સરકારી આવાસ યોજનાના મકાનને બહેનો ઘર બનાવી વસવાટ કરશેઃ આનંદીબેન પટેલ
અમદાવાદ
પંડિત દીનદયાળ ઉપાધ્યાય આવાસ યોજના હેઠળ સાબરમતી રીવરફ્રન્ટના પુનઃસ્થાપિત ૨૧૧૨ લાભાર્થી કુટુંબો માટે રૂ. ૯.૫૦ કરોડના ચેક વિતરણનો કાર્યક્રમ શેઠ મંગળદાસ ટાઉનહોલ ખાતે યોજાયો હતો.
સામાજિક ન્યાય અને અધિકારિતા વિભાગ અંતર્ગત નિયામકશ્રી, વિકસતી જાતિ કલ્યાણ, ગાંધીનગરના ઉપક્રમે સાબરમતી રીવરફ્રન્ટ, અમદાવાદના અસરગ્રસ્તોના પુન:સ્થાપન માટે અમદાવાદ મ્યુનિસિપલ કોર્પોરેશન દ્વારા પાકા મકાનો બનાવી પુન: સ્થાપિત સામાજિક અને શૈક્ષણિક રીતે પછાતવર્ગોના કુટુંબો માટેનો ચેક મેયર શ્રીમતી મીનાક્ષીબેન પટેલને અર્પણ કરવામાં આવ્યો હતો.
કાર્યક્રમના અધ્યક્ષસ્થાનેથી મહેસુલ મંત્રી શ્રીમતી આનંદીબેન પટેલે જણાવ્યું હતું કે, સરકારી આવાસ યોજનાના મકાનને બહેનો ઘર બનાવી વસવાટ કરશે. પ્રજાનું ચિંતન અને ચિંતા કરનાર ગુજરાત સરકાર ગરીબો સર્વાંગી વિકાસ કરવા સક્રિય છે. સમાજના દરેક વર્ગના લોકોને શિક્ષિત અને સ્વસ્થ કરવાનું અભિયાન સરકાર ચલાવી રહી છે.વંચિતોના વિકાસને વરેલી સરકાર પ્રજાને તમામ પ્રાથમિક સગવડો સાથે શૈક્ષણિક સગવડો અને રોજગારી પૂરી પાડવા કટિબદ્ધ છે.
આ પ્રસંગે તેમણે બે લાખ સુધીની વિનામૂલ્યે તબીબી સારવાર પૂરી પાડતી મુખ્યમંત્રી અમૃતમ્ યોજનાનો લાભ લેવા જણાવ્યું હતું. તેમણે નાગરિકોને વૃક્ષ વાવો, વધુ ભણો અને યુવાનોને રોજગારલક્ષી તાલીમ અપાવવા અપીલ કરી હતી.
સામાજિક ન્યાય અને અધિકારિતા મંત્રી શ્રી રમણલાલ વોરાએ જણાવ્યું હતું કે, ગરીબોને ઘરઆપવા સરકાર કટિબદ્ધ છે. પ્રત્યેક ગરીબને ઘરના સંકલ્પને સાકાર કરતી ૧૯ આવાસ યોજનાઓ પૈકી સરકારે પંડિત દીનદયાળ ઉપાધ્યાય આવાસ યોજના હેઠળ વર્ષમાં કુલ રૂ. ૩૩ કરોડની સહાય કરવામાં આવી છે. વસંત ગજેન્દ્રનગર, સ્વર્ણિમનગર, સિકંદરબખ્ત નગર, સદભાવના નગર જેવી ૧૯ આવાસ યોજના હેઠળ સરકારે ગરીબોના આવાસનું લક્ષ્ય હાંસલ કર્યું છે. આ વર્ષે ૨૧૧૨ લાભાર્થી કુટુંબોને રૂ. ૯.૫૦ કરોડની સહાય સહિત કુલ ૧૨ હજાર કુટુંબોને વૈકલ્પિક આવાસોની ફાળવણી કરી છે.
અમદાવાદના મેયર મીનાક્ષીબેન પટેલે સ્વાગત પ્રવચનમાં જણાવ્યું હતું કે, રાજ્ય સરકાર દ્વારા કોર્પોરેશન કુટુંબદીઠ બેરૂમ રસોડાવાળા પાકા વૈકલ્પિક આવાસો સાબરમતી રીવરફ્રન્ટ ડેવલપમેન્ટ પ્રોજેક્ટ તથા કાંકરિયા લેઇક ફ્રન્ટ પ્રોજેક્ટ અન્વયે ૧૨ હજારથી વધુ શહેરી ગરીબોને ફાળવશે.
આ પ્રસંગે કાયદા મંત્રી શ્રી પ્રદિપસિંહ જાડેજા, શ્રી સામાજિક ન્યાય અને અધિકારિતા વિભાગના અગ્ર સચિવશ્રી સંજય પ્રસાદ, મ્યુનિસિપલ કમિશનરશ્રી ડૉ. ગુરુપ્રસાદ મહાપાત્ર, સંસદસભ્યશ્રી ડૉ. કિરીટ સોલંકી, ૨૦ મુદ્દા અમલીકરણ કાર્યક્રમ અધ્યક્ષશ્રી કૌશિકભાઇ પટેલ, ધારાસભ્યશ્રી રાકેશ શાહ, વિકસતિજાતિ નિયામકશ્રી કે. જી. વણઝારા, ડે. મ્યુ. કમિનશનરશ્રી એમ. થેન્નારસન તેમજ વિશાળ સંખ્યામાં પ્રજાજનો ઉપસ્િથત રહ્યા હતા.
