Károly Takács
Károly Takács, bet ganet d'ar 21 a viz Genver 1910 e Budapest ha marvet d'ar 5 a viz Genver 1976 er memes kêr, a oa un tenner sport hungariat, arbennik war ar bistolenn tizh 25 metr. Div wech e voe kampion olimpek, e 1948 hag e 1952.
Buhez
[kemmañ | kemmañ ar vammenn]Rollañ a reas Károly Takács en arme hungariat pa oa yaouank a-walc'h, ha tizhout a reas ar renk a serjant. Kregiñ a reas da dennañ en ur mod sportel e kevredigezh tennañ ofisierien an Honvéd. Koll a reas e zorn dehoù en ur gwallzarvoud e 1938 abalamour d'ur c'hreunadenn, ha rankout a reas deskiñ tennañ gant e zorn kleiz neuze[1].
E 1939 e kemeras perzh evit ar wech kentañ en ur genstrivadeg da vare kampionad ar bed e Luzern (Suis). Degas a reas ar vedalenn aour asambles gant skipailh e vro. Goude an Eil Brezel-bed e voe ezel eus ar c'hleuboù Partizán Sport Klub (Budapest) ha Budapest Honvéd. Ganto e c'hounezas pemp titl kampion Hungaria[2].
E C'hoarioù olimpek Londrez, e 1948, ez eas ar vedalenn aour gantañ. Ar memes medalenn a dapas pevar bloaz goude, e C'hoarioù olimpek Helsinki, just dirak e zeskard Szilárd Kun. Echuiñ a reas en eizhvet plas en e olimpiadoù diwezhañ e Melbourne, e 1956[3].
Goude e leve sport e dibenn ar bloavezhioù 1950 e kelennas an tennañ er Budapest Honvéd. László Hammerl a voe e-touez e zeskidi. Kelenn a reas ivez en Akademiezh vilourel Zrínyi Miklós betek e varv e 1976[2].
Daveennoù
[kemmañ | kemmañ ar vammenn]- ↑ (fr) KAROLY TAKACS, war lec'hienn ar C'homite Olimpek Etrebroadel (lennet d'an 23/08/2026)
- 1 2 (en) Károly Takács war Olympedia (lennet d'an 23/08/2026)
- ↑ (en) Károly Takács, Encyclopaedia Britannica (lennet d'an 23/08/2026)
