural Economics. 46 (2): 319–345. doi:10.1093/erae/jby026. ISSN 0165-1587. Վերցված է 2026-08-13-ին.
  13. ↑ Bernanke, Ben S; Mishkin, Frederic S (1997). «Inflation Targeting: A New Framework for Monetary Policy?». Journal of Economic Perspectives. 11 (2): 97–116. doi:10.1257/jep.11.2.97. ISSN 0895-3309.
  14. ↑ «Cost-of-Living Adjustment (COLA) Information | SSA». www.ssa.gov (անգլերեն). Վերցված է 2025-03-03-ին.
  15. ↑ «CPI Home». U.S. Bureau of Labor Statistics (ամերիկյան անգլերեն). Վերցված է September 30, 2019-ին.
  16. 1 2 Flanagan, Tammy (September 8, 2006). «COLA Wars». GovernmentExecutive.com. National Journal Group. Արխիվացված է օրիգինալից October 5, 2008-ին. Վերցված է September 23, 2008-ին.
  17. ↑ «Cost-of-Living Adjustment (COLA) Information». Social Security. Social Security Administration. Վերցված է August 11, 2021-ին.
  18. 1 2 «Key Pension Updates for 2025 (CPP, OAS, GIS, Payment Dates) - Blueprint Financial» (ամերիկյան անգլերեն). 2025-01-13. Վերցված է 2025-03-03-ին.
  19. ↑ «$400 Increase In CPP/OAS Benefits in February 2025: Who will get this? Check Payment Date - UP Excise Portal». UP Excise Portal (ամերիկյան անգլերեն). 2025-02-25. Վերցված է 2025-03-03-ին.
  20. 1 2 «Cost of Living Adjustment for Your Pension | OPTrust». optrust.com. Վերցված է 2025-03-03-ին.
  21. 1 2 3 «Cost-of-Living Adjustments (COLA)». Alberta Teachers' Retirement Fund (ATRF) (ամերիկյան անգլերեն). Վերցված է 2025-03-03-ին.
  22. ↑ «Pension Board Agrees to Remove Cost-of-Living Adjustment Cap | BC Nurses' Union». www.bcnu.org. Վերցված է 2025-03-03-ին.

Արտաքին հղումներ

[խմբագրել | խմբագրել կոդը]
Ստացված է «https://hy.wikipedia.org/w/index.php?title=Կենսապահովման_ծախսեր&oldid=10883283» էջից