Evenes flystasjon i Nordland er framskoten base for F-35 og hovudbase for Forsvarets maritime patruljefly, P-8 Poseidon.
Evenes flystasjon er ein operativ kampflybase for Luftforsvaret. Stasjonen har dei siste åra vore under stor utvikling og har i dag rundt 500 tilsette og 300 vernepliktige.
Evenes er heimebase for Noregs fem maritime patruljefly av typen P-8 Poseidon.
I tillegg til P-8 Poseidon har 133 luftving på Evenes ein eigen luftvernbataljon og ein baseforsvarsskvadron for å beskytte dei flyoperative avdelingane. Luftvernet blir sett opp med våpensystemet NASAMS, mens baseforsvarsskvadronen får avdelingar innan aktivt og passivt forsvar, ein stor hundeavdeling, sanitet, eksplosivryddarar og ein maskin- og konstruksjonstropp.
Forsvaret løyser QRA-oppdraget frå Evenes. Det inneber at to F-35 kampfly er i lufta innan 15 minutt om ukjende fly kjem i nærleiken av norsk luftrom. Flya skal finne, identifisere og dokumentere dei ukjende flya, og eventuelt hindre at dei tar seg ulovleg inn norsk luftrom.
I tillegg har Evenes moderne fasilitetar for vedlikehald, idrett og andre støttefunksjonar. Forsvarets logistikkorganisasjon Forsyning og Cyberforsvaret har også ei avdeling på Evenes.
Sjå Forsvarsbygg for meir informasjon om utviklinga av Evenes flystasjon.
Evenes flystasjon ligg i Evenes kommune, på grensa mellom fylka Nordland og Troms. Harstad med 25 000 innbyggarar, ligg tre kvarters køyring nordover, mens Narvik med 22 000 innbyggarar, er ein snau times køyring austover. Regionen har vakker natur med fantastisk friluftsliv vinter og sommar. Evenes er også inngangsporten til vakre Vesterålen og Lofoten.
Sjå nettstaden til Evenes kommune for meir informasjon om området.
For å gi betre støtte til forsvarsfamiliane, er det familiekoordinatorar ved dei fleste tenestestadene til Forsvaret. Koordinatoren skal leggje til rette for familiesamlingar, møte og gi informasjon om kva avdelinga kan tilby familiane.
Kontakt basen eller avdelinga di for å komme i kontakt med familiekoordinatoren din.
