สิริสุภะชะยะมังคะละ พุทธศักราช 2526
ล้านนาว่าตกปีก่าไค้ แรม 1 ค่ำได้เดือนสิบสอง
สิบเอ็ดนาฬิกาปองมีเศษ ชาวไทยในเขตล้านนา
พากันอุตส่าห์สร้างไว้ ยังสารูปพระยาใหญ่ 3 องค์
หื้อคนทั้งขงหนุ่มเฒ่า หันแล้วคึดเล่าเถิงคุณ

พระยามังรายบุญกล้าแก่ เป็นลูกฮักแต่พระยาลาวเม็ง
นางเทพคำข่ายเป็นพระแม่เจ้า เกิดที่เมืองเงินยังย่ำเข้า 1782
ฮู้จบถ่องฉลาด ยังสิปปศาสตร์นานา
ได้เป็นพระยาแทนพ่อ ก่อสร้างต่อเสวยเมือง
พุทธศักราชเรืองกดแขวด ได้ 1802 หากเป็นหมาย
ปราบเมืองทั้งหลายเหนือใต้ เอามาฮอมไว้เป็นเอกรัฏฐา
เพื่อหื้อประชาไพร่ฟ้า สุขทั่วหน้าหญิงชาย
จึ่งแต้มกฎหมายมังรายศาสตร์ ไว้เป็นบทบาทตัดความ
มีหอระทัยงามฝังใฝ่ ใคร่สร้างเมืองใหม่เป็นราชธานี
จึ่งเชิญเอาพระภูมีงำเมืองธิราช ทั้งพระยาตนองอาจร่วงรามคำแหง
มาช่วยปกแปงเมืองใหม่ หื้อเป็นเมืองใหญ่ไรเรือง
ตั้งอินทขีลสะดือเมืองหมายหมั้น คุรุวารวันพระหัสนั้นเป็นพิธี
ฤกษ์ไชยดีแตรใกล้รุ่ง ลัคนาเมืองพุ่งเข้าราศีมีน