جورج ؤرويل
.jpg)
جورج ؤرويل (ب نݣليزية: George Orwell)، و هي غير سميّة د شّهرة: سميتو لحقيقية إيريك آرثر بلير Eric Arthur Blair، خلاق ف موتيهاري ف لهند ف 25 يونيو 1903 و مات ف 21 يناير 1950 ف لوندريس، هو كاتيب و صحافي بريطاني.[1]
جورج ؤرويل خلاق ف لهند لبريطانية ف 1903. قرا ف بريطانيا و مشا مزيان ف دّراسة ديالو تا تخرّج من جاميعة د إيطون.
فـ1922، ختار يدخل ل لعسكر و خدم سارجان ف لجيش لستيعماري لبريطاني ف بيرمانيا. ما حملش تمّا تّصوفيج ديال لستيعمار لبريطاني و ديميسيونا من لعسكر ف 1927 و قرّر باش يتفرّغ ل لكتابة. بقا كايصور طرف د لخبز ديالو ب خدامي صغار و ضعاف بزّاف ف صحتو ب سباب مرض صّدر. واخّا هاكداك قدر يبدا ينشر رّيوايات ديالو.
فـ1936، مشا ل سپانيا و ݣاجا مع لقوّات لجمهورية، مع لحيزب لعمّالي د لوحدة لماركسية POUM، لّي كانت كاتحارب ضد فرانكو و كتب بزّاف على لحرب لأهلية سپانيولية. تبليسا ف لحرب و رجع ل لوندون و صدر لكتاب ديالو "ف خاطر كاطالونيا" (Homage to Catalonia)، و لّي عاود فيه على نّيضال ديالو مع ل POUM، و كيفاش تّيار سّطاليني فرع هاد لحيزب ف سپانيا.
فـ1938، ريوائي ليو مييرز خلص بتخبية لأورويل تصافيرة للمغريب ل ست شهور باش يتشافا من سل و من جرحة ف لحلق لي تصاب بيها ف لحرب. هو و عائيلتو شدو طريق ف شتنبر 1938 من جبل طر و طانجا باش يتجنبو شمال لمغريب لي حاكماه صبنيول؛ وصلو ل مراكش فـ11 شتنبر و كراو فيها ڤيلا على طريق دارلبيضا. ف ديك لوقيتة، كتب أورويل ريواية "طلوع على ود لهوا" (Coming Up for Air)، و حتا واحد لمقالة ب سميت "مراكش" فين هضر علا ستيعمار و لحالة ديال سّكان لمغاربا.[2][3]
ف لحرب لعالمية تّانية خدم صحافي معا ل بي بي سي BBC و فديك لمرحلة كتب رّيواية لمشهورة ديالو "لفيرما د لبهايم" و لّي دارها على شكل حكاية و معنا فيها بزّاف على نّيضام د سطالين. من بعد مرض ب سّل و هو لمرض لّي بقا كايعاني منو تال لموت ديالو ف 1950. لعوام لّخرة د حياتو هي لّي كتب فيها أكبر و أشهر ريواية ديالو 1984.[1]
- 1 2 "George Orwell". franceculture.fr (ب الفرنسية). Archived from the original on 2022-02-26. Retrieved 2020-09-03.
- ↑ "Gordon Bowker: The Road to Morocco". orwellfoundation.com (ب الإنجليزية). Archived from the original on 2021-01-26. Retrieved 2020-09-12.
- ↑ "Peter Davison: Bibliographical note on Orwell's Morocco Diaries". orwellfoundation.com (ب الإنجليزية). Archived from the original on 2021-01-25. Retrieved 2020-09-12.
 |
ويكيميديا كومنز عندا تصاور و معلومات على جورج ؤرويل. |
| عالمي | |
|---|---|
| وطني | |
| أكاديميا | |
| فنانين | |
| ناس | |
| غيرهم | |
