Neftçi PFK

"Neftçi" bura istiqamətləndirir. Digər istifadə formaları üçün bax: Neftçi (dəqiqləşdirmə).

Neftçi PFK
Klubun tam adı	Neftçi Peşəkar Futbol Klubu
Ölkə	Azərbaycan
Ləqəb(lər)	"Flaqman" "Ağ-qaralar" "Neftçilər" "Xalq komandası"
Rəng(lər)	⬜️⬛️ ağ-qara
Yaranma tarixi	18 mart 1937) (1937-03-18)
Stadionu	Palms Sports Arena
Tutumu	11.000
Prezidenti	—
Baş məşqçisi	Yuri Vernidub
Kapitanı	Emin Mahmudov
Liqa	Azərbaycan Premyer Liqası
2025/26	4-cü
Ev forması Səfər forması Üçüncü forma
Rəsmi saytı
Vikianbarda əlaqəli mediafayllar

Neftçi Peşəkar Futbol Klubu və ya qısaca "Neftçi" — Bakı şəhərini təmsil edən Azərbaycan futbol klubu. 1937-ci ildə neft sənayesi işçilərinin "Neftyanik" komandası kimi yaradılmış, 1968-ci ildən "Neftçi" adını daşıyır. Klub ev oyunlarını Bakıdakı 11 min tamaşaçı tutumlu Palms Sports Arenada keçirir və Azərbaycan Premyer Liqasında çıxış edir.

"Neftçi" SSRİ dövründə Azərbaycanın aparıcı futbol komandası olmuş, SSRİ çempionatının yüksək liqasında 27 mövsüm oynamış və 1966-cı ildə bürünc medal qazanmışdır. Bu, Azərbaycan klublarının SSRİ çempionatlarındakı ən yüksək nəticəsidir. Klub həmçinin dörd dəfə SSRİ Kubokunun yarımfinalına çıxmış, 1988-ci ildə isə SSRİ Futbol Federasiyası Kubokunun finalında oynamışdır.

Müstəqillik dövründə "Neftçi" 9 dəfə Azərbaycan çempionu, 6 dəfə Azərbaycan Kubokunun və 2 dəfə Azərbaycan Superkubokunun qalibi olmuşdur. Çempionluq sayına görə "Qarabağ"dan sonra ikinci, kubok sayına görə də ikinci yerdədir. "Qarabağ"la yanaşı, 1992-ci ildən bəri keçirilən bütün Azərbaycan çempionatlarında iştirak edən iki klubdan biridir. 2006-cı ildə MDB ölkələri çempionlarının Birlik Kubokunu qazanaraq beynəlxalq turnir qalibi olan ilk Azərbaycan klubu olmuşdur.

2012-ci ildə "Neftçi" UEFA Avropa Liqasının pley-off mərhələsində Kiprin "APOEL" klubunu iki oyunun yekununa görə 4–2 hesabı ilə məğlub edərək avrokubokların qrup mərhələsinə vəsiqə qazanan ilk Azərbaycan komandası olmuşdur.

Tarixi

Əsas məqalə: Neftçi PFK-nın mövsümlərinin siyahısı

Yaranması (1937–1948)

"Neftyanik"in heyəti, 1937-ci il

1936-cı ilin mayında SSRİ Xalq Komissarları Soveti idman yarışlarının təşkili ilə bağlı yeni qərar qəbul etdi: idman cəmiyyətləri istehsalat sahələri və həmkarlar ittifaqlarının nəzdində yenidən quruldu və SSRİ yarışları şəhər yığmaları arasında deyil, məhz bu cəmiyyətlərin komandaları arasında keçirilməyə başladı. Bu islahatın nəticəsi olaraq əvvəllər "Balaxanı Futbolçular Dərnəyi" və "Tərəqqi" ("Proqres") adları altında çıxış etmiş "Leninneft" neftçıxarma idarəsinin komandası yeni yaradılan "Neftyanik" (rus. Нефтяник — neftçi) komandasının bazasına çevrildi. Komanda 1937-ci il martın 18-də yaradıldı, idman cəmiyyətinin ilk sədri M. Səadətxan oldu. 21 mart 1937-ci il tarixli "Azərbaycan bədən tərbiyəçisi" qəzetində komandanın ilk heyəti belə təqdim edilirdi: Cəfərov, İsmayılov, Rıjov, Vıboronov, Nexoroşev, Nifontov, Abramov, Kuznetsov, Luşnikov, Mironov, Ştırlin, Makaqonov, Krasilnikov, Sidorenko.

Komandanın adı və rəmzləri onun neft sənayesinə məxsus olduğunu bildirirdi: ilk emblemdə neft buruğunun fonunda kiril əlifbası ilə "Neftyanik" sözünün baş hərfi "H" əks olunmuşdu, formanın əsas rəngi isə "qara qızıl"ın rəngi — qara idi.

"Neftyanik" ilk rəsmi oyununu 1937-ci il mayın 24-də keçirdi. SSRİ Kubokunun 1/64 finalında Bakının "Dinamo" stadionunda 5 min tamaşaçı qarşısında komanda İrəvan "Dinamo"sunu 1:0 hesabı ilə məğlub etdi; 87-ci dəqiqədə Pavel Ştirlinin vurduğu qol klubun tarixində ilk rəsmi qol oldu. Oyunu tbilisili hakim Nikolay Larionov idarə edirdi, komandanın baş məşqçisi Aleksandr Qnezdov, kapitanı isə heyətdəki yeganə azərbaycanlı Məmməd-Əli İsmayılov idi. Həmin il komanda kubokda 1/16 finaladək irəlilədi və Tbilisi "Dinamo"suna uduzdu, SSRİ çempionatının "Q" qrupunda isə 12 komanda arasında 11-ci oldu.

Böyük Vətən müharibəsi illərində komandanın bir çox futbolçusu cəbhəyə yollandı; müharibədə həlak olanlar arasında müharibəyəqədərki dövrdə komandanın şərəfini qorumuş Mirmehdi Ağayev də vardı. Müharibənin sonlarına doğru komanda fəaliyyətini bərpa etdi və 1946–1948-ci illərdə SSRİ çempionatının ikinci qrupunda çıxış etdi.

SSRİ çempionatında (1949–1991)

Yüksək liqada debüt və "B" sinfi illəri (1949–1959)

1949-cu il SSRİ Kubokunun 1/4 final oyununun afişası

1949-cu il klubun tarixində dönüş nöqtəsi oldu. SSRİ Futbol Federasiyasının apardığı islahat nəticəsində hər müttəfiq respublikadan ən azı bir komandanın yüksək liqaya (o dövrdə "1-ci qrup") buraxılması qərara alındı. Azərbaycan SSR-in iqtisadiyyatında neftin aparıcı yer tutduğunu nəzərə alan respublika rəhbərliyi bu hüququ neftçilərin həmkarlar ittifaqının komandasına verdi. Beləliklə, "Neftyanik" 1938-ci ildə bir mövsüm yüksək liqada oynamış "Temp"dən sonra Azərbaycanın bu səviyyədə ikinci təmsilçisi oldu. Debüt mövsümündə komanda 18 komanda arasında 14-cü yeri tutdu, ən məhsuldar hücumçusu 10 qolla İsay Abramaşvili oldu; həmin il komanda SSRİ Kubokunun 1/4 finalına da çıxdı.

1950-ci ildə "A" sinfində 19 komanda arasında sonuncu yeri tutan komanda yüksək liqanı tərk etdi və 1951–1959-cu illərdə "B" sinfində oynadı. 1950-ci illərdə forma rənglərinə ağ rəng də əlavə edildi: neftlə yanaşı, respublikanın "ağ qızıl" adlandırılan pambıq istehsalı da formada əks olunmalı idi. O vaxtdan ağ-qara rənglər klubun daimi rəmzinə çevrildi.

1960-cı illər və bürünc medal

1960-cı ildə "Neftyanik" yüksək liqaya qayıtdı və 1972-ci ilədək fasiləsiz olaraq orada çıxış etdi. 1960-cı illərin ortalarında komanda cədvəlin ortasında qərarlaşmışdı: 1964-cü ildə 12-ci, 1965-ci ildə 11-ci yer. 1965-ci il mövsümünün ortasında Ələkbər Məmmədovu baş məşqçi postunda Vasili Sokolov əvəz etsə də, nəticələr dəyişmədi.

1966-cı il mövsümünün ikinci dövrəsində komandanı Əhməd Ələsgərov qəbul etdi və "Neftyanik" SSRİ çempionatını 36 oyunda 18 qələbə, 9 heç-heçə və 9 məğlubiyyətlə, 45 xalla 3-cü yerdə başa vuraraq bürünc medal qazandı. Çempion Kiyev "Dinamo"su 56, ikinci yeri tutan Rostov SKA 47 xal toplamışdı. Komandanın ən məhsuldar oyunçuları Kazbek Tuayev (14 qol), Anatoli Banişevski və Eduard Markarov (hər biri 12 qol) idi. "Neftçi" bu günədək SSRİ çempionatının yüksək liqasında medal qazanmış yeganə Azərbaycan klubudur. Həmin il Banişevski və Markarov Dünya çempionatında SSRİ yığmasının heyətinə daxil edilmişdilər.

1967-ci ildə komanda mövsümün sonunda ardıcıl 5 qələbə qazanaraq 5-ci yeri tutdu. 1968-ci ildə Azərbaycan yüksək liqada ilk və sonuncu dəfə iki komanda — "Neftçi" və Gəncə (o vaxtkı Kirovabad) "Dinamo"su (indiki "Kəpəz") ilə təmsil olundu; "Dinamo" liqanı tərk etdi, "Neftçi" isə 9-cu oldu. Məhz 1968-ci il mövsümündən klub rəsmi sənədlərdə "Neftçi" adı ilə qeyd olunmağa başladı. 1967, 1968, 1970 və 1971-ci illərdə komanda SSRİ Kubokunun yarımfinalına çıxdı, lakin heç bir dəfə finala yüksələ bilmədi.

Eniş, birinci liqa və qayıdış (1970–1988)

1970-ci ildə komandanın nəticələri kəskin pisləşdi: Tuayev Orconikidze "Spartak"ına, Markarov İrəvan "Ararat"ına keçmiş, Banişevski isə əvvəlki formasını itirmişdi. Oqtay Atayev "Ot "Proqressa" do "Neftçi"" kitabında bu dövrü rəhbərliyin məsuliyyət hissini itirməsi və futbolçuların arxayınlığı ilə izah edir. Komanda cədvəldə 11-ci yerə geriləsə də, SSRİ Kubokunun yarımfinalında Tbilisi "Dinamo"suna 0:1 hesabı ilə uduzdu. Mövsümün sonunda respublika rəhbərliyi baş məşqçi Əhməd Ələsgərovu, məşqçi Valentin Xlıstovu və rəis Rauf Adıgözəlovu vəzifədən azad etdi; Ələkbər Məmmədov yenidən baş məşqçi təyin olundu, Tuayev və Banişevski komandaya qayıtdılar.

1972-ci ildə "Neftçi" 16 komanda arasında sonuncu yeri tutaraq birinci liqaya düşdü. Komanda 1973–1976-cı illəri birinci liqada keçirdi və 1976-cı ildə 54 xalla Alma-Ata "Kayrat"ından sonra ikinci yeri tutaraq yüksək liqaya qayıtdı.

1977–1988-ci illərdə "Neftçi" fasiləsiz olaraq yüksək liqada oynasa da, əsasən cədvəlin aşağı hissəsində yer alırdı. 1982-ci ildə komanda 18 komanda arasında 16-cı yeri tutdu və birinci liqaya düşmüş Krasnodar "Kuban"ı ilə eyni sayda — 27 xal toplamışdı; "Neftçi" yalnız əlavə göstəricilərə görə yüksək liqada qaldı. 1984 və 1985-ci illərdə komandanı təhlükəli zonadan cəmi bir xal ayırırdı. 1980-ci illərin ən yaxşı nəticəsi Ağasəlim Mircavadovun rəhbərliyi ilə 1987-ci ildə tutulan 9-cu yer oldu; həmin dövrdə komandanın hücum xəttini İsgəndər Cavadov, Maşallah Əhmədov və İqor Ponomaryov təşkil edirdi. 1988-ci ildə "Neftçi" SSRİ Futbol Federasiyası Kubokunun finalına çıxdı, lakin çempionatda 16 komanda arasında 15-ci yeri tutaraq yenidən birinci liqaya düşdü.

1988-ci ildə SSRİ-də yenidənqurma siyasətinin təsiri ilə "Neftçi" peşəkar futbol klubu statusu aldı və kluba ilk prezident — Aydın İbrahimov seçildi; əvvəllər komanda birbaşa Mərkəzi Komitə tərəfindən idarə olunurdu. 1989–1991-ci illərdə, SSRİ dağılanadək, komanda birinci liqada çıxış etdi və sonuncu mövsümdə 22 komanda arasında 15-ci yeri tutdu. Ümumilikdə "Neftçi" SSRİ çempionatlarının yüksək liqasında 27 mövsüm oynamışdır.

Müstəqillik dövrü

İlk çempionluqlar (1992–1999)

Azərbaycan müstəqilliyini bərpa etdikdən sonra 1992-ci ildə keçirilən ilk milli Azərbaycan çempionatında "Neftçi" 36 oyunda 30 qələbə qazanaraq, 104 qol vuraraq və cəmi 4 məğlubiyyətlə qızıl medalları qazandı; komandaya Əhməd Ələsgərov rəhbərlik edirdi, Samir Ələkbərov 36 qolla çempionatın bombardiri oldu. 1993-cü ildə komanda Superkuboku, 1995-ci ildə isə Vaqif Sadıqovun rəhbərliyi altında ilk dəfə Azərbaycan Kubokunu qazandı. Sadıqov həmin il komandaya ikinci Superkuboku da qazandırdı.

1995/96 mövsümündə "Neftçi" həm çempionatı, həm də kuboku qazanaraq tarixində ilk "qızıl dubl"a imza atdı; mövsüm ərzində komandaya Vaqif Sadıqov, Asif Əliyev və Kazbek Tuayev rəhbərlik etmişdilər. Klub avrokuboklarda ilk oyununu da bu dövrdə keçirdi: 1995/96 Kuboklar Kubokunda Kiprin "APOEL" klubuna iki oyunun yekununa görə 0:3 hesabı ilə uduzdu. İlk avrokubok qələbəsi 1996-cı ildə Bakıda Bolqarıstanın "Lokomotiv" klubu üzərində qazanıldı (2:1), lakin cavab oyununda 0:6 hesablı məğlubiyyət komandanı mübarizədən kənarlaşdırdı.

1996/97 mövsümündə Kazbek Tuayevin rəhbərlik etdiyi "Neftçi" 30 oyunda 23 qələbə ilə birinci yeri tutdu; Qurban Qurbanov 34 qolla çempionatın bombardiri oldu. Lakin AFFA yekunda əsas və yeniyetmə komandaların topladığı xalların cəmini əsas götürərək qızıl medalları "Qarabağ"a verdi. UEFA isə "Neftçi"ni çempion kimi tanıdı və klub 1997/98 Çempionlar Liqasının təsnifat mərhələsində iştirak hüququ qazandı; orada Polşanın "Vidzev" klubuna iki oyunun yekununa görə 0:10 hesabı ilə uduzdu ki, bu da klubun avrokuboklardakı ən ağır məğlubiyyətidir. 1999-cu ildə komanda Tuayevin rəhbərliyi ilə üçüncü dəfə ölkə kubokunu qazandı.

2000-ci illər

2003/04 mövsümündə "Neftçi" Kazbek Tuayevin rəhbərliyi ilə ikinci dəfə "qızıl dubl" etdi: komanda 26 oyunda yalnız bir məğlubiyyətlə çempionatı, eyni zamanda ölkə kubokunu qazandı. 2004/05 mövsümünün sonunda Ağasəlim Mircavadovun rəhbərlik etdiyi "Neftçi" "Xəzər-Lənkəran"la eyni sayda xal topladığından çempion Gəncə şəhər stadionunda keçirilən "qızıl oyun"da müəyyən edildi. "Neftçi" rəqibini 2:1 hesabı ilə məğlub edərək ardıcıl ikinci, ümumilikdə beşinci dəfə çempion oldu; bundan sonra klubun emblemində beş çempionluğu simvolizə edən ulduz yer aldı.

Bu dövrdə klub avrokuboklarda da ilk mərhələ keçidlərinə nail oldu. 2004/05 mövsümündə Bosniya və Herseqovinanın "Şiroki Brieq" klubunu səfərdə vurulan qol sayəsində keçən "Neftçi" ikinci təsnifat mərhələsində Moskva CSKA-ya uduzdu. 2005/06 mövsümündə isə klub İslandiyanın "Hafnarfyordur" komandasını iki oyunun yekununa görə 4:1 hesabı ilə məğlub edərək avrokuboklarda ilk səfər qələbəsini (2:1) qazandı, lakin növbəti mərhələdə Belçikanın "Anderlext" klubuna 1:5 hesabı ilə uduzdu. 2008-ci ildə İntertoto Kubokunda komanda iki mərhələ keçərək üçüncü mərhələdə Rumıniyanın "Vasluy" klubuna uduzdu.

"Neftçi" MDB və Baltikyanı ölkələrin çempionlarının Birlik Kubokunda da tarixi nəticələr göstərdi: 2005-ci ildə finala çıxan ilk Azərbaycan klubu oldu (finalda Moskva "Lokomotiv"inə 1:2 hesabı ilə uduzdu), 2006-cı ildə isə finalda Litvanın "Kaunas" klubunu 4:2 hesabı ilə məğlub edərək bu kuboku qazanan ilk Azərbaycan komandası oldu.

2005-ci ildən sonra komanda bir neçə mövsüm ərzində çempionluq uğrunda mübarizədən kənarda qaldı. 2006–2009-cu illərdə baş məşqçi postunda Qurban Qurbanov, Vlastimil Petrjela, Anatoli Demyanenko, Hans-Yürgen Gede və Böyükağa Ağayev bir-birini əvəz etsə də, komanda 2006/07 mövsümündəki ikinci yerdən sonra 2008/09 mövsümündə 8-ci yerədək geriləmişdi. 2009-cu ilin dekabrında klubun idarəçiliyini Sadıq Sadıqov öz üzərinə götürdü.

Üç ardıcıl çempionluq və Avropa Liqası (2010–2014)

"APOEL" 1:3 "Neftçi" (UEFA Avropa Liqası, pley-off mərhələsi, 30 avqust 2012) oyununda "Neftçi"nin başlanğıc heyəti

2010/11 mövsümündə Arif Əsədovun rəhbərlik etdiyi "Neftçi" mövsümün bitməsinə üç tur qalmış altı illik fasilədən sonra altıncı dəfə Azərbaycan çempionu oldu. Çempionlar Liqasının ikinci təsnifat mərhələsində Zaqreb "Dinamo"suna uduzduqdan sonra Əsədov vəzifəsindən azad edildi və komandaya Böyükağa Hacıyev rəhbərlik etməyə başladı. Hacıyevin rəhbərliyi ilə "Neftçi" 2011/12 mövsümündə ardıcıl ikinci dəfə çempion oldu.

2012/13 Çempionlar Liqasında "Neftçi" ikinci təsnifat mərhələsində Gürcüstan çempionu "Zestafoni"ni (3:0, 2:2) keçərək bu turnirin üçüncü təsnifat mərhələsinə çıxan ilk Azərbaycan klubu oldu. Həmin mərhələdə İsrailin "Hapoel İroni Kiryat Şmona" klubuna uduzan komanda Avropa Liqasının pley-off mərhələsində Kiprin "APOEL" klubu ilə qarşılaşdı. Bakıda 1:1 hesablı heç-heçədən sonra 2012-ci il avqustun 30-da Nikosiyada 3:1 hesablı qələbə qazanan "Neftçi" avrokubokların qrup mərhələsinə vəsiqə qazanan ilk Azərbaycan klubu kimi tarixə düşdü. Qrup mərhələsində "Neftçi" İtaliyanın "İnter", Rusiyanın "Rubin" və Serbiyanın "Partizan" klubları ilə qarşılaşdı; komanda "Partizan"la hər iki oyunda (1:1, 0:0) və Milanda "İnter"lə (2:2) heç-heçə etdi, qalan oyunlarda isə məğlub olaraq qrupda sonuncu yeri tutdu.

2012/13 mövsümündə "Neftçi" ardıcıl üçüncü dəfə çempion oldu və ölkə kubokunun finalında "Xəzər-Lənkəran"ı penaltilər seriyasında (0:0, pen. 5:3) məğlub edərək üçüncü "qızıl dubl"unu qazandı. 2013/14 Çempionlar Liqasının ikinci təsnifat mərhələsində Albaniyanın "Skenderbeu" klubuna iki oyunun yekununa görə 0:1 hesabı ilə uduzduqdan sonra Hacıyev istefa verdi; komandaya əvvəlcə müvəqqəti olaraq Tərlan Əhmədov, 2013-cü ilin oktyabrından isə Nazim Süleymanov rəhbərlik etdi. Süleymanov 2014-cü il yanvarın 8-də istefa verdi və üç gün sonra Hacıyev yenidən baş məşqçi təyin olundu.

2014-cü il mayın 22-də "Neftçi" ölkə kubokunun finalında "Qəbələ"ni penaltilər seriyasında (1:1, pen. 3:2) məğlub edərək ardıcıl ikinci, ümumilikdə altıncı dəfə kuboku qazandı; çempionatda isə komanda 4-cü yeri tutdu. 2014/15 Avropa Liqasında komanda Sloveniyanın "Koper" (1:2, 2:0) və Gürcüstanın "Çixura" (0:0, 3:2) klublarını keçərək ikinci dəfə pley-off mərhələsinə çıxdı, lakin burada "Partizan"a (2:3, 1:2) uduzdu. Bu nəticədən sonra Böyükağa Hacıyev istefa verdi.

Maliyyə çətinlikləri və yenidənqurma (2014–2020)

2014-cü ilin noyabrında klub prezidenti Sadıq Sadıqov klubun maliyyə çətinlikləri ilə üzləşdiyini açıqladı, 2015-ci ilin martında isə klubun açıq səhmdar cəmiyyətinə çevrildiyi elan olundu. 2014–2018-ci illər klub üçün tez-tez məşqçi dəyişiklikləri ilə yadda qaldı: bu müddətdə komandaya Arif Əsədov, Samir Əliyev, Əsgər Abdullayev, Vəli Qasımov, Elxan Abdullayev, Elşad Əhmədov və Tərlan Əhmədov rəhbərlik etdilər. "Neftçi" 2014/15 və 2015/16 mövsümlərində ölkə kubokunun finalında "Qarabağ"a uduzdu, 2016/17 mövsümündə isə 28 oyunda 17 məğlubiyyətlə 7-ci yeri tutaraq müstəqillik dövrünün ən zəif nəticəsini göstərdi.

2018-ci il iyunun 8-də italiyalı mütəxəssis Roberto Bordin iki illik müqavilə ilə baş məşqçi təyin olundu. Onun rəhbərliyi ilə komanda 2018/19 mövsümündə 12 ildən sonra ilk dəfə gümüş medal qazandı. 2019/20 Avropa Liqasında "Neftçi" Moldovanın "Speransa" klubunu iki oyunun yekununa görə 9:0 hesabı ilə məğlub edərək avrokuboklardakı ən böyük hesablı qələbəsini qazandı və Tula "Arsenal"ını (3:0, 1:0) keçdikdən sonra üçüncü təsnifat mərhələsində İsrailin "Bney Yehuda" klubuna uduzdu. 2020-ci il yanvarın 18-də Bordinlə müqavilə qarşılıqlı razılıqla ləğv edildi və komandaya Füzuli Məmmədov rəhbərlik etməyə başladı. COVID-19 pandemiyası səbəbindən vaxtından əvvəl dayandırılan 2019/20 mövsümünü komanda ikinci yerdə başa vurdu.

Doqquzuncu çempionluq və sonrakı illər (2020–2026)

2020-ci il noyabrın 11-də klubun keçmiş futbolçusu Samir Abasov baş məşqçi təyin olundu. Onun rəhbərliyi ilə "Neftçi" 2020/21 mövsümünün son turunda "Qarabağ"ı 1:0 hesabı ilə məğlub edərək yeddi illik fasilədən sonra doqquzuncu dəfə Azərbaycan çempionu oldu; həlledici qolu 90-cı dəqiqədə bolqarıstanlı hücumçu Əhməd Əhmədov vurdu. 2021/22 mövsümündə komanda gümüş medal qazandı, avrokuboklarda isə Çempionlar Liqasında Tbilisi "Dinamo"sunu keçdikdən sonra "Olimpiakos"a, Avropa Liqasında Finlandiyanın "HİK" klubuna uduzdu və Konfrans Liqasının pley-off mərhələsində "Makkabi Hayfa"ya məğlub oldu. 2022-ci ilin iyununda müqaviləsi başa çatan Abasovla yeni müqavilə bağlanmadı.

2022/23 mövsümündə rumıniyalı mütəxəssis Laurentsiu Regekampfın rəhbərliyi ilə "Neftçi" üçüncü yeri tutdu və ölkə kubokunun finalında "Qəbələ"yə əlavə vaxtda 0:1 hesabı ilə uduzdu. 2023-cü il iyulun 11-də Adrian Mutu iki illik müqavilə ilə baş məşqçi təyin olunsa da, ilin sonunda vəzifəsini tərk etdi və onu Miodraq Bojoviç əvəz etdi; komanda 2023/24 mövsümünü 5-ci yerdə başa vurdu. 2024-cü il iyunun 26-da ukraynalı mütəxəssis Roman Qriqorçuk iki illik müqavilə imzaladı, lakin 2024/25 mövsümünün ilk 9 turunda 5 heç-heçə və 4 məğlubiyyətdən sonra oktyabrın 7-də klubla yollarını ayırdı; komandaya yenidən Samir Abasov rəhbərlik etməyə başladı. "Neftçi" həmin mövsümü 36 oyunda 10 qələbə ilə 6-cı yerdə başa vurdu və avrokuboklara vəsiqə qazana bilmədi.

2025-ci il fevralın 7-də klub "International Holding Company"yə məxsus "Palms Sports" şirkəti ilə beş illik sponsorluq müqaviləsi imzaladı. Klubun baş icraçı direktoru Cenk Sümərin sözlərinə görə, bu müqavilə klubun illik gəlirinin 30 faizini təşkil edir; müqavilədən sonra klubun stadionu "Palms Sports Arena" adlandırıldı.

2025/26 mövsümünün 12 turundan sonra cəmi 3 qələbə qazanmış komandanın nəticələrini qənaətbəxş hesab etməyən klub rəhbərliyi 2025-ci il noyabrın 24-də Samir Abasovu istefaya göndərdi. Dekabrın 9-da əvvəllər "Zorya", "Şaxtyor" (Soliqorsk) və "Şerif" klublarında işləmiş ukraynalı mütəxəssis Yuri Vernidub bir il yarımlıq müqavilə ilə baş məşqçi təyin olundu. Onun rəhbərliyi ilə "Neftçi" mövsümü 33 oyunda 16 qələbə, 11 heç-heçə və 6 məğlubiyyətlə, 59 xalla 4-cü yerdə başa vurdu və 2026/27 UEFA Konfrans Liqasına vəsiqə qazandı. Konfrans Liqasının ikinci təsnifat mərhələsində komanda Belarusun "Dinamo Minsk" klubuna Bakıda 2:4 hesabı ilə uduzdu, səfərdə 1:0 hesabı ilə qalib gəlsə də, iki oyunun yekununa görə (3:4) mübarizəni dayandırdı. Komanda mövsümü 59 xalla dördüncü yerdə başa vurdu. UEFA Konfrans Liqasının 2026/27 mövsümünün II təsnifat mərhələsində "Neftçi" Belarusun "Dinamo Minsk" klubu ilə qarşılaşdı: Bakıdakı ilk oyunda 2:4 hesabı ilə uduzan komanda cavab oyununda 1:0 hesabı ilə qalib gəlsə də, iki oyunun cəmində 3:4 hesabı ilə mübarizədən kənarlaşdı. 2026-cı il avqustun 24-də "Neftçi" "Araz-Naxçıvan"ı 5:0 hesabı ilə məğlub edərək Azərbaycan çempionatlarında 300-cü ev qələbəsini qazandı. 2026-cı il oktyabrın 20-nə olan vəziyyətə görə "Neftçi" 2026/27 mövsümündə 8 turdan sonra 17 xalla ikinci yerdə qərarlaşıb.

Klubun kimliyi

Adı

Klub 1937-ci ildə "Neftyanik" (rus. Нефтяник) adı ilə yaradılmışdır; bu ad komandanın neft sənayesi işçilərinin həmkarlar ittifaqına məxsus olduğunu bildirirdi. Azərbaycanca "Neftçi" adının rəsmiləşdirilməsi Azərbaycan KP MK-nın ideoloji şöbəsinin katibi Cəfər Cəfərovun təşəbbüsü ilə baş vermişdir. SSRİ çempionatının rəsmi sənədlərində komanda 1968-ci il mövsümündən "Neftçi" adı ilə qeyd olunur. Hazırkı rəsmi adı "Neftçi Peşəkar Futbol Klubu"dur.

Rəngləri və emblemi

"Neftçi"nin keçmiş və yeni loqoları

Klubun ənənəvi rəngləri ağ və qaradır. Yarandığı ilk illərdə formanın əsas rəngi "qara qızıl"ın — neftin rəngi olan qara idi; 1950-ci illərdə respublikanın digər mühüm sərvəti — "ağ qızıl" adlandırılan pambığın rəmzi kimi formaya ağ rəng də əlavə edildi.

Klubun ilk emblemi 1949-cu ildə, komanda yüksək liqaya buraxıldıqdan sonra tərtib edilmişdir: emblemdə neft buruğunun fonunda kiril əlifbası ilə "Neftyanik" sözünün baş hərfi "H" əks olunmuşdu. Sonralar emblem 1977, 1997 və 2004-cü illərdə dəyişdirilmiş, 2005-ci ildə isə klubun beşinci çempionluğunu simvolizə edən ulduz əlavə edilmişdir.

Formalar və sponsorlar

Klubun futbolçularının müxtəlif illərdə geyindiyi formalar Neftçi muzeyində

"Neftçi"nin ənənəvi forması qara köynək, ağ şort və ağ corabdan ibarət idi; sonralar qara köynək ağ-qara zolaqlı köynəklə əvəz olunmuşdur. 2004–2006-cı illərdə klubun titul sponsoru Heydər Əliyev adına Bakı Neft Emalı Zavodu (formada "BNEZ"), 2006–2015-ci illərdə SOCAR, 2015–2017-ci illərdə isə ASAN xidmət olmuşdur. 2017–2019-cu illərdə formada sponsor adı yer almamış, 2019/20 mövsümündən Türk Hava Yolları forma sponsoruna çevrilmişdir.^{[mənbə göstərilməlidir]} 2025-ci ilin fevralından klubun baş sponsoru "Palms Sports" şirkətidir.

Ləqəbləri

Klub "neftçilər" və "ağ-qaralar" ləqəbləri ilə yanaşı, Azərbaycan mətbuatında "flaqman" və "xalq komandası" kimi də adlandırılır.

Stadion

Əsas məqalə: Neftçi Arena

"Neftçi"nin ev oyunu, 2025-ci il

Uzun illər "Neftçi" ev oyunlarını Bakıdakı Tofiq Bəhramov adına Respublika Stadionunda keçirmişdir. 2012-ci ilin sentyabrında Bakının 8-ci kilometr qəsəbəsində 11 min tamaşaçı tutumlu yeni stadion istifadəyə verildi və klub həmin mövsümdən ev oyunlarını burada keçirir. Stadion müxtəlif dövrlərdə "8 km stadionu", "Bakcell Arena" və "Neftçi Arena" adlanmış, 2025-ci ilin fevralında "Palms Sports" şirkəti ilə sponsorluq müqaviləsi imzalandıqdan sonra "Palms Sports Arena" adını almışdır. Klub bəzi hazırlıq və seçmə oyunlarını İsmət Qayıbov adına Bakıxanov qəsəbə stadionunda və Bayıl stadionunda da keçirmişdir.

Azarkeşləri

"Neftçi" Azərbaycanda ən çox azarkeşi olan klublardan biri hesab olunur. Müxtəlif illərdə klubun "Flaqman", "Ultra Neftçi", "Neftçimania" və "Forza Neftçi" kimi mütəşəkkil azarkeş qrupları fəaliyyət göstərmişdir. 2009-cu ildə yaranmış "Forza Neftçi" hazırda klubun ən böyük azarkeş qrupudur və stadionun 1A sektorundan komandaya dəstək verir; 2011-ci ildə yaranan "Neftçimania" qrupu isə 4A sektorunda yerləşir.^{[mənbə göstərilməlidir]} Klubun azarkeş qrupları azərbaycanlı icmasının yaşadığı Türkiyə, Rusiya, ABŞ və digər ölkələrdə də mövcuddur. Bununla belə, 2010-cu illərdə komandanın idman nəticələrinin yüksəlməsinə baxmayaraq, ev oyunlarına orta tamaşaçı sayı aşağı səviyyədə qalmışdır.

Klubun tanınmış azarkeşləri arasında aktyorlar Bəhram Bağırzadə, Bəşir Səfəroğlu və Lütfəli Abdullayev, bəstəkarlar Qara Qarayev, Fikrət Əmirov və Niyazi, cüdoçu İlham Zəkiyev, repçi Anar Nağılbaz və alim Mirəli Qaşqayın adı çəkilir.

2009-cu ilin aprelindən klubun rəsmi jurnalı nəşr olunmağa başlamışdır.

Rəqabətləri

"Qarabağ"la rəqabət

Əsas məqalə: Qarabağ–Neftçi rəqabəti

Neftçi

Qarabağ

Hər iki klubun xəritədə yeri

"Neftçi" ilə "Qarabağ" 1992-ci ildən bəri keçirilən bütün Azərbaycan çempionatlarında iştirak edən yeganə iki klubdur və onların qarşılaşmaları mətbuatda "Azərbaycan derbisi" adlandırılır. İlk oyun 1992-ci il sentyabrın 26-da Tofiq Bəhramov adına Respublika Stadionunda keçirilmiş və 1:1 hesablı heç-heçə ilə başa çatmışdır. İlk qələbəni 1992-ci il oktyabrın 20-də Ağdamın "İmarət" stadionunda 2:1 hesabı ilə "Qarabağ" qazanmışdır; bu, tərəflərin "İmarət"də keçirdiyi yeganə çempionat oyunu olmuşdur. "Neftçi" ilk qələbəsini 1994/95 mövsümündə evdə 3:2 hesabı ilə qazanmışdır. Derbidə ən böyük hesablı qələbələr: "Neftçi" 7:1 (4 noyabr 2000) və "Qarabağ" 6:0 (8 noyabr 2020). 2010-cu illərin ortalarından etibarən "Qarabağ" ölkə futbolunda üstünlüyü ələ keçirmiş və şəxsi görüşlərdə də qələbə sayına görə "Neftçi"ni qabaqlamışdır.

"Neftçi" – "Qarabağ" oyunlarının statistikası (17 oktyabr 2026-cı il tarixinə)^{[mənbə göstərilməlidir]}

Yarış	Oyun	"Neftçi" qələbəsi	Heç-heçə	"Qarabağ" qələbəsi	Qollar ("Neftçi" – "Qarabağ")
Azərbaycan Premyer Liqası	103	24	32	47	90–151
Azərbaycan Kuboku	23	6	5	12	17–26
Cəmi	126	30	37	59	107–177

"Kəpəz"lə rəqabət

Neftçi

Kəpəz

Hər iki klubun xəritədə yeri

Bakı və Gəncə şəhərlərini təmsil edən "Neftçi" ilə "Kəpəz" arasındakı rəqabət SSRİ dövrünə gedib çıxır. İki komanda ilk dəfə 1962-ci il iyunun 26-da SSRİ Kubokunun 1/8 finalında qarşılaşmış və o vaxt "Dinamo" (Kirovabad) adlanan Gəncə klubu 1:0 hesabı ilə qalib gəlmişdir. 1968-ci ildə hər iki komanda SSRİ çempionatının yüksək liqasında çıxış etmişdir — bu, Azərbaycanın yüksək liqada iki komanda ilə təmsil olunduğu yeganə mövsümdür. Müstəqillik dövründə iki klubun qarşılaşmaları Azərbaycan futbolunun ən köklü derbilərindən biri hesab olunur.^{[mənbə göstərilməlidir]}

"Neftçi" – "Kəpəz" oyunlarının statistikası^{[mənbə göstərilməlidir]}

Yarış	Oyun	"Neftçi" qələbəsi	Heç-heçə	"Kəpəz" qələbəsi	Qollar
Azərbaycan Premyer Liqası	44	21	7	16	69–41
Azərbaycan Kuboku	14	8	2	4	18–11
SSRİ çempionatı	2	1	0	1	2–3
SSRİ Kuboku	1	0	0	1	0–1
Cəmi	61	30	9	22	89–56

"Xəzər-Lənkəran"la rəqabət

Əsas məqalə: Böyük Oyun (futbol)

2000-ci illərin ikinci yarısında "Neftçi" ilə "Xəzər-Lənkəran" arasındakı qarşılaşmalar ölkə futbolunun ən maraqlı oyunları sırasında idi və mətbuatda "Böyük Oyun" adlandırılırdı. İlk oyun 2004-cü il dekabrın 8-də Lənkəran şəhər stadionunda keçirilmiş və 1:1 hesabı ilə başa çatmışdır. Tərəflər 2004/05 mövsümünün çempionunu müəyyən edən "qızıl oyun"da da qarşılaşmış, "Neftçi" 2:1 hesabı ilə qalib gəlmişdir. Ən böyük hesablı qələbə 2011-ci il noyabrın 6-da "Neftçi"yə məxsusdur (5:0). "Xəzər-Lənkəran"ın 2016-cı ildə fəaliyyətini dayandırması ilə bu rəqabət tarixə çevrilmişdir.^{[mənbə göstərilməlidir]}

Sovet dövründə "Neftçi"nin İrəvan "Ararat"ı ilə qarşılaşmaları da Qafqaz derbisi kimi tanınırdı.

İdarəetmə

Prezidentləri

1988-ci ilədək klubda prezident vəzifəsi mövcud deyildi və komanda bilavasitə Azərbaycan KP MK tərəfindən idarə olunurdu. 1988-ci ildə yenidənqurmanın təsiri ilə "Neftçi" peşəkar futbol klubu statusu aldı və ilk prezidenti seçildi. 2015-ci ildə klub açıq səhmdar cəmiyyətinə çevrilmişdir. 2024-cü ildən klubun gündəlik idarəçiliyini prezident deyil, baş icraçı direktor həyata keçirir; bu vəzifəni türkiyəli menecer Cenk Sümər tutur. Klubun fəaliyyətinə Müşahidə Şurası nəzarət edir.

Prezident	İllər
Aydın İbrahimov	1988–1997
Aqil Paşayev	1997–2001
Ramiz Mirzəyev	2001–2003
Rövnəq Abdullayev	2004–2008
Əkbər Hacıyev	2008–2009
Sadıq Sadıqov	2010–2015
Orxan Hüseynzadə	2017–2018
Kamran Quliyev	2018–2023
Fərrux Mahmudov	2023–2024

Rəhbərlik

Sonuncu dəfə 14 oktyabr 2026 tarixində yeniləndi

Vəzifə	Adı
Baş icraçı direktor	Cenk Sümər
İdman üzrə müşavir	Kamil Məmmədov
Futbol komandaları və əməliyyatları üzrə direktor	Zaur Əzizov
Marketinq üzrə direktor	Kaan Cem Gültekin
Maliyyə direktoru	Məmməd Hacıyev
Media üzrə koordinator	Rüstəm Əfsərli
Mətbuat katibi	Asəf Zeynallı
"A" komandasının meneceri	Emil Məmmədov

Müşahidə Şurası

Vəzifə	Adı
Müşahidə Şurasının sədri	Hafiz Zeynalov
Üzv	Emin Əmrullayev
Üzv	Orxan Sultanov
Üzv	Afaq Məmmədova
Üzv	Fərid Hacıyev
Üzv	Emil Alxaslı
Üzv	Bəxtiyar Aslanbəyli

Sponsorluq

2025-ci il fevralın 7-də "Neftçi" "International Holding Company"yə məxsus "Palms Sports" şirkəti ilə beş illik sponsorluq müqaviləsi imzalamışdır. Klubun baş icraçı direktoru Cenk Sümərin sözlərinə görə, müqavilədən əldə olunan gəlir klubun illik qazancının 30 faizini təşkil edir. 2025-ci ilin sonuna olan məlumata görə, "Transfermarkt" portalı klubun heyətinin bazar dəyərini 12,13 milyon avro olaraq qiymətləndirmişdir.

Heyət

Əsas heyət

Sonuncu dəfə 20 oktyabr 2026 tarixində yeniləndi

Nömrə Ölkə Mövqeyi Futbolçu 1 GK Emil Balayev 3 DF Rüfət Abbasov 5 DF İqor Ribeyro 6 MF Sessi D'Almeyda 7 MF Emil Səfərov 8 MF Emin Mahmudov (kapitan) 10 MF Fredi Varqas 11 MF Alen Şkribek 14 DF Elvin Bədəlov 17 DF Murad Xaçayev 18 MF İfeanyi Metyu 20 MF Qustavo Klisman 22 MF Denzel Jubitana

Nömrə Ölkə Mövqeyi Futbolçu 24 DF Mustafa Sek 26 FW Adeleke Akinyemi 27 MF Draqolyub Saviç 29 FW Lyubomir Tupta 33 FW Breno Almeyda 55 DF Endryu Qravilyon 70 MF Andrey Ştoqrin 77 DF Falaye Sako 88 MF Viçko Şevel 93 GK Rza Cəfərov 97 FW Bassala Sambu

Məşqçilər heyəti

Sonuncu dəfə 14 oktyabr 2026 tarixində yeniləndi

Vəzifə	Adı
Baş məşqçi	Yuri Vernidub
Baş məşqçinin köməkçisi	Dmitri Kara-Mustafa
Baş məşqçinin köməkçisi	Vitali Vernidub
Qapıçılar üzrə məşqçi	Atilla Küçüktaka

Məşqçilər

Klubun ilk baş məşqçisi Aleksandr Qnezdov olmuşdur. SSRİ dövründə komandaya rəhbərlik etmiş məşqçilər arasında ən uğurlusu 1966-cı ildə bürünc medal qazandırmış Əhməd Ələsgərovdur; o, 1992-ci ildə komandaya müstəqillik dövrünün ilk çempionluğunu da qazandırmışdır. Müstəqillik dövründə ən çox titul qazandıran məşqçilər Kazbek Tuayev (üç çempionluq, iki kubok) və Böyükağa Hacıyevdir (iki çempionluq, iki kubok).

Titul qazanmış baş məşqçilər

Baş məşqçi	Dövr	Titullar
Əhməd Ələsgərov	1966–1970, 1979–1982, 1991–1992, 1999–2000	SSRİ çempionatının bürünc medalı (1966); Azərbaycan çempionatı (1992)
Vaqif Sadıqov	1993–1995, 2009–2010	Azərbaycan Kuboku (1994/95, 1995/96); Azərbaycan Superkuboku (1993, 1995)
Kazbek Tuayev	1996–1997, 1998–1999, 2001–2004	Azərbaycan çempionatı (1995/96, 1996/97, 2003/04); Azərbaycan Kuboku (1998/99, 2003/04)
Ağasəlim Mircavadov	1987–1989, 2004–2006	Azərbaycan çempionatı (2004/05); Birlik Kuboku (2006)
Arif Əsədov	2010–2011, 2014–2015	Azərbaycan çempionatı (2010/11)
Böyükağa Hacıyev	2011–2013, 2014	Azərbaycan çempionatı (2011/12, 2012/13); Azərbaycan Kuboku (2012/13, 2013/14)
Samir Abasov	2020–2022, 2024–2025	Azərbaycan çempionatı (2020/21)

Nailiyyətləri

Ölkədaxili turnirlər

SSRİ

• SSRİ çempionatı
  • Bürünc medal (1): 1966
• SSRİ birinci liqası
  • Gümüş medal (1): 1976
• SSRİ Kuboku
  • Yarımfinalçı (4): 1967, 1968, 1970, 1971
• SSRİ Futbol Federasiyası Kuboku
  • Finalçı (1): 1988

Azərbaycan

• Azərbaycan çempionatı
  • Çempion (9): 1992, 1995/96, 1996/97, 2003/04, 2004/05, 2010/11, 2011/12, 2012/13, 2020/21
  • Gümüş medal (5): 2000/01, 2006/07, 2018/19, 2019/20, 2021/22
  • Bürünc medal (7): 1994/95, 1998/99, 1999/2000, 2005/06, 2007/08, 2017/18, 2022/23
• Azərbaycan Kuboku
  • Qalib (6): 1994/95, 1995/96, 1998/99, 2003/04, 2012/13, 2013/14
  • Finalçı (5): 2000/01, 2011/12, 2014/15, 2015/16, 2022/23
• Azərbaycan Superkuboku
  • Qalib (2, rekord): 1993, 1995
  • Finalçı (1): 2013

Beynəlxalq turnirlər

• Birlik Kuboku
  • Qalib (1): 2006
  • Finalçı (1): 2005
• UEFA İntertoto Kuboku
  • Üçüncü mərhələ (1): 2008
• UEFA Avropa Liqası
  • Qrup mərhələsi (1): 2012/13

Avropa yarışlarında

Əsas məqalə: Neftçi PFK Avropa yarışlarında

"Neftçi" avrokuboklarda ilk dəfə 1995/96 mövsümündə iştirak etmişdir. Klubun ən yaxşı nəticəsi 2012/13 Avropa Liqasının qrup mərhələsinə çıxmasıdır; "Neftçi" bu nəticəyə nail olan ilk Azərbaycan klubudur. Komanda həmçinin 2014/15 mövsümündə Avropa Liqasının və 2021/22 mövsümündə Konfrans Liqasının pley-off mərhələsinədək irəliləmişdir. Avrokuboklarda ən böyük hesablı qələbə 2019-cu ildə Moldovanın "Speransa" klubu üzərində (6:0 evdə, 3:0 səfərdə), ən ağır məğlubiyyət isə 1997-ci ildə Polşanın "Vidzev" klubundan (0:2 evdə, 0:8 səfərdə) qeydə alınmışdır.

UEFA turnirlərində ümumi göstəricilər (2026/27 mövsümü daxil)

Turnir	O	Q	H	M	VQ	BQ	Fərq
UEFA Çempionlar Liqası	22	7	5	10	18	36	−18
UEFA Kuboku / Avropa Liqası	42	13	11	18	56	62	−6
UEFA Konfrans Liqası	12	4	2	6	17	23	−6
UEFA Kuboklar Kuboku	2	0	1	1	0	3	−3
UEFA İntertoto Kuboku	6	3	1	2	7	7	0
Cəmi	84	27	20	37	98	131	−33

Mövsümlər

Əsas məqalə: Neftçi PFK-nın mövsümlərinin siyahısı

SSRİ dövrü

"Neftçi" SSRİ çempionatlarında 1937-ci ildə və 1946–1991-ci illərdə iştirak etmişdir. Komanda yüksək liqada 27 mövsüm (1949–1950, 1960–1972, 1977–1988), birinci liqada 7 mövsüm (1973–1976, 1989–1991), "B" sinfində və ikinci qrupda isə 12 mövsüm (1946–1948, 1951–1959) oynamışdır.

SSRİ çempionatının yüksək liqasında tutduğu yerlər

Mövsüm	1949	1950	1960	1961	1962	1963	1964	1965	1966	1967	1968	1969	1970	1971	1972
Yer	14	19	21	18	10	8	12	11	3	5	9	7	11	9	16
Mövsüm	1977	1978	1979	1980	1981	1982	1983	1984	1985	1986	1987	1988
Yer	13	13	14	13	10	16	13	15	16	13	9	15

Azərbaycan dövrü (son on mövsüm)

Son on mövsümün nəticələri

Mövsüm	Yer	O	Q	H	M	VQ	BQ	X	Kubok	Avrokuboklar	Baş məşqçi(lər)
2016/17	7	28	9	2	17	24	45	29	1/2 final	Avropa Liqası, 2-ci təsnifat	Vəli Qasımov, Elxan Abdullayev
2017/18	3	28	14	4	10	39	28	46	1/2 final	—	Elxan Abdullayev, Elşad Əhmədov, Tərlan Əhmədov
2018/19	2	28	17	7	4	52	26	58	2-ci mərhələ	Avropa Liqası, 1-ci təsnifat	Roberto Bordin
2019/20	2	20	10	7	3	33	14	37	1/4 final	Avropa Liqası, 3-cü təsnifat	Roberto Bordin, Füzuli Məmmədov
2020/21	1	28	18	5	5	47	25	59	1/4 final	Avropa Liqası, 2-ci təsnifat	Füzuli Məmmədov, Samir Abasov
2021/22	2	28	15	5	8	42	31	50	1/2 final	Konfrans Liqası, pley-off	Samir Abasov
2022/23	3	36	20	8	8	63	38	68	Finalçı	Konfrans Liqası, 3-cü təsnifat	Laurentsiu Regekampf
2023/24	5	36	16	8	12	51	40	56	1/2 final	Konfrans Liqası, 3-cü təsnifat	Adrian Mutu, Miodraq Bojoviç
2024/25	6	36	10	13	13	39	49	43	1/2 final	—	Roman Qriqorçuk, Samir Abasov
2025/26	4	33	16	11	6	57	32	59	1/8 final	—	Samir Abasov, Yuri Vernidub

Rekordlar və statistika

Klub rekordları

• SSRİ çempionatındakı ən yaxşı nəticə: 3-cü yer (1966).
• Avrokuboklardakı ən böyük hesablı qələbə: 9:0 (iki oyunun yekunu), "Speransa" (Moldova), 2019/20.
• Avrokuboklardakı ən ağır məğlubiyyət: 0:10 (iki oyunun yekunu), "Vidzev" (Polşa), 1997/98.
• Azərbaycan çempionatında bir mövsümdə ən çox qol: 104 qol (1992).
• Azərbaycan çempionatında bir mövsümdə ən çox qol vurmuş futbolçu: Samir Ələkbərov, 36 qol (1992).
• 2011-ci ilin noyabrında klub rəsmi oyunlarda 1000-ci qələbəsini və çempionatlarda 1000-ci qolunu (Araz Abdullayev) qeydə almışdır.^{[mənbə göstərilməlidir]}
• 2026-cı il avqustun 24-də "Araz-Naxçıvan" üzərində 5:0 hesablı qələbə Azərbaycan çempionatlarında 300-cü ev qələbəsi olmuşdur; bu, klubun ölkə çempionatlarında 492-ci ev oyunu idi.

Fərdi rekordlar

Aşağıdakı cədvəllərdə SSRİ və Azərbaycan çempionatları, kuboklar və avrokuboklar daxil olmaqla rəsmi oyunlar nəzərə alınmışdır.^{[mənbə göstərilməlidir]}

Ən çox qol vurmuş futbolçular

#	Futbolçu	Dövr	Oyun	Qol
1	Samir Ələkbərov	1987–94, 1995–98	251	138
2	Anatoli Banişevski	1964–78	288	136
3	Yunis Hüseynov	1984–92, 1993–98	295	101
4	Eduard Markarov	1961–70	251	96
5	Vladimir Mikuçadze	1951–60	174	88
6	Nikolay Smolnikov	1967–79	338	86
7	İqor Ponomaryov	1978–81, 1983–88	226	70
8	Qurban Qurbanov	1996–98, 2001, 2004–05	80	69
9	Maşallah Əhmədov	1977–89	260	64
10	Əli Əbilzadə	1950–60	—	62

Ən çox oyun keçirmiş futbolçular

#	Futbolçu	Dövr	Oyun	Qol
1	Sergey Kramarenko	1964–75, 1977–84	412	0
2	Nikolay Smolnikov	1967–79	338	86
3	Əsgər Abdullayev	1979–91	319	1
4	Yunis Hüseynov	1984–92, 1993–98	295	101
5	Anatoli Banişevski	1964–78	288	136
6	İsgəndər Cavadov	1977–82, 1983–88	277	53
7	Kazbek Tuayev	1961–70, 1971–72	277	58
8	Maşallah Əhmədov	1977–89	260	64
9	Arif Əsədov	1985–93, 1995–97, 2000–02	258	5
10	Samir Ələkbərov	1987–94, 1995–98	251	138

Anatoli Banişevski klubun ən məşhur futbolçusu hesab olunur: o, 1964–1978-ci illərdə "Neftçi"nin 9 nömrəli formasında 288 oyun keçirmiş, SSRİ yığmasının heyətində 1966-cı il Dünya çempionatında və 1968-ci il Avropa çempionatında iştirak etmişdir. 2026-cı ilin fevralında klub Banişevskinin xatirəsinə 9 nömrəli formanı təqaüdə göndərmişdir.

Birlik Kubokunda

Əsas məqalə: Azərbaycan Birlik Kubokunda

"Neftçi" MDB və Baltikyanı ölkələrin çempionlarının Birlik Kubokunda beş dəfə iştirak etmişdir. Ardıcıl iki il finala çıxan komanda 2006-cı ildə kuboku qazanaraq beynəlxalq turnir qalibi olan ilk Azərbaycan klubu olmuşdur.

İl	Nəticə	O	Q	H	M	Qollar	Fərq
1993	Qrup mərhələsi	2	0	0	2	0–9	−9
1995	Qrup mərhələsi	3	1	0	2	1–6	−5
1997	Qrup mərhələsi	3	0	0	3	6–11	−5
2005	Finalçı	5	4	0	1	10–4	+6
2006	Qalib	6	4	2	0	13–6	+7
Cəmi	5 turnir	19	9	2	8	30–34	−4

Birlik Kubokundakı bütün oyunları
№	Tarix	Mərhələ	Rəqib	Hesab
1993
1	25.01.1993	Qrup	Skonto (Latviya)	0:1
2	27.01.1993	Qrup	Spartak Moskva (Rusiya)	0:8
1995
3	29.01.1995	Qrup	Jalgiris Vilnüs (Litva)	0:1
4	30.01.1995	Qrup	Spartak Moskva (Rusiya)	0:5
5	31.01.1995	Qrup	Sitora (Tacikistan)	1:0
1997
6	25.01.1997	Qrup	Spartak Moskva (Rusiya)	2:4
7	26.01.1997	Qrup	Zimbru Kişinyov (Moldova)	1:2
8	28.01.1997	Qrup	Novbahor (Özbəkistan)	3:5
2005
9	15.01.2005	Qrup	Şerif Tiraspol (Moldova)	1:0
10	16.01.2005	Qrup	Nebitçi (Türkmənistan)	4:1
11	19.01.2005	1/4 final	Pünik (Ermənistan)	2:0
12	21.01.2005	1/2 final	Dinamo Kiyev (Ukrayna)	2:1
13	23.01.2005	Final	Lokomotiv Moskva (Rusiya)	1:2
2006
14	14.01.2006	Qrup	Vaxş (Tacikistan)	3:0
15	15.01.2006	Qrup	Metallurq (Latviya)	2:1
16	17.01.2006	Qrup	Aktobe (Qazaxıstan)	1:1
17	18.01.2006	1/4 final	Paxtakor Daşkənd (Özbəkistan)	pen. 4:2
18	20.01.2006	1/2 final	Pünik (Ermənistan)	+:− (3:0)
19	22.01.2006	Final	Kaunas (Litva)	4:2

Reytinqi

Beynəlxalq Futbol Tarixi və Statistikası Federasiyasının (IFFHS) 2010-cu il noyabrın 26-da açıqladığı XXI əsrin ilk onilliyi üzrə klub reytinqində "Neftçi" 380,5 xalla Azərbaycan klubları arasında birinci, dünyada isə 314-cü yeri tutmuşdur. 2013-cü il martın 4-də açıqlanan reytinqdə isə klub 92,5 xalla dünya klubları arasında 180-ci yerdə qərarlaşmışdı. Sonrakı illərdə, xüsusən "Qarabağ"ın avrokuboklardakı uğurlarından sonra, "Neftçi" həm IFFHS, həm də UEFA klub reytinqində xeyli geriləmişdir.^{[mənbə göstərilməlidir]}

Kitablarda və filmlərdə

Klubun 1966-cı ildəki uğuru "Bürünc "Neftçi"" (1966), 1987-ci il mövsümü isə ""Neftçi"-87" (1987) sənədli filmlərində əks olunmuşdur. Rusiyada "Sovet futbolunun tarixi" layihəsi çərçivəsində nəşr olunmuş kitabda "Neftçi" SSRİ çempionatlarının ən güclü komandaları sırasında təqdim edilmiş, kitabın kluba həsr olunan hissəsində onun 2010-cu illərdəki üç ardıcıl çempionluğu və Avropa Liqasının qrup mərhələsindəki oyunları da yer almışdır. Klubun keçmiş rəisi Oqtay Atayev "Ot "Proqressa" do "Neftçi"" ("Proqres"dən "Neftçi"yədək) adlı xatirə kitabının müəllifidir.

Həmçinin bax

• Neftçi PFK-nın mövsümlərinin siyahısı
• Neftçi PFK Avropa yarışlarında
• Qarabağ–Neftçi rəqabəti
• Böyük Oyun (futbol)
• Qafqaz derbisi (Ararat–Neftçi)
• Neftçi PFK muzeyi

Xarici keçidlər

• neftchi.az — rəsmi saytı
• Neftçi PFK — Instagram səhifəsi
• Neftçi PFK — Facebook səhifəsi
• Neftçi PFK — "X" səhifəsi
• Neftçi PFK kanalı — YouTube platformasında
• Neftçi PFK — Telegram səhifəsi
• "Neftçi" UEFA.com saytında  (ing.)
• Peşəkar Futbol Liqasının rəsmi saytı  (az.)