કેટેગરી ગઝલ

ગુજરાતી સાહિત્યમાં ખરી પડયો એક સિતારો
માનનીય સાહિત્યકાર, કવિ શ્રી સુરેશ દલાલ ના અવસાનના સમાચાર સાંભળ્યા અને ખુબ જ દુઃખ થયું, એક ઔર કૃષ્ણ ભકત તેમની શરણમાં શબ્દની સૂરાવેલિ સુણાવીને ચાલ્યા ગયા. મીરાંબાઈ, નરસિંહ મહેતા, નાનાલાલ, દલપત, રહિમ, સુરદાસ, મંકરદ દવે પછી જો કોઈએ કૃષ્ણ ભકિત કાવ્ય કે ગીતના રચિયતા આજના યુગમાં હોય તો તે સ્વ શ્રી સુરેશ મહેતા જ હતા. તેમની રચનાઓ એટલે કે લીલી લીલી લહેરાતી વનરાઈ. શબ્દ જાણે વાંસળીમાંથી વહેતો સુર. તેમના કોઈ પણ પ્રવચન હોય, તેમાં કૃષ્ણ, મીરાંબાઈ, ઓશો રજનીશ કે સત્ય શ્રીસાંઈબાબા ની વાત કે ઉદાહરણ અચૂક સાંભળવાં મળે જ.

તેમને ઉત્તમ કાવ્યો, ગીતો અને લેખોનો સુશોભિત પુષ્પગુચ્છ આપ્યો છે તો સાથે સાથે વિચારપ્રેરક નિબંધોની ‘ઝલક’ પણ આપી છે.ગદ્ય-પદ્યના ઉત્તમ સંપાદનો તેમણે આપણને આપ્યા છે. તેમની દૈનિક અખબારો ની રવિવાર પુર્તિમાં આવતી કોલમ “મારી બારીએથી” હજુ પણ વાંચવી ગમે છે.તેઓ સાચા અર્થમાં ગુજરાતી સાહિત્યના ભીષ્મ પિતામહ હતા. ગુજરાતી સાહિત્ય ને ન પુરી શકાય તેવી આ ખોટ છે!!ગુજરાતી સાહિત્યમાં એક કળાયેલો મોરલો પોતાનો ટહુકો ગુંજતો કરીને ચાલ્યો ગયો છે પણ તેનો ટહુકો વાચકોના દિલમાં સદા ટહુકતો રહેશે.

ભગવાન સ્વર્ગસ્થના આત્માને શાંતિ આપે અને તેમના પરિવારને આ આવી પડેલ દુઃખને સહન કરવાની શકિતપ્રભુ આપે તેવી પ્રાર્થના સહ દિલથી શ્રદ્ધાજંલિ.